Halöwö Zinenge
14 Möi ndra sinenge ba Ikoniu ba nahia waʼowulo niha Yahudi. Sökhi sibai huhuora irege ato niha Yahudi hegöi Yunani zi faduhu tödö. 2 Hizaʼi, ira niha Yahudi si lö faduhu tödö, lafaweʼe niha sato moroi ba soi böʼö enaʼö latandrawaisi ndra talifusö andrö.+ 3 Oya ginötö niʼogunaʼö ndra sinenge wahuhuosa ba daʼö. Iʼabölöʼö ira Yehowa* enaʼö lö khöra faʼataʼu. Iʼogunaʼö ira wamalua ngawalö tandra hegöi sahöli-höli dödö+ ba wamaduhuʼö turia sanandrösa ba waʼasökhi dödönia sebua.* 4 Hizaʼi, tebagi dua mbanua andrö. So zi faʼawö ba niha Yahudi, ba so göi zi faʼawö khö ndra sinenge. 5 Me edöna niha sato moroi ba soi böʼö hegöi ira niha Yahudi fao ira khö ndra samatörö ba wamakao hegoi ba wanebu kara ira sinenge,+ 6 lafatunö daʼö khö ndra sinenge ba moloi ira ba mbanua Likaonia, Lisitera, Derebe hegöi ba mbanua si fasuira.+ 7 Ba lö laböhöli wanuriaigö turia somuso dödö ba daʼö.
8 Ba Lisitera, no modadao samösa ndra matua sombuyu-mbuyu ahe iʼotarai me tumbu, lö irai mowaö-waö ia. 9 Ihaogö wamondrondrongo me fahuhuo Waulo. Itöngö ia Faulo börö me iʼila wa mamati ia enaʼö tefadöhö.+ 10 Iʼebuaʼö linia Faulo, ”Ozizio!” Iʼanemaiʼö mosindro niha andrö ba mowaö-waö ia.+ 11 Me laʼila niha sato nifalua Waulo, muʼao ira ba li Likaonia, ”No möi tou lowalangi tobali niha ba wamalukhaisi yaʼita!”+ 12 Lafotöi Mbaranaba Zeo,* ba Faulo lafotöi Heremesi, börö me yaʼia zabölö oya fahuhuo. 13 Aefa daʼö Ere khö Zeo,* si so naha wamosumange ba mbawa göli, iʼohe ba daʼö zawi si matua faoma bunga* ba omasi ia fao ba niha sato wameʼe sumange.
14 Hizaʼi me larongo daʼö ira Baranaba faoma Faulo, lasika mbarura ba laʼondrasi niha sato lamane, 15 ”Hana wa mifalua daʼa? Yaʼaga göi niha si lö moʼahonoa simane yaʼami.+ Maturiaigö khömi duria somuso dödö, enaʼö miröi ngawalö zi tobali zaya-zaya gölö andre ba mifosumange Lowalangi sauri samazökhi banua si yawa, tanö, asi, ba ösinia maʼafefu.+ 16 Me mböröta, itehegö ba soi niha fefu wanörö lalara zamösana,+ 17 hewaʼae lö tebulö ia ba wamaduhuʼö sanandrösa khönia+ ba ifalua zi sökhi yaʼia daʼö ibeʼe khömi deu hegöi baŵa wamasi,+ ba iʼabusoiʼö ami faoma ö si möi fangomuso dödömi.”+ 18 Hewaʼae no lawaʼö zimane daʼö, hizaʼi tebai latenawa niha sato ba wameʼe khöra sumange.
19 Aefa daʼö, tohare niha Yahudi moroi ba Gandriokhia ba Ikoniu, lafaweʼe niha sato+ irege latebu kara Waulo ba lasöbi ia baero mbanua, lawalingagö no mate ia.+ 20 Hizaʼi me owulo ndra nifahaʼö ba zi fasuinia, mosindro ia ba möi ia yomo ba mbanua. Mahemolunia fao ira wofanö Mbaranaba numalö ba Derebe.+ 21 Me no laturiaigö duria somuso dödö ba mbanua andrö ba ato niha nitolora tobali nifahaʼö, mangawuli ira ba Lisitera, Ikoniu, ba Andriokhia. 22 Ba daʼö, laʼaroʼö dödö ndra nifahaʼö+ enaʼö lö tebulö ira ba wamati. Lamane, ”Lö tola löʼö oya tatörö wamakao weʼamöi ba Wamatörö Lowalangi.”+ 23 Baero daʼö, lafataro ndra satua sokubaloi ero sambu-sambua banua niha Keriso,+ mangandrö ba fuasö ira,+ latouʼö ba danga Yehowa* ndra satua sokubaloi andrö si no lafaduhusi tödö.
24 Aefa daʼö, mofanö ira latörö Wizidia ba larugi Wambilia,+ 25 me no aefa laturiaigö daromali ba Werege, mofanö ira ba Gatalia. 26 Moroi ba daʼö, moloyo ira numalö ba Gandriokhia. Ba daʼö zi oföna mböröta iforomaʼö waʼasökhi dödönia sebua* Lowalangi ba wamalua halöwöra si no laʼasiwai iadaʼa.+
27 Me no larugi ba owulo ira ba mbanua niha Keriso si so ba daʼö, latutunö hewisa me iʼogunaʼö ira Lowalangi ba wamalua hadia ia, ba hewisa me ibokai lala* ba soi böʼö enaʼö mamati ira.+ 28 Oya laʼogunaʼö ginötö wefao khö ndra nifahaʼö ba daʼö.