2 Moze
23 ”Böi dunö-dunö misa duria si lö atulö.+ Böi tolo niha si lö sökhi ba wameʼe famaduhuʼö faya enaʼö teʼala niha böʼö.+ 2 Böi oʼö niha sato wamalua si lö sökhi. Böi bilaʼö zatulö ba wameʼe famaduhuʼö ba woloʼö fehede niha sato. 3 Böi ebua zambuana dödöu ba wangetuʼö huku niha si numana.+
4 ”Na öʼila elungu zawi zi faʼudu khöu mazui kalidenia, fuli khönia gurifö daʼö.+ 5 Na öʼila galide zi faʼudu khöu no ilangögö ia noronia, böi osilömangilagö ba öröi manö. Tolo niha si faʼudu khömö andrö ba wameʼe tou noronia moroi ba hulu galide.+
6 ”Böi bilaʼö zatulö ba wangetuʼö huku ba niha si numana.+
7 ”Böi fao ba wamöbögö si lö duhu, ba böi bunu niha si lö sala hegöi niha satulö. Lö ufaduhuʼö wa atulö niha si lö sökhi andrö.*+
8 ”Böi tema zölö-sölö börö me balunö ibeʼe niha sangetuʼö huku ba tola ifaböʼöni wehedenia niha satulö.+
9 ”Böi mifakao niha si fatewu. No miʼila hewisa rasonia me tobali ami niha si fatewu, börö me no irai tobali ami niha si fatewu ba danö Miserai.+
10 ”Tola mitanö danömö zinanö ba nowi khömi ba mitema mbuania sagötö zi önö fakhe.+ 11 Hizaʼi ba ndröfi si fitu, böi mihalö nowi ba böi mitanö hadia ia. Gofu hadia ia zi tumbu ba nowi daʼö tobali balazo niha si numana, ba si törania utu ndruʼu zi manga. Simane daʼö göi mifalua ba kabu nagu khömi awö kabu zaitu.
12 ”Önö ngaluo tola mohalöwö ami, hizaʼi tebai mohalöwö ami ba ngaluo si fitu enaʼö molombase zawi, kalide, sawuyu hegöi niha si fatewu.+
13 ”Lö tola löʼö mifalua fefu niwaʼögu khömi.+ Böi mitötöi döi lowalangi tanö böʼö. Böi alua daʼö ba mbewemi.+
14 ”Ero röfi, tölu kali mifalua khögu gowasa.+ 15 Mifalua Gowasa Roti si Lö Mufaruka Ragi+ ba mbaŵa Abibi,*+ börö me ba mbaŵa daʼö aheta ami ba danö Miserai. Ba ginötö si no mutatugöi ba mbaŵa daʼö, miʼa roti si lö mufaruka ragi fitu hari waʼara simane si no uwaʼö. Tebai so zangondrasi yaʼo na lö noro dangania.+ 16 Mifalua Gowasa Wamasi* ba ginötö mibasi mbua nowimi si oföna.+ Mifalua göi Gowasa Fangowuloi* ba gangohorita ndröfi, ba ginötö miʼowuloi mbua nowi safuria khömi.+ 17 Tölu kali ba zi döfi, fefu ndra matua enaʼö laʼondrasi Lowalangi sindruhu sotöi Yehowa.+
18 ”Böi mibeʼe khögu ndro gurifö si tobali sumange hegöi gofu hadia ia zi no mufaruka ragi. Tebai muʼiröʼö ofeta mahemolu sihulö wongi dawö gurifö si tobali sumange khögu ba gowasa.
19 ”Miʼohe ba nomo Yehowa Lowalangimi+ ziaʼa mbua nowimi fondrege zi sökhi.
”Böi mirino nono nambi ba zusu ninania.+
20 ”Ufatenge dania malaʼika fönami ba wondrorogö yaʼami+ ba lala ba sanuturu lalami ba nahia si no uhenaigö.+ 21 Mifondrondrongo ba miʼoʼö niwaʼönia. Ba döigu wa tohare ia, andrö böi milawa ia börö me lö iʼefaʼö dania zalami.+ 22 Hizaʼi, na miʼoʼö niwaʼönia soroi ba dödö ba mifalua fefu niwaʼögu, tobali udugu dania nudumi, ba tobali solawa yaʼo zolawa yaʼami. 23 Fönami dania so malaʼikagu ba iʼohe ami ba mbanua niha Gamori, niha Kheti, niha Weresi, niha Ganaʼana, niha Hewi, ba niha Yebusi. Uhori ira fefu.+ 24 Böi miʼangalulu khö lowalangira mazui tedönisi dödömi ba wamosumange yaʼia, ba böi miʼoʼö zi toʼölö lafalua.+ Lö tola löʼö midudugö nadu hegöi ehomo niʼamoniʼö* khöra.+ 25 Ha Lowalangi Yehowa mifosumange.+ Ba ufahowuʼö ami dania, ubeʼe mbalazomi hegöi ömi idanö.+ Lö utehegö mofökhö ami.+ 26 Ba soimi dania, lö hadöi ira alawe sadudu ono mazui si lö ono.+ Anau nosomi ubeʼe.
27 ”Fatua lö nirugimi nahia daʼö, no tohöna ataʼu niha khögu.+ Ufawukaisi dania fefu soi sanuwö yaʼami. Kala fefu nudumi ba moloi ira ubeʼe.+ 28 Fatua lö nirugimi nahia daʼö, ataʼu dania nudumi ubeʼe.+ Ufofanö fönami+ niha Hewi, niha Ganaʼana, ba niha Kheti. 29 Tenga ha ba zi döfi waʼara ufofanö ira fönami enaʼö terorogö mbanua daʼö, ba lö monönö waʼoya gutu ndruʼu samakao yaʼami.+ 30 Uzara-zara wamofanö yaʼira fönami irege monönö waʼatomi ba miʼiagö fefu mbanua daʼö.+
31 ”Iʼotarai Nasi Soyo ubeʼe khömi nola danö irugi Nasi Mediterania,* ba iʼotarai danö si mate irugi Nungo Nidanö Oiferati.+ Ubeʼe ba dangami niha mbanua daʼö ba hasambalö mifofanö ira fönami.+ 32 Böi fawuʼu li ami khöra mazui khö lowalangira.+ 33 Tebai toröi ira ba danömi, ma dania ladönisi ami wamalua horö fönagu. Tola manö fao ami ba wamosumange lowalangira ba tobali fangalami daʼö.”+