Ba Mbanua Niha Keriso ba Galatia
1 Moroi khö zinenge sotöi Faulo, tenga moroi ba niha, hizaʼi moroi khö Yesu Keriso+ ba khö Namada Lowalangi,+ sanusugi Keriso moroi ba gotalua zi mate. 2 Yaʼo hegöi ira talifusöda si fao khögu, masura zura andre khömi, yaʼami banua niha Keriso si so ba Galatia.
3 Yamitema waʼasökhi dödö sebua* ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso. 4 No itehegö waʼaurinia Keriso ba wangeheta horöda,+ enaʼö tola iʼefaʼö ita moroi ba gulidanö si lö sökhi andre ba götö* daʼa+ moloʼö ohitö dödö Lowalangi, Amada.+ 5 Yatefolakhömi Lowalangi irugi zi lö aetu. Yaduhu.
6 Ahöli dödögu börö me alio sibai miʼerogö Lowalangi, sogaoni yaʼami börö waʼasökhi dödö sebua* khö Keriso, ba iadaʼa mifondrondrongo duria somuso dödö tanö böʼö.+ 7 Sindruhunia, lö hadöi turia si sökhi baero daʼa, hizaʼi so zangaʼasogö abula dödö khömi+ yaʼia me ifuyuʼö duria somuso dödö sanandrösa khö Keriso. 8 Na so malaʼika moroi ba zorugo mazui samösa moroi ba gotaluama samaʼema turia somuso dödö si faböʼö moroi ba zi no mafaʼema khömi, yagöna ia fangelifi. 9 Simane si no mawaʼö ba zilalö, ufuli uwaʼö khömi: Haniha zamaʼema turia somuso dödö si faböʼö moroi ba zi no mitema, yagöna ia fangelifi.
10 Sindruhunia, haniha niʼomusoiʼögu tödö? Lowalangi mazui niha? Na uʼodödögö wangomusoiʼö tödö niha, tenga sawuyu Keriso ndraʼo. 11 Yaʼami ira talifusö, omasido na miʼila wa turia somuso dödö nifaʼemagu khömi tenga moroi ba niha,+ 12 börö me sameʼe khögu ba samahaʼö yaʼo tenga niha. Yesu Keriso zamaʼeleʼö khögu.
13 No mirongo hewisa gamuatagu me faböbö ndraʼo ba agama Yahudi.+ Lö faʼahakhö dödögu wamakao ono mbanua Lowalangi ba uʼodödögö enaʼö tehori ira.+ 14 Ba agama Yahudi, abölö tohude ndraʼo ba zi fagölö döfi khögu hegöi si sambua soi khögu, ba abölö owölö-ölö ndraʼo wamalua si toʼölö lafalua ira tuagu.+ 15 Börö Lowalangi wa tefatumbuʼö ndraʼo, yaʼia zogaoni yaʼo ba waʼasökhi dödönia sebua,*+ ba omuso dödönia 16 wangogunaʼö yaʼo ba wanuriaigö turia somuso dödö ba soi misa,+ enaʼö aboto ba dödöra Nononia. Me tekaoni ndraʼo, lö uʼandrö mene-mene ba niha, 17 ba lö göi möido ba Yeruzalema ba wamalukhaisi ira sinenge si no oföna moroi khögu. Hizaʼi, möido ba mbanua Garabi, aefa daʼö ufulido ba Ndramaseko.+
18 Tölu fakhe aefa daʼö, möido ba Yeruzalema+ ba wamalukhaisi Kefa,*+ ba fao ndraʼaga 15 hari waʼara. 19 Lö falukhaga zinenge tanö böʼö baero Yakobo,+ akhi Zoʼaya yaʼita. 20 Sindruhu fefu nisuragu andre khömi. Möido ba hölu föna Lowalangi wa lö falimodo.
21 Aefa daʼö, mofanö ndraʼo ba mbanua Ziria hegöi ba Gilikia.+ 22 Hizaʼi, lö irai falukha ndraʼo khö ndra talifusö ba mbanua niha Keriso ba Yudea si hasara tödö khö Keriso. 23 Ha larongo-rongo ba niha: ”Iadaʼa, niha samakao yaʼita me mböröta+ ba samakiko famati andrö, ituriaigö duria somuso dödö.”+ 24 Andrö, ibörögö lafolakhömi Lowalangi börö ndraʼo.