Famaʼeleʼö Nitema Yohane
9 Ifoli dorofenia malaʼika si lima.+ Ba uʼila so ndröfi satoru moroi ba dalu mbanua. Tebeʼe khönia nono kusi ba wamokai baho sabakha sibai.*+ 2 Ibokai mbaho sabakha sibai* andrö ba möi baero zimbo saweʼe-weʼe, simane simbo gaotö sebua. Aitö luo faoma talu mbanua börö zimbo daʼö.+ 3 Kalua damo moroi ba zimbo andrö, aekhu tou ba gulidanö.+ Tebeʼe khöra kuaso ba gulidanö simane nibeʼe ba dongo. 4 Lö tetehegö khöra ba wamakiko sinanö, töla geu, mazui ngawalö zinanö ba gulidanö. Awai zi tola lafakao yaʼia daʼö niha si lö mubeʼe tandro ba gangangora moroi khö Lowalangi.+
5 Tetehegö ba damo wamakao niha andrö lima waŵa waʼara ba tebai labunu ira. Tefakao ira hulö nituo dongo.+ 6 Ba luo daʼö, laʼalui lala enaʼö mate ira ba lö lasöndra. Omasi ira mate hizaʼi tebai.
7 Tamo daʼö fakhili-khili ira kudo si no mufaʼanö ba wasuwöta.+ Ba högöra so zi hulö dakula anaʼa. Bawara simane bawa ndra matua. 8 Bura simane bu ndra alawe, ba iföra simane ifö zingo.+ 9 Ba dötöʼara so zi hulö mbaru siʼöli.* Ngafo-ngafo gafira hulö simane ruru gureta kudo si möi fasuwö.+ 10 Fatuo giʼora hulö giʼo dongo. Ba giʼora so waʼabölö ba wamakiko niha lima waŵa waʼara.+ 11 So razora yaʼia daʼö malaʼika sozago baho sabakha sibai.*+ Töi razo andrö ba li Heberaiʼo yaʼia daʼö Abado,* ba li Yunani Afolio.*
12 No numalö wamakao siföföna. Hiza! So dombua tö wamakao+ si lö ara tö alua.
13 Ifoli dorofenia+ malaʼika si önö.+ Ba urongo li moroi ba zi öfa watalinga naha wanunu sumange nifazökhi moroi ba ganaʼa+ si so föna Lowalangi. 14 Imane ba malaʼika si önö andrö, ”Efaʼö malaʼika si daöfa niböbö ba zinga nungo nidanö sebua andrö sotöi Oiferati.”+ 15 No tefaʼanö malaʼika si daöfa andrö ba ginötö, ngaluo, baŵa, hegöi döfi si no mutatugöi. Laʼefasi ira ba wamunu si sambua niʼotölu niha gulidanö.
16 So 200 zuta* waʼato zaradadu si fakudo. Daʼö nirongogu. 17 Daʼa niʼilagu sanandrösa ba kudo hegöi si fakudo khönia: Si fakudo yawania no ifake mbaru siʼöli soyo si hulö hola-hola galitö, sobalau ba saʼusö. Högö kudonia hulö högö zingo,+ moroi ba mbawania kalua galitö, simbo, hegöi balera. 18 Sambua niʼotölu niha nibunu ba gulidanö börö wamakao si tölu ngawalö yaʼia daʼö alitö, simbo, hegöi balera salua moroi ba mbawara. 19 Faʼabölö kudo daʼö ba mbawa so hegöi ba giʼonia. Iʼora hulö gulö si so högö. Iʼora andrö zamakao niha.
20 Hizaʼi, niha si lö mubunu ba wamakao andrö, lö lafalalini gera-erara ba zi no lafalua. Lö laböhöli wamosumange malaʼika si lö sökhi hegöi adu nifazökhi moroi ba ganaʼa, firö, tembaga, kara, eu, si lö mangila niha, si tebai mamondrongo mazui si tebai mofanö.+ 21 Lö lafalalini gera-erara moroi ba horöra yaʼia daʼö ba wamunu niha, amuata soʼamakhaita ba malaʼika si lö sökhi, amuata wohorö* hegöi fanagö.