Ba Niha Heberaiʼo
7 Melekhisede razo Salema, ere Lowalangi Fondrege Zalawa, falukha ia khö Gaberahamo sangawuli me no aefa ikalaisi razo-razo ba ifahowuʼö Gaberahamo,+ 2 andrö wa ibeʼe khönia Aberahamo zi sambua niʼofulu fefu hadia ia. Si oföna eluaha döinia ”Razo Waʼatulö”, aefa daʼö razo Salema eluahania ”Razo Waʼohahau Dödö”. 3 Lö muʼila haniha namania hegöi inania, ba lö hadöi sura sanutunö waö-waö ngaʼötönia, faʼatumbu mazui faʼamatenia. Hewaʼae simanö, tobali ia hulö Nono Lowalangi, irege lö tebulö ere ia irugi zi lö aetu.+
4 Faigi hawaʼatohude niha daʼa, irege ibeʼe khönia tuada Aberahamo zi sambua niʼofulu ahulua fondrege zi sökhi.+ 5 Moloʼö Oroisa Moze, ngaʼötö Lewi+ si tobali ere nifaretakö ba wangowuloi si sambua niʼofulu moroi ba soi andrö,+ yaʼia daʼö moroi khö ndra talifusöra, hewaʼae na ngaʼötö Gaberahamo soi daʼö. 6 Hizaʼi, niha daʼa tenga ngaʼötö Lewi, ba itema zi sambua niʼofulu moroi khö Gaberahamo, ba ifahowuʼö Gaberahamo sanema buʼusa li Lowalangi.+ 7 Tatu manö wa fao dödö niha na abölö ebua zamahowuʼö moroi ba nifahowuʼö. 8 Niha si tola mate dania zanema si sambua niʼofulu. Hizaʼi, no mufaduhuʼö wa sauri sa dania zi samösa andrö sanema si sambua niʼofulu.+ 9 Tola tawaʼö, Lewi sanema si sambua niʼofulu andrö no ibuʼa khö Gaberahamo zi sambua niʼofulu daʼö, 10 börö me ngaʼötö Gaberahamo ia, lö si tumbu ia nasa me falukha duania khö Melekhisede.+
11 Na tesöndra wamoʼahonoa ba waʼaʼere nono Lewi,+ börö me terahugö bakha ba Goroisa Moze gamakhoita nibeʼe ba soi daʼö, hana wa so nasa gere tanö böʼö simane Melekhisede,+ tenga simane Aʼaroni? 12 Börö me tebulö gamakhoita sanandrösa ba waʼaʼere, andrö wa tebulö göi Goroisa Moze andrö.+ 13 Niha nitutunö andre moroi ba mado tanö böʼö, ba lö irai so niha moroi ba mado daʼö zohalöwö ba naha wanunu sumange.+ 14 Sindruhu-ndruhu moroi ba mado Yehuda+ iʼotarai Soʼaya yaʼita, hizaʼi lö irai iwaʼö Moze wa so gere moroi ba mado daʼö.
15 Abölö oroma saʼae daʼa me so gere tanö böʼö+ simane Melekhisede,+ 16 si tobali ere, tenga börö me si otarai mado nitatugöi simane niwaʼö ba goroisa, hizaʼi börö me so waʼabölö sameʼe khönia faʼauri si tebai tekiko.+ 17 So zamaduhuʼö sanandrösa khönia, ”Ere ndraʼugö irugi zi lö aetu simane Melekhisede.”+
18 Laheta goroisa föna andrö börö me moʼamböta ba lö tefaudu.+ 19 Tebai ifoʼahonoa fefu Oroisa Moze andrö,+ hizaʼi so sambua wanötöna si bohou sabölö sökhi,+ si tola mangahatöʼö yaʼita khö Lowalangi, daʼö zamoʼahonoa.+ 20 So göi hölu niwaʼö sanandrösa khönia 21 (börö me sindruhu, so zi tobali ere si lö mubeʼe ba hölu, hizaʼi niha daʼa no tobali ia ere börö hölu niwaʼö Lowalangi sanandrösa khönia yaʼia daʼö, ”No möi ba hölu Yehowa,* ba lö tebulö wangera-ngerania,* ’Ere ndraʼugö irugi zi lö aetu’”),+ 22 irege Yesu zi tobali weʼe-weʼe dödö ba mbuʼusa li sabölö sökhi.+ 23 Baero daʼö, ato niha si tobali ere ba wanohugö halöwö,+ börö me no mate gere siföföna ba tebai saʼae mohalöwö ira, 24 ba lö hadöi sanohugö mazui fangali Yesu börö me auri ia irugi zi lö aetu.+ 25 Daʼö mbörö wa sindruhu-ndruhu tola iʼorifi niha sangondrasi Lowalangi ba döinia, börö me auri ia irugi zi lö aetu, andrö wa tola ifaʼema gangandröwara.+
26 Moguna khöda gere sebua simane daʼö, si lö faröi, si lö sala, si lö raʼiö,+ tefabali moroi ba niha sebua horö, ba teʼalawaʼö ba mbanua si yawa.+ 27 Tenga simane ere tanö böʼö, lö moguna ibeʼe zumange nitunu ero maʼökhö,+ si oföna ba horönia samösa, aefa daʼö ba horö soinia,+ börö me no ibeʼe waʼaurinia tobali sumange sakali irugi zi lö aetu.+ 28 Ere sebua si no lafataro moloʼö Oroisa Moze yaʼia daʼö niha si lö moʼahonoa,+ hizaʼi nifataro moloʼö hölu+ si no so fatua lö teʼasogö Goroisa Moze, yaʼia daʼö Ono andrö si no moʼahonoa+ irugi zi lö aetu.