Sura Yohane Siföföna
3 Mifaigi hawaʼebua waʼomasi Nama khöda+ irege tobali ita ono Lowalangi!+ Sindruhu wa ononia ita, ba lö aboto ba dödö niha gulidanö ita+ börö me lö aboto ba dödöra Lowalangi.+ 2 Yaʼami ira talifusö niʼomasiʼö, ono Lowalangi ita iadaʼa.+ Hizaʼi, lö taʼila hewisa ita dania.+ Niʼilada, tobali ita simane Lowalangi na iforomaʼö ia khöda börö me sindruhu-ndruhu taʼila ia dania. 3 Dozi sanötöna khönia lö tola löʼö iʼamoniʼö ia,+ börö me yaʼia andrö niʼamoniʼö.
4 Dozi samazökhi horö no isawö goroisa, börö me horö wanawö oroisa andrö. 5 Aboto göi ba dödömi wa tohare ia ba wangefaʼö horöda,+ ba lö nifazökhinia horö. 6 Dozi si hasara tödö khö Yesu lö ifalua horö,+ ba niha si lö mamöhöli wamalua horö lö laʼila ia ba lö aboto ba dödöra. 7 He yaʼami iraono, böi mitehegö so zamaelungu yaʼami. Samalua satulö daʼö zatulö, simane yaʼia andrö si no atulö. 8 Niha si lö mamöhöli wamalua horö daʼö nono Gafökha, börö me iʼotarai mböröta ifalua horö Afökha.+ Andrö wa tohare Nono Lowalangi ba wamakiko halöwö Gafökha.+
9 Lö lafalua horö ono Lowalangi,+ börö me eheha Lowalangi zanuturu lalara. Tebai lafalua horö börö me ono Lowalangi ira.+ 10 Daʼa gamaehuta nono Lowalangi hegöi ono Gafökha: Dozi samöhöli wamalua satulö, tenga ono Lowalangi ira, simanö göi niha si lö mangomasiʼö talifusönia.+ 11 Daʼa goroisa si no tarongo iʼotarai wamobörö, yaʼia daʼö enaʼö faoma taʼomasiʼö nawöda.+ 12 Tenga simane Kaʼino, ono Gafökha samunu akhinia.+ Hana wa ibunu nakhinia? Börö me lö sökhi gamuatania,+ hizaʼi sökhi gamuata nakhinia.+
13 Böi tokea ami ira talifusö na fatiu dödö niha gulidanö khömi.+ 14 Aboto ba dödöda wa hulö zi mate ita me mböröta, iadaʼa auri ita+ börö me taʼomasiʼö ndra talifusöda.+ Hulö zi no mate niha si lö mangomasiʼö talifusönia.+ 15 Dozi si fatiu tödö khö dalifusönia no samunu niha daʼö,+ ba aboto ba dödömi wa lö isöndra waʼauri si lö aetu samunu niha.+ 16 Aboto ba dödöda waʼomasi börö me no itehegö waʼaurinia* Yesu Keriso salahida,+ ba tatehegö göi waʼaurida* salahi ndra talifusöda.+ 17 Na so niha soʼokhöta ba iʼila wa moʼamböta dalifusönia, hizaʼi lö ihakhösi tödö, hewisa wa tola iʼomasiʼö Lowalangi?+ 18 He yaʼami iraono, taʼomasiʼö nawöda tenga ha ba wehede mazui ba mbewe manö,+ hizaʼi moroi ba gamuata+ soroi ba dödö.+
19 Na tafalua daʼö, aboto ba dödöda wa faʼawö ita ba zindruhu, ba tafaduhuʼö ba dödöda wa iʼomasiʼö ita Lowalangi, 20 hewaʼae itaria itegu ita tödöda ba ngawalö hadia ia, börö me abölö ebua Lowalangi moroi ba dödöda ba iʼila ngawalö hadia ia.+ 21 Yaʼami ira talifusö niʼomasiʼö, na lö itegu ita tödöda, lö si tobali taha-tahada ba wahuhuosa khö Lowalangi.+ 22 Gofu hadia niʼandröda khönia hasambalö tatema,+ börö me taʼoʼö goroisania ba tafalua zomasi ia. 23 Yaʼe goroisania: lö tola löʼö mamati ita ba döi Nononia Yesu Keriso+ ba taʼomasiʼö nawöda+ simane si no iʼoroiʼö. 24 Baero daʼö, niha soloʼö oroisania lö tebulö hasara dödöra khönia, ba hasara göi dödönia khöra.+ Ba waʼabölö geheha niʼamoniʼö nibeʼenia khöda, ba daʼö taʼila wa lö tebulö hasara dödönia khöda.+