Dua Tesalonika

1 Moroi khö Waulo, Siliwano,* ba Timoteo,+ nifaʼema ba mbanua niha Keriso si so ba Desalonika si ha sambua khö Lowalangi, Amada, ba khö Zoʼaya yaʼita Yesu Keriso.

2 Yamitema waʼasökhi dödö sebua* ba faʼohahau dödö moroi khö Namada Lowalangi, ba moroi khö Zoʼaya Yesu Keriso.

3 Yaʼami ira talifusö, moʼömö ndraʼaga ba wangandrö saohagölö khö Lowalangi salahimi. No sinangea daʼa, börö me itugu aro wamatimi ba tedou waʼomasimi khö nawömi zamösana.+ 4 Andrö wa masuno ami+ ba mbanua niha Keriso misa khö Lowalangi, börö me anau gölömi ba mamati ami ba wanaögö ngawalö wamakao hegöi abula dödö.+ 5 Daʼö dandra wa atulö gangetula Lowalangi, irege tefaduhuʼö wa sinangea ami ba Wamatörö Lowalangi, börö daʼö wa tefakao ami.+

6 Satulö sa Lowalangi andrö, isulöni wamakao ba niha samakao yaʼami.+ 7 Hizaʼi, yaʼami sanaögö famakao, fao ami khöma ba wanema fangefa na iforomaʼö waʼabölönia Soʼaya Yesu+ ba zorugo si fao ira malaʼika sabölö+ 8 awö hola-hola galitö, ba wolau balö ba niha si lö faʼaboto ba dödö khö Lowalangi hegöi si lö moloʼö turia somuso dödö sanandrösa khö Zoʼaya yaʼita Yesu.+ 9 Göna ira faʼatekiko sagötö faʼara,+ laheta ira föna Zoʼaya hegöi ba lakhömi waʼabölönia andrö 10 na tohare ia ba wanema lakhömi si fao niha niʼamoniʼö andrö khönia. Dozi samati khönia simane yaʼami lasuno ia si fao faʼahöli-höli dödö, börö me faduhu dödömi ba duria niʼombakhaʼöma.

11 Andrö, lö maböhöli wangandrö salahimi enaʼö sinangea ami föna Lowalangima ba wogaoninia andrö,+ ba börö waʼabölönia ifoʼahonoa wamalua fefu zi sökhi somasi ia hegöi nifaluami börö wamati, 12 enaʼö tefolakhömi döi Zoʼaya yaʼita Yesu börö ami, ba tefolakhömi ami börö me hasara dödömi khönia moloʼö faʼasökhi dödö sebua* moroi khö Lowalangi hegöi khö Zoʼaya yaʼita Yesu Keriso.