Famaʼeleʼö Nitema Yohane
11 Aefa daʼö, tebeʼe khögu döla zukhu si hulö ziʼo ba wanuʼa.+ Imane, ”Ofanö, suʼa naha niʼamoniʼö ba gosali Lowalangi awö naha wanunu sumange. Ba erai niha samosumange Lowalangi ba daʼö. 2 Hizaʼi, böi suʼa golayama tanö baero naha niʼamoniʼö ba gosali andrö. Röi manö daʼö, börö me no tebeʼe ia ba soi böʼö. Lahundra-hundra dania mbanua niʼamoniʼö+ ba zi 42 waŵa waʼara.+ 3 Ufatenge darua zamaduhuʼö khögu weʼamöi mamaʼeleʼö sagötö zi 1.260 hari ba laʼonukha goni.” 4 Yaʼira niʼamaedolagö zi dua ngaʼeu töla zaitu+ ba si dombua naha wandru.+ So ira föna Zoʼaya samatörö ulidanö.+
5 Na so nudu sedöna mamalua si lö sökhi khöra, kalua galitö moroi ba mbawara ba akhozi nudura andrö. Gofu haniha zamalua si lö sökhi khöra, hasambalö latörö waʼamate simane daʼö. 6 Tebeʼe khöra kuaso ba wondruhö banua si yawa+ enaʼö lö aekhu deu+ sagötö mamaʼeleʼö ira. So khöra kuaso ba wombaliʼö idanö tobali do,+ ba tola laʼasogö ngawalö wamakao ba gulidanö, gofu hawaʼara zomasi ira.
7 Me no aefa lafaʼema goroisa andrö, isuwö ira urifö samuʼi si otarai mbaho sabakha sibai,* ikalaisi ba ibunu ira.+ 8 Ba laröi manö gamatelara ba lala si numalö ba mbanua sebua ba nahia zi mate Soʼaya ba döla geu. Banua andrö laʼamaedolagö ia Sodoma ba Miserai. 9 Ba laʼila gamatelara niha moroi ba ngawalö soi, mado, li hegöi banua, tölu hari a matonga waʼara.+ Lö latehe ira niha daʼö na mukoʼo gamatelara ba lewatö. 10 Omuso dödö niha gulidanö ba faoma mamuala ira khö nawöra, börö me no tefakao ira ba zilalö me larongo duria nifaʼema zamaʼeleʼö si darua andrö.
11 Me no irugi tölu hari a matonga, isusugi zamaʼeleʼö si darua andrö Lowalangi.+ Me mozizio ira, agataʼu niha sangila yaʼira. 12 Aefa daʼö, larongo li sebua moroi ba zorugo imane khöra, ”Miʼaine ba daʼa.” Ba tefazawa ira miyawa ba zorugo, fao ira ba lawuo, ba zanehe si faʼudu khöra. 13 Ba ginötö daʼö alua ndruru danö sabölö-bölö. Lua-luania, tekiko zi sambua niʼofulu banua andrö ba 7.000 niha zi mate. Agataʼu danö böʼö ba lafolakhömi Lowalangi samatörö sorugo.
14 No numalö wamakao si mendrua.+ Lö ara tö tohare wamakao si medölu.
15 Ifoli dorofenia malaʼika si fitu.+ Aefa daʼö, terongo li segebua ba dalu mbanua imane, ”Famatörö ba gulidanö andre, no tobali Famatörö Lowalangida+ hegöi Keriso+ andrö khönia. Ba mamatörö ia tobali razo irugi zi lö aetu.”+
16 Aefa daʼö, ira satua sokubaloi si 24+ si dadao ba dadaomara föna Lowalangi, latuhi danö ba wangalulu khönia. 17 Lamane, ”Maʼandrö saohagölö khöu Lowalangima Yehowa* Fondrege Zabölö, si so me mböröta ba si lö tebulö so,+ börö me no öʼogunaʼö waʼabölömö sahöli-höli dödö ba no öbörögö wamatörö tobali razo.+ 18 Aukhu dödö soi niha ba gulidanö. Mofönu ndraʼugö khöra, ba no irugi inötö khöu ba wanguhuku niha si no mate ba öbeʼe luo+ ba niha niʼamoniʼö, ira samaʼeleʼö khöu,+ hegöi ba niha samosumange töimö, he niha si toʼölö mazui niha si tehöngö. Ba ginötö daʼö, öfakiko göi niha samakiko ulidanö.”+
19 Aefa daʼö, teboka naha niʼamoniʼö ba gosali Lowalangi ba zorugo, ba uʼila dawöla amabuʼula li ba naha niʼamoniʼö andrö.+ Ba terongo weʼugu-ugu mbanua, awö li soya sibai, simanö göi gari mbanua, duru danö, hegöi teu esi sabölö-bölö.