Famaʼeleʼö Nitema Yohane
18 Aefa daʼö, uʼila malaʼika böʼö si möi mitou moroi ba zorugo. So khönia kuaso sebua, ba mohaga gulidanö börö lakhöminia. 2 Muʼao malaʼika andrö imane, ”No adudu! No adudu Mbabilona Sebua!+ No tobali ia naha malaʼika si lö sökhi hegöi ngawalö wofo si raʼiö ba si fatuwu ba niha. Tobali ia naha wamini malaʼika si lö sökhi!+ 3 Börö me teʼala fefu soi ba nagunia andrö, yaʼia daʼö fangisönia ba wamalua fohorö.*+ Mohorö khönia fefu razo ba gulidanö+ ba kayo fefu zogale ba gulidanö börö gama-gama sebua böli nihönania si lö faʼaila.”
4 Ba urongo li böʼö moroi ba mbanua si yawa imane, ”Miheta ami khönia yaʼami banuagu,+ faböi fao ami ba horönia ba falögöna ami ösa famakaonia andrö.+ 5 No falawu horönia irugi mbanua si yawa,+ ba itörö tödö Lowalangi fefu zi lö sökhi nifaluania.+ 6 Misulöni khönia waʼalösökhi si no ifalua ba niha böʼö,+ mifodua winaeta wanulöni khönia.+ Mifabadugö khönia dua kali faʼoya+ nösi mako+ si no ifaruka. 7 Börö me fayawa sibai ia ba omuso-muso dödönia ba waʼakayonia si lö faʼaila, andrö mubeʼe khönia wangabu dödö ba famakao. Imane tödönia, ’Yaʼodo andre ratu, tenga lakha mbanua, ba lö irai uʼila wangabu dödö.’+ 8 Daʼö mbörö wa göna ia famakao ba zi sahari, yaʼia daʼö faʼamate, fangabu dödö, ba faʼolofo. Latunu ia,+ börö me sabölö Lowalangi Yehowa,* sanguhuku yaʼia andrö.+
9 ”Laʼeʼesi ia ira razo ba gulidanö ba labözi-bözi dötöʼara börö waʼabu dödö me laʼila zimbo galitö fanununia. No irai mohorö* ira khönia ba fao ira ba waʼomuso dödö ba waʼakayonia. 10 Mozizio ira ba zaröu börö me ataʼu ira na göna khöra wanguhuku simane daʼö. Lamane, ’Alai ndraʼugö! Alai ndraʼugö banua sebua,+ yaʼugö Babilona, banua sabölö. Ha ba zi sambua za, no tehuku ndraʼugö!’
11 ”Abu dödö ndra sogale ba gulidanö ba laʼeʼesi ia, börö me lö hadöi saʼae sowöli amawaöra: 12 fefu ganaʼa, firö, feremata, mutiara, nukha si sökhi, nukha si ungu laʼa-laʼa,* sutra, nukha soyo si hola-hola; gama-gama moroi ba geu somuhua, ifö gaza, eu sebua böli, tembaga, siʼöli, ba mara-mara; 13 simanö göi kuli mani, famasa, nitunu somuhua, fanikha somuhua, kumöyö, agu, fanikha zaitu, hamo darigu si sökhi, gandru, sawi, biri-biri, kudo, fadati, sawuyu, hegöi niha. 14 Lö hadöi saʼae bua zinanö si sökhi somasi dödöu. No aheta khöu ngawalö gö sami hegöi gama-gama sebua böli, tebai saʼae ösöndra ia.
15 ”Kayo fefu zogale andrö börö ia. Mozizio ira ba zaröu börö me ataʼu ira na göna khöra wanguhuku simane daʼö. Abu dödöra ba laʼeʼesi ia 16 lamane, ’Alai ndraʼugö! Alai ndraʼugö banua sebua! No öfake nukha si sökhi me föna, nukha si ungu laʼa-laʼa* awö nukha soyo si hola-hola, ba no göi öfake gama-gama sebua böli moroi ba ganaʼa, feremata, hegöi mutiara.+ 17 Hizaʼi, ha ba zi sambua za, taya fefu ganaʼamö soya andrö!’
”Mozizio ba zaröu fefu kafite göfa, sanörö köfa, sohalöwö ba göfa, ba fefu niha sangalui soguna khöra ba nasi. 18 Ba me laʼila zimbo galitö fanununia lamane, ’Hadia so mbanua böʼö simane banua sebua andrö?’ 19 Lahawui högöra faoma gawu-gawu. Abu dödöra ba mege-ege ira lamane, ’Alai ndraʼugö! Alai ndraʼugö banua sebua si kayo, samoʼanaʼa fefu sokhö köfa. Ha ba zi sambua za no tekiko ndraʼugö!’+
20 ”Miʼomusoiʼö dödömi yaʼami si so ba zorugo,+ hegöi niha niʼamoniʼö,+ ira sinenge awö ndra samaʼeleʼö, me no ihuku ira Lowalangi börö ami!”+
21 Aefa daʼö so malaʼika sabölö, ifazawa gara sebua ba ifazaumba ba nasi. Imane, ”Simanö na mutiboʼö Mbabilona, banua sebua andrö ba waʼalio. Lö saʼae oroma ia dania.+ 22 Lö hadöi saʼae sanunö ba daʼö ba samoli harafa, samoli ngawalö wakake ba wanunö, samoli surune mazui torofe. Lö tesöndra duka sohalöwö, ba lö hadöi terongo li gara fogili. 23 Lö hadöi saʼae haga wandru, lö hadöi li marafule hegöi niʼowalu. Ira sogale andrö khöu yaʼira niha segebua faka ba gulidanö, ba tefaelungu fefu soi börö gamuatamö soʼamakhaita ba wakelemusa.+ 24 Atulö, no musöndra ba daʼö ndro niha niʼamoniʼö+ hegöi ira samaʼeleʼö, ba fefu niha nibubunu ba gulidanö.”+