Nisura Luka
17 Imane khö ndra nifahaʼönia, ”So manö dania zamobörö fangala. Hizaʼi, alai niha samobörö fangala andrö! 2 Abölö sökhi latawi ba mbaginia gara wogili, aefa daʼö latiboʼö ia ba nasi moroi na tobali ia fangala fazamösa moroi ba niha side-ide andre.+ 3 Miʼangelama. Na fasala dalifusöu, tegu ia.+ Na ifalalini gera-erania, efaʼö zalania.+ 4 Hewaʼae na fitu kali fasala ia khöu ba zi maʼökhö, ba fitu kali iwaʼö khöu, ’Bologö dödöu,’ efaʼö zalania.”+
5 Aefa daʼö lamane ira sinenge khö Yesu, ”Douʼö wamatima.”+ 6 Imane Yesu, ”Na so khömi wamati simane faʼebua hunö sesawi, tola miwaʼö ba döla geu* andre, ’Yaʼadeha ndraʼugö ba tetaruʼö ba nasi!’ Ba iʼoʼö niwaʼömi töla geu andrö.+
7 ”Hewisa na so zohalöwö khömi samaku laza mazui sanaro urifö? Na mangawuli ia moroi ba kabu, hadia mimane khönia, ’Aliokö, aine ba daʼa, manga ita ba meza’? 8 Tatu mimane wangumaʼö, ’Henaigö gögu bongi andre. Tukari nukhamö, beʼe yawa gögu ba meza ba baloi irege awai manga ndraʼo. Aefa daʼö, awena tola manga ndraʼugö.’ 9 Lö miʼandrö saohagölö khö zawuyu andrö börö me no sinangea halöwönia daʼö. 10 Tobali, na no mifalua fefu halöwömi, mimane, ’Sawuyu si lö guna ndraʼaga. Mafalua zinangea halöwöma.’”+
11 Ba wofanö Yesu numalö ba Yeruzalema, itörö nola danö Zamaria faoma Galilaia. 12 Me irugi zi sambua banua, so dafulu ndra matua si göna bou auri sangila yaʼia. Mosindro ira moroi ba zaröu.+ 13 Muʼao ira, ”He Yesu, he Samahaʼö, hakhösi tödö ndraʼaga!” 14 Me iʼila ira Yesu, imane khöra, ”Miʼofanö, miforomaʼö ami khö ndra ere.”+ Ba wofanöra ba lala, lö saʼae raʼiö ira.+ 15 Samösa moroi ba gotaluara, me iʼila wa no döhö ia, ifuli ia furi ba wamolakhömi Lowalangi. 16 Ituhi danö föna Yesu ba wangandrö saohagölö. Yaʼia andrö niha Zamaria.+ 17 Imane Yesu, ”Hadia tenga dafulu ami zi no döhö? Ba hezo zi dasiwa? 18 Hana wa lö lafuli ira furi ba wamolakhömi Lowalangi? Hana wa moroi ba soi böʼö zamalua daʼa?” 19 Imane khönia Yesu, ”Faoso ba angawuli, no ifadöhö ndraʼugö famatimö.”+
20 Me manofu khönia ndra Farizaiʼo hawaʼara tohare Wamatörö Lowalangi,+ imane khöra, ”Lö oroma sibai waʼatohare Wamatörö Lowalangi. 21 Lö göi lamane niha, ’Hiza, so ba daʼa!’ mazui, ’Hiza, so ba daʼö!’ Börö me ba gotaluami no so Wamatörö Lowalangi.”+
22 Aefa daʼö, imane khö ndra nifahaʼönia, ”Ba ginötönia dania, mitötöna enaʼö miʼila ngaluo waʼatohare Nono niha, hizaʼi lö miʼila. 23 Ato zangumaʼö, ’Hiza, so ia ba daʼö!’ mazui, ’Hiza, so ia ba daʼa!’ Böi miʼaeʼe mazui miʼoʼö ira.+ 24 Börö me hulö gari mbanua si haga moroi ba mbalö mbanua faföfö, simane daʼö Nono niha+ ba ginötönia.+ 25 Hizaʼi, hasambalö oya itörö wamakao ba latimbagö ia niha ba götö daʼa.+ 26 Aefa daʼö, inötö waʼatohare Nono niha+ andrö hulö simane ba götö Noakhi:+ 27 manga-manga niha ba mamadu-madu, mangowalu ndra matua ba labeʼe nihalö ndra alawe, irege möi bakha ba nowo+ Noakhi ba alua wa Anönö Danö Idanö ba wangohori niha fefu.+ 28 Simanö göi me götö Loti:+ manga niha, mamadu, mowöli, mamawa, mananö, ba mamazökhi omo. 29 Hizaʼi, ba ginötö iheta ia Loti moroi ba Zodoma, atoru galitö faoma balera moroi ba dalu mbanua ba tehori fefu ndra niha daʼö.+ 30 Daʼö göi dania zalua ba ginötö iforomaʼö kuasonia Ono niha.+
31 ”Na luo daʼö, niha si so ba dete nomo* böi möi ia tou ba wangai gama-gamania bakha ba nomo. Simanö göi niha si so ba kabu, böi mangawuli ia wangai gama-gamania. 32 Törö tödöu woʼomo Loti.+ 33 Haniha zangodödögö wolumöʼö faʼaurinia,* daʼö zi mate. Hizaʼi, haniha zi mate, daʼö zanöndra fangorifi.+ 34 Ufatunö khömi, ba mbongi daʼö dania, na so darua niha ba warate, laʼohe zi samösa ba laröi zi samösa.+ 35 Na so darua ndra alawe sanutu gandru ba lösu si fagölö, laʼohe zi samösa ba laröi zi samösa.” 36* —— 37 Manofu ndra nifahaʼönia, ”He Soʼaya, hezo alua dania daʼö?” Itema lira Yesu, ”Hezo so gamatela, ba daʼö owulo moyo.”+