Dua Korindro
1 Moroi khö Waulo, sinenge Keriso Yesu moloʼö ohitö dödö Lowalangi, ba moroi khö dalifusöda Timoteo,+ nifaʼema ba mbanua niha Keriso khö Lowalangi ba Gorindro ba fefu niha niʼamoniʼö ba Nakhaya:+
2 Yamitema waʼasökhi dödö sebua* ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso.
3 Nisuno Lowalangi, Ama Zoʼaya yaʼita Yesu Keriso,+ Ama safönu faʼahakhö dödö,+ ba Lowalangi wondrara dödö.+ 4 Yaʼia zondrara tödöda* ba ngawalö wamakao* nitaögöda+ irege tola tabeʼe göi wondrara dödö+ si no tasöndra moroi khö Lowalangi ba niha si göna famakao.+ 5 Simane yaʼita si no oya manaögö fanandraigö börö Keriso,+ fahöna göi tatema wondrara dödö ba khö Keriso. 6 Matörö wamakao* enaʼö terara dödömi ba teʼorifi ami. Börö wondrara tödömi wa terara dödöma, ba daʼö zanolo yaʼami enaʼö tola mitaögö ngawalö wamakao simane nitaögöma. 7 No aro wanötönama ba khömi börö me maʼila wa fao ami ba wanaögö famakao, ba fao göi ami ba wanema fondrara dödö.+
8 Yaʼami ira talifusö, omasiga enaʼö miʼila wamakao nitöröma ba Provinsi Asia.+ Abua sibai wanandraigö nitöröma na ha yaʼaga samösa zanaögö irege mawaʼö tödöma wa si mate saʼae ndraʼaga.+ 9 Hulö no laʼetuʼö hukuma faʼamate khöma. Daʼö mbörö wa lö maʼodaligö waʼabölöma samösa, hizaʼi maʼodaligö Lowalangi+ si tola manusugi niha si no mate. 10 No iʼefaʼö ndraʼaga ba waʼamate, ba iʼefaʼö nasa ndraʼaga dania, ba faduhu dödöma wa lö iböhöli wangefaʼö yaʼaga.+ 11 Tola göi mitologa ba wangandrö salahima,+ börö me ifondrondrongo Lowalangi wangandrö niha sato. Na mifalua daʼö, ato zangandrö saohagölö börö wanolo si no matema.+
12 Omuso sibai dödöma börö me tödöma side-ide zamaduhuʼö wa no soroi ba dödöma matörö lala nifahaʼö Lowalangi ba maʼamoniʼö waʼaurima ba gulidanö andre töra-töra ba gotaluami, ba maʼodaligö waʼasökhi dödö sebua* moroi khö Lowalangi tenga faʼatua-tua niha.+ 13 Awai nisurama khömi ha si tola mibaso* ba saboto ba dödömi, ba utötöna enaʼö aboto ba dödömi fefu daʼa.* 14 So ösa ba gotaluami zi no aboto ba dödö wa yaʼaga andre mbörö wa omuso dödömi, simane yaʼami dania miʼomusoiʼö dödöma ba luo Zoʼaya yaʼita Yesu.
15 Si fao faʼafaduhu dödö simanö, no uʼera-era me luo daʼö weʼamöi khömi ba zi mendrua kali, enaʼö omuso dödömi sakali tö. 16 Me luo daʼö, omasido ufalukhaisi ami na möido ba Makedonia, aefa daʼö ufalukhaisi zui ami moroi ba Makedonia, ba awena möi ami mifasao ndraʼo irugi dalu lala ba wofanögu ba Yudea.+ 17 Hadia ha asala uʼera-era manö? Hadia ufalua manö ia ba zomasi dödögu irege uwaʼö ”yaʼia” aefa daʼö ”tenga”? 18 Simane Lowalangi si tola mufaduhusi tödö, simane daʼö göi wehedema. Lö mawaʼö ”yaʼia” aefa daʼö ”tenga”. 19 Baero daʼö, Ono Lowalangi, yaʼia daʼö Yesu Keriso si no maturiaigö khömi, yaʼo, Siliwano* ba Timoteo,+ lö irai iwaʼö khömi ”yaʼia” aefa daʼö ”tenga”. Na iwaʼö ”yaʼia”, hasambalö wa ”yaʼia”. 20 Gofu hawaʼoya zi no ifabuʼu Lowalangi, ba no ”yaʼia” fefu ba khönia.+ Börö ia göi wa tola tawaʼö ”Yaduhu” khö Lowalangi+ irege tafolakhömi ia. 21 Hizaʼi, Lowalangi zamaduhuʼö wa yaʼaga hegöi yaʼami tobali okhöta Keriso ba samayoini yaʼita.+ 22 No göi ifotandro ita Lowalangi,+ ba no ibeʼe khöda dandra* ba ngawalö zalua ba zi so miföna, yaʼia daʼö eheha niʼamoniʼö+ si so ba dödöda.
23 Möido ba hölu salahi nosogu samösa, ba Lowalangi zamaduhuʼö wa lö si möi ndraʼo ba Gorindro börö me lö omasido na monönö waʼabu dödömi. 24 Tenga yaʼaga zamatörö famatimi,+ hizaʼi si falulu fohalöwö khömi ba waʼomuso dödö. Aro ami börö wamatimi samösa.