Sara Ngaʼötö

15 Ba lö iböhöli Dawido wamazökhi omo khönia ba Mbanua Dawido. Ihenaigö naha Dawöla Lowalangi sindruhu ba no ifazökhi nose naha Dawöla andrö.+ 2 Me luo daʼö imane Dawido, ”Tebai so zamazawa Tawöla Lowalangi sindruhu baero niha Lewi, börö me yaʼira nifili Yehowa ba wamazawa Tawöla Yehowa ba sangai halöwö khönia sagötö faʼara.”+ 3 Ba iʼowuloi fefu ndraono Gizaraʼeli andrö Dawido ba Yeruzalema ba wolohe Tawöla Yehowa ba nahia si no ihenaigö.+

4 Iʼowuloi göi ngaʼötö Gaʼaroni+ hegöi niha Lewi:+ 5 moroi ba ngaʼötö Gahati, Urieli zondröniaʼö ba 120 ndra talifusönia; 6 moroi ba ngaʼötö Merari, Asaya+ zondröniaʼö ba 220 ndra talifusönia; 7 moroi ba ngaʼötö Geresomo, Yoeli+ zondröniaʼö ba 130 ndra talifusönia; 8 moroi ba ngaʼötö Gelisafa,+ Semaya zondröniaʼö ba 200 ndra talifusönia; 9 moroi ba ngaʼötö Heberona, Elieli zondröniaʼö ba 80 ndra talifusönia; 10 ba moroi ba ngaʼötö Gusieli,+ Aminadabi zondröniaʼö ba 112 ndra talifusönia. 11 Lö ara, ikaoni Gere Sadoki+ Razo Dawido hegöi Ere Abiataro+ awö niha Lewi, yaʼia daʼö Urieli, Asaya, Yoeli, Semaya, Elieli, ba Aminadabi. 12 Imane khöra, ”Yaʼami zondröniaʼö ba nösi nomo zatua ira matua niha Lewi. Miʼamoniʼö ami fao khö ndra talifusömi, ba miʼohe Dawöla Yehowa Lowalangi ndraono Gizaraʼeli ba nahia si no uhenaigö. 13 Me luo daʼö, tenga yaʼami zolohe Tawöla.+ Andrö wa mofönu khöda Lowalangida Yehowa+ börö me lö taʼoʼö gamakhoita si no muhonogöi.”+ 14 Börö daʼö, mofanö ndra ere hegöi niha Lewi ba wangamoniʼö yaʼira, enaʼö tola laʼohe Dawöla Yehowa Lowalangi ndraono Gizaraʼeli.

15 Ba lafazawa Dawöla Lowalangi sindruhu andrö ira niha Lewi, labeʼe ba galisira fabaya bea-beania+ simane sibai niwaʼö Yehowa khö Moze. 16 Ifatenge ndra sondröniaʼö niha Lewi andrö Dawido ba wamataro ira talifusöra, yaʼia daʼö ira sanunö, enaʼö manunö ira si fao faʼowua-wua dödö ba laʼogunaʼö fakake zinunö nifosinali, harafa,+ ba siʼöli nifaondra wamözi.*+

17 Lafataro Hemano+ ono Yoeli andrö ira niha Lewi, simanö göi Gasafo+ ono Mberekhia moroi ba gotalua ndra talifusönia. Ba moroi ba ngaʼötö Merari talifusöra, lafataro Getano+ ono Gusaya. 18 Fao khöra ndra talifusöra moroi ba ngawawa si dua+ yaʼia daʼö Zakharia, Beno, Yaʼasieli, Semiramoto, Yehieli, Uni, Eliabi, Benaya, Maʼaseya, Matitia, Elifelehu, Mikeneya hegöi ira sanaro bawa göli yaʼia daʼö Obedi-edomo ba Yeieli. 19 Ira sanunö yaʼia daʼö Hemano,+ Asafo,+ ba Etano, lafoli ziʼöli nifaondra wamözi* nifazökhi moroi ba tembaga.+ 20 Zakharia, Azieli, Semiramoto, Yehieli, Uni, Eliabi, Maʼaseya, ba Benaya, daʼö zamoli fakake zinunö nifosinali ba lafaudugö notenia ba Galamoti.*+ 21 Matitia,+ Elifelehu, Mikeneya, Obedi-edomo, Yeieli, ba Azasia, daʼö zamoli harafa ba lafaudugö notenia ba Zeminiti,*+ ba yaʼira zondröniaʼö sinunö. 22 Kenania,+ sondröniaʼö niha Lewi, yaʼia zamaigi-maigi famazawa Tawöla andrö, börö me onekhe ia ba daʼö. 23 Berekhia ba Elikana zanaro bawa göli ba naha Dawöla. 24 Simanö göi Gobedi-edomo ba Yehia, yaʼira zanaro bawa göli ba naha Dawöla. Ira ere, yaʼia daʼö Sebania, Yozafati, Netaneʼeli, Amasai, Zakharia, Benaya, ba Eliezeri, laʼebuaʼö lira ba wamoli torofe föna Dawöla Lowalangi sindruhu.+

25 Fao Dawido khö ndra satua mbanua ndraono Gizaraʼeli hegöi khö ndra kumandru zi saribu, mofanö ira ba wangai tawöla amabuʼula li Yehowa ba nomo Gobedi-edomo+ si fao faʼomuso dödö.+ 26 Börö me itolo niha Lewi andrö Lowalangi sindruhu ba wolohe tawöla amabuʼula li Yehowa, labeʼe fitu ngaʼeu nono zawi si matua ba fitu ngaʼeu mbiri-biri si matua tobali sumange.+ 27 No ifake Dawido nukha sanau si lö taʼio nifazökhi moroi ba nukha si sökhi ba simanö göi ndra niha Lewi samazawa Tawöla, ira sanunö, ba Kenania sondröniaʼö famazawa Tawöla hegöi ira sanunö. No ifake Dawido nukha gere* nifazökhi moroi ba nukha si sökhi.+ 28 Fefu ndraono Gizaraʼeli laʼohe Dawöla amabuʼula li Yehowa si fao faʼomuso dödö,+ lafoli dorofe nifazökhi moroi ba dandru, torofe,+ siʼöli nifaondra wamözi,* ba laʼebuaʼö wamoli fakake zinunö nifosinali hegöi harafa.+

29 Hizaʼi, me ofeta dawöla amabuʼula li Yehowa ba Mbanua Dawido,+ ifaigi-faigi ia Mikhala+ ono Zaulo andrö moroi ba zandrela, iʼila me manaoka-naoka Razo Dawido ba iʼowasaini wamazawa tawöla andrö. Ibörögö iʼosiwawöi Dawido bakha ba dödönia.+