Sara Ngaʼötö
26 Daʼa ngawawa zanaro bawa göli:+ moroi ba ngaʼötö Gora: Mezelimia+ ono Goresi moroi ba gotalua nono Gasafo. 2 So nono matua khö Mezelimia yaʼia daʼö Zakharia ono siaʼa, numero dua Yediaeli, numero tölu Sebadia, numero öfa Yatenieli, 3 numero lima Elama, numero önö Yohanano, ba numero fitu Elieho-enai. 4 So nono matua khö Gobedi-edomo yaʼia daʼö Semaya ono siaʼa, numero dua Yosabada, numero tölu Yoa, numero öfa Sakhara, numero lima Netaneʼeli, 5 numero önö Amieli, numero fitu Isasari, ba numero walu Feguletaʼi. Ifahowuʼö Gobedi-edomo andrö Lowalangi.
6 Tumbu nono matua khö Zemaya ono Gobedi-edomo ba yaʼira zamatörö ba nösi nomo zatuara ira matua, börö me niha sagabölö ira ba tola muʼodaligö. 7 Ono Zemaya yaʼia daʼö Otini, Refaeli, Obedi, ba Elisabada. Ira talifusönia sotöi Elihu ba Semakhia, tola göi muʼodaligö. 8 Yaʼira andrö fefu nono Gobedi-edomo. Tola muʼodaligö ira awö nonora matua hegöi talifusöra ba tefaudu khöra halöwö daʼö, 62 niha fefu ngaʼötö Gobedi-edomo. 9 So 18 niha fefu dalifusö Mezelimia+ hegöi iraononia matua si tola muʼodaligö. 10 Tumbu ndraono khö Hoza ono Merari. Simeri zi tobali sondröniaʼö börö me yaʼia nifili namania hewaʼae tenga ono siaʼa ia. 11 Numero dua Hilikia, numero tölu Tebalia, ba numero öfa Zakharia. Fefu nono matua ba talifusö Hoza 13 niha waʼato.
12 Sondröniaʼö ngawawa zanaro bawa göli andre fagölö halöwöra ba halöwö nifalua ndra talifusöra yaʼia daʼö mangai halöwö ba nomo Yehowa. 13 Lafalua dahö-dahö+ khö ndra sawuyu-wuyu hegöi si no atua moloʼö ösi nomo zatuara ira matua ero sambua bawa göli. 14 Dahö-dahö ba mbawa göli tanö ba gatumbukha aekhu khö Zelemia. Dahö-dahö saekhu khö nononia Zakharia, samösa sanuturu lala ba satua-tua, yaʼia daʼö bawa göli tanö yöu. 15 Khö Gobedi-edomo aekhu mbawa göli tanö raya, ba lafohalöwö ndraononia+ ba naha wangiröʼö. 16 Khö Zufimi ba khö Hoza+ aekhu mbawa göli tanö ba gaekhula, sahatö ba mbawa göli Zalekheti ba lala sebua si numalö miyawa, ba fasinga ngawawa zanaro si sambua ba ngawawa tanö böʼö. 17 So daönö niha Lewi zanaro tanö ba gatumbukha. Ero maʼökhö so daöfa tanö yöu ba daöfa tanö raya. Ero sambua naha wangiröʼö,+ so darua zanaro si fasinga ba zanaro si darua tanö böʼö. 18 Ewali nifosagö tanö ba gaekhula so daöfa zanaro ba lala sebua+ ba darua zanaro ba newali nifosagö. 19 Daʼö ngawawa zanaro bawa göli moroi ba ngaʼötö Gora faoma Merari.
20 Moroi ba mado Lewi, Ahia zamaigi-maigi harato ba nomo Lowalangi sindruhu hegöi harato niʼamoniʼö.*+ 21 Moroi ba nono Laedana, yaʼia daʼö ngaʼötö Geresono, so Yehieli,+ samösa sondröniaʼö ba nösi nomo zatua ira matua ngaʼötö Laedana ngaʼötö Geresono, 22 ba so nono Yehieli yaʼia daʼö Setama ba Yoeli talifusönia. Yaʼira zamaigi-maigi harato ba nomo Yehowa.+ 23 Moroi ba ngaʼötö Gameramo, ngaʼötö Yisihara, ngaʼötö Heberona, ba ngaʼötö Usieli,+ 24 Sebueli ono Geresomo ono Moze zi tobali sondröniaʼö ba naha wangiröʼö. 25 Ira talifusönia moroi ba ngaʼötö Geliezeri+ yaʼia daʼö Rehabia+ ono Geliezeri, Yesiaya ono Rehabia, Yoramo ono Yesiaya, Sikhiri ono Yoramo, ba Selomoto ono Zikhiri. 26 Selomoto awö ndra talifusönia zamaigi-maigi fefu harato niʼamoniʼö,+ si no iʼamoniʼö Razo Dawido,+ ira sondröniaʼö ba nösi nomo zatua ira matua,+ kumandru zi saribu ba kumandru zi daotu hegöi ira kumandru zaradadu. 27 Laʼamoniʼö fefu gama-gama si no larabu+ ba wasuwöta+ tobali soguna ba wondrorogö omo Yehowa, 28 fao ba daʼö gama-gama si no iʼamoniʼö Samueli sangiʼila+ andrö, Saulo ono Gisi, Abineri+ ono Neri, ba Yoabi+ ono Zeruya.+ Selomiti hegöi ira talifusönia, daʼö nifaduhusi tödö ba wamaigi-maigi fefu zi no laʼamoniʼö.
29 Moroi ba ngaʼötö Yisihara,+ mufataro Genania awö ndraononia matua ba halöwö böʼö baero halöwö si toʼölö lafalua ba gosali, yaʼia daʼö tobali samatörö ba sanguhuku+ ba ndraono Gizaraʼeli.
30 Moroi ba ngaʼötö Heberona,+ so Hasabia awö ndra talifusönia yaʼia daʼö 1.700 niha si tola muʼodaligö ba yaʼira zamaigi-maigi fefu halöwö nifalua khö Yehowa hegöi khö Razo, ba Gizaraʼeli tanö ba gaekhula Nungo Nidanö Yoridano. 31 Moroi ba ngaʼötö Heberona, Yeria+ zi tobali sondröniaʼö ba ngaʼötö Heberona, moloʼö waö-waö ngaʼötö nösi nomo zatuara ira matua. Me no 40 fakhe mamatörö Dawido,+ laʼalui niha sagabölö ba si tola muʼodaligö ba gotalua ngaʼötö Heberona, ba lasöndra ira ba Yaʼezeri+ ba mbanua Gileadi. 32 Faʼato ndra talifusönia yaʼia daʼö 2.700 niha si tola muʼodaligö, ba yaʼira zondröniaʼö ba nösi nomo zatuara ira matua. Andrö wa ifataro ira Razo Dawido ba wamaigi-maigi mado Rubeno, mado Gado, ba matonga mado Manase ba ngawalö halöwö soʼamakhaita khö Lowalangi sindruhu hegöi khö Razo.