Dua Ngaʼötö

7 Me awai sibai mangandrö Zelomo,+ aekhu galitö moroi yawa ba mbanua+ ba ikhozi fefu zumange nitunu awö zumange tanö böʼö, ba afönu nomo andrö lakhömi Yehowa.+ 2 Tebai möi ndra ere yomo ba nomo Yehowa, börö me afönu lakhömi Yehowa nomo Yehowa andrö.+ 3 Laʼila fefu iraono Gizaraʼeli me aekhu galitö moroi yawa ba afönu nomo andrö lakhömi Yehowa. Lafaöndrö ira tou ba zalo ba laʼandrö saohagölö khö Yehowa, ”börö me si sökhi tödö ia; lö tebulö waʼomasinia si lö faröi sagötö faʼara”.

4 Aefa daʼö, fao Razo ba nono mbanuania maʼafefu ba wameʼe sumange föna Yehowa.+ 5 Sumange nibeʼe Razo Selomo yaʼia daʼö 22.000 zawi ba 120.000 mbiri-biri. Daʼö nifalua Razo hegöi ono mbanua maʼafefu ba wangamoniʼö omo Lowalangi sindruhu.+ 6 Mozizio ndra ere ba nahara wohalöwö, simanö göi ndra niha Lewi solohe fakake ba wondröniaʼö sinunö khö Yehowa.+ Razo Dawido zamazökhi fakake andrö ba wangandrö saohagölö khö Yehowa me fao ia khöra ba wanuno,* ”börö me lö tebulö waʼomasinia si lö faröi sagötö faʼara”. Aefa daʼö, laʼebuaʼö wamoli torofe ira ere fönara,+ ba mosindro fefu ndraono Gizaraʼeli.

7 Iʼamoniʼö Selomo golayama tanö ba dalu si so föna nomo Yehowa. Ba daʼö ibeʼe zumange nitunu+ hegöi tawö si tobali sumange fangatulö, börö me lö monaha fefu zumange nitunu, sumange niʼa+ hegöi tawö+ ba naha wanunu sumange moroi ba tembaga+ nifazökhi Zelomo. 8 Me luo daʼö ilau gowasa Selomo fitu hari waʼara,+ fao ndraono Gizaraʼeli maʼafefu, angowuloa nono mbanua sato sibai moroi ba Lebo-hamata* ofeta ba Ndraso Miserai.+ 9 Hizaʼi ba ngaluo si walu,* lafalua gowasa si tohude,+ börö me no fitu hari wangamoniʼöra naha wanunu sumange andrö ba fitu hari göi lafalua gowasa. 10 Ba ngaluo si 23 ba mbaŵa si fitu, iwaʼö khöra Razo wangawuli ba nomora zamösana si fao faʼomuso dödö+ ba faʼowua-wua dödö, börö waʼasökhi dödö Yehowa khö Dawido, Selomo hegöi ba nono mbanuania Izaraʼeli.+

11 Simane daʼö wangasiwai Zelomo omo Yehowa awö gödo razo.+ Fefu niʼera-erania sanandrösa ba nomo Yehowa hegöi gödo razo andrö khönia, no teʼasiwai ba mofozu.+ 12 Ifalukhaisi Zelomo+ Yehowa ba zi bongi ba imane khönia, ”No ufondrondrongo wangandrömö, ba no ufili nahia daʼa khögu tobali omo ba wameʼe sumange.+ 13 Na uduhö mbanua si yawa irege lö aekhu deu, mazui ufarou damo ba wemanga sinanö ba mbanua daʼa, mazui ufatörö wökhö waba ba nono mbanuagu, 14 ba na mangide-ngideʼö+ nono mbanuagu sangotöigö töigu andrö,+ mangandrö ira, laʼalui ndraʼo ba laböhöli mbua-buara si lö sökhi,+ hasambalö ufondrondrongo moroi ba zorugo. Uʼefaʼö horöra ba ubohouni danöra.+ 15 Iadaʼa, ufaigi-faigi ba ubeʼe mbörö dalingagu wamondrongo fangandrö ba nahia daʼa.+ 16 No ufili ba uʼamoniʼö nomo daʼa, enaʼö so manö döigu ba daʼö sagötö faʼara.+ Lö aefa hörögu wamaigi ba toröi dödögu ba daʼö.+

17 ”Ba yaʼugö, na öfosumange ndraʼo simane amau Dawido, na öfalua goroisagu ba öʼoʼö fefu nifakhoigu hegöi huku nibeʼegu,+ 18 uʼaroʼö dadaoma waʼarazomö,+ simane si no ufabuʼu khö namau Dawido+ yaʼia daʼö, ’Lö tebulö mamatörö ngaʼötöu ba ndraono Gizaraʼeli.’+ 19 Hizaʼi, na faröi ami ba miböhöli wamalua amakhoita hegöi oroisa nibeʼegu, na mifosumange ba mangalulu ami khö lowalangi tanö böʼö,+ 20 udeha ndraono Gizaraʼeli ba danö si no ubeʼe khöra.+ Uheta föna hörögu nomo si no uʼamoniʼö andrö ba döigu, ba ubaliʼö famaʼiki hegöi fangoʼaya* ba gotalua soi maʼafefu.+ 21 Ba tobali adudula dania nomo andre. Dozi niha sanörö, ahöli-höli dödöra wamaigi+ ba lamane, ’Hana wa ifalua zimane daʼa Yehowa ba nomonia hegöi ba soi daʼa?’+ 22 Aefa daʼö lamane, ’Börö me no faröi ira khö Yehowa,+ Lowalangi ndra tuara, si no mangefaʼö yaʼira moroi ba danö Miserai,+ no laʼoʼö, lafosumange, ba latuhi danö föna lowalangi böʼö.+ Daʼö mbörö wa ifatörö khöra fefu wamakao andre.’”+