Halöwö Zinenge
27 Me no lahalö gangetula wa moloyo ndraʼaga numalö ba Gitalia,+ Faulo hegöi niha nitaha tanö böʼö, labeʼe ira ba danga Yulio, kumandru zaradadu Auguso. 2 Matörö göfa soloyo si otarai Aderamiti si numalö ba labua göfa ba zinga nasi Provinsi Asia. Fao göi Arisaro+ niha Makedonia moroi ba Desalonika. 3 Mahemolunia marugi Zidona, ba sökhi sibai gamuata Yulio khö Waulo. Itehegö khö Waulo wamalukhaisi ira awönia ba itema wanolo moroi khöra.
4 Moroi ba daʼö, moloyo ndraʼaga ahatö ba Zifirusi enaʼö telumöʼö moroi ba nangi si fazuzu. 5 Aefa daʼö, matörö nasi sebolo ba zi sagörö Kilikia hegöi ba Wambilia ba ofetaga ba Mira si so ba Likia. 6 Ba daʼö, isöndra kumandru andrö göfa moroi ba Alesandria soloyo numalö ba Gitalia, iwaʼö khöma enaʼö möiga yawa. 7 Me ahou sibai ndraʼaga woloyo ba zi hauga hari, serege dödöma awena marugi Kanidu. Börö me fazuzu nangi, moloyoga ahatö ba Hulo Gereta ba Zalomone enaʼö telumöʼö ndraʼaga. 8 Me no serege dödöma woloyo ahatö ba zinga gawu, ofeta ndraʼaga ba nahia nifotöi Labua si Sökhi, ahatö ba Lasea.
9 Me no ara numalö ginötö, tola manö mosikho ndraʼaga ba woloyo. Aefa daʼö, no numalö ginötö wuasö ba Ngaluo Wangatulö.+ Andrö imane Faulo 10 khöra, ”He ira talifusö, ufaigi na moloyo ita tola manö mosikho ba ebua rugi ita. Tenga ha köfa andre zahöndrö faoma ösinia, tola manö teʼala ita.” 11 Hizaʼi, lö faduhu dödö gumandru andrö ba niwaʼö Waulo, ha fehede zolohe hegöi sokhö köfa nifondrondrongonia. 12 Börö me lö baga na teʼuʼu ira ba mbaŵa deu ba labua andrö, ato zangumaʼö enaʼö mofanö ira moroi ba daʼö, ba na tola, ba Weniki teʼuʼu ira ba mbaŵa deu, labua göfa ba Hulo Gereta sangotahögö tanö raya ba tanö yöu gatumbukha.
13 Me idaʼi-daʼi waʼatohare nangi moroi raya, lawalingagö tola larugi mbanua si möi ira andrö. Börö daʼö, ladöni zao ba moloyo ira ba zinga nasi Hulo Gereta. 14 Lö ara aefa daʼö, tohare nangi sabölö-bölö nifotöi Euroakuilo,* ba göna göfa andrö. 15 Tezaumba göfa daʼö ba tebai ilawa nangi sabölö-bölö, irege matehegö manö hezo iʼoloiʼö angi. 16 Aefa daʼö, moloyo ndraʼaga ba hulo side-ide sotöi Kauda enaʼö telumöʼö ndraʼaga. Hizaʼi, arakhagö tebai masöbi dundraha side-ide* si so tanö furi göfa. 17 Me no lafazawa dundraha side-ide andrö yawa ba göfa, lahaogö laʼaroʼö wamöbö tanö tou göfa. Börö me ataʼu ira na tosake ba Ziriti,* lafurui zinali loyo ba teʼoloiʼö manö ba nangi. 18 Börö me iʼoloiʼö ndraʼaga bade, mahemolunia matiboʼö ösa nösi göfa. 19 Me no irugi tölu hari, latiboʼö ösa fakake göfa.
20 Ba gafuriata, börö me lö oroma haga luo hegöi döfi ba zi hauga hari, ba zi lö mudöna-döna, göna ndraʼaga bade sabölö-bölö ba ibörögö taya wanötönama. 21 Me no ara lö si manga ira, mozizio Waulo ba gotaluara imane, ”He ira talifusö, na no mifondrondrongo niwaʼögu enaʼö lö moloyo ita moroi ba Hulo Gereta, lö göna khöda wamakao daʼa mazui tatiboʼö gama-gamada ba nasi.+ 22 Hewaʼae simanö, uʼandrö sibai khömi enaʼö böi miʼabusi tödö, samösa lö si mate ba gotaluami. Ha köfa andre dania zi tekiko. 23 Mege ba zi bongi, no ifatenge khögu malaʼikania+ Lowalangi nibeʼegu sumange niʼamoniʼö ba sokhö yaʼo, mosindro ia ba zingagu 24 imane, ’Böi ataʼufi Faulo. Hasambalö mozizioʼö föna Kaisaro,+ ba börö ndraʼugö wa ahakhö dödö Lowalangi wangorifi fefu niha si fao khöu ba woloyo.’ 25 Andrö, yaʼabeʼe ami ira talifusö, börö me faduhu dödögu hasambalö ifalua zi no iwaʼö khögu Lowalangi. 26 Hewaʼae simanö, hasambalö tosake ita ba zi sambua hulo.”+
27 Me no irugi 14 bongi, teʼoloiʼö manö ndraʼaga misa ba nasi Aderia, ba me talu mbongi, lamane ira sohalöwö ba göfa wa arakhagö marugi dete danö. 28 Lasuʼa waʼabakha nasi so 36 meter,* lafadege ira miföna ba lafuli zui lasuʼa 27 meter* tö waʼabakha. 29 Börö me ataʼu ira na tosake göfa ba gara, andrö lafazaumba öfa ngawua zao tanö furi ba latötöna wa alio moluo. 30 Hizaʼi, laʼalui lala woloi ira sohalöwö ba göfa ba labeʼe tou dundraha side-ide ba nasi, laʼosaniboʼö sao ira föna göfa. 31 Börö daʼö, imane Faulo khö gumandru hegöi khö zaradadu, ”Na laheta ira ba göfa daʼa, lö auri ami.”+ 32 Aefa daʼö, lataba zinali dundraha side-ide ira saradadu ba atoru tou dundraha andrö.
33 Me arakhagö moluo, ifarou ira Faulo wemanga. Imane, ”No 14 hari abu dödömi wombalo-mbaloi ba lö si manga ami. 34 Uʼandrö khömi milau manga börö me daʼa zangabölöʼö yaʼami, ba sara lö taya mbu ba högömi.” 35 Me no aefa iwaʼö daʼö, ihalö roti ba iʼaohasi gölö Lowalangi fönara, iboboto roti andrö ba ibörögö wemanga. 36 Terara dödöra fefu ba labörögö manga. 37 Faʼatoma ba göfa andrö 276 niha. 38 Me no awai manga ira irege abuso, latiboʼö gandru si tou ba nasi enaʼö aoha nösi göfa.+
39 Me arakhagö moluo, lö oroma khöra dete danö.+ Ibörögö laʼila nasi sadöni bakha, ba lahalö gangetula tebato ba zinga gawu andrö na tola. 40 Lataba zinali zao irege ahöndrö ba nasi, ba lalulu zinali gamuri. Aefa daʼö, lafasa loyo tanö föna enaʼö ilulugö göfara angi ba numalö ba gawu. 41 Hizaʼi, itandru gawu sohili barö nasi köfa andrö irege tosake. Tetaru högö göfa ba tebai mofanö. Börö me ibözi ia bade, aboto tanö furi göfa.+ 42 Me laʼila daʼö, lahalö gangetula ira saradadu ba wamunu niha nitahara enaʼö lö molangi ira ba moloi. 43 Hizaʼi, ifangelama ira kumandru andrö börö me edöna ilumöʼö Waulo. Iʼandrö ba niha sonekhe molangi enaʼö lafazaumba ira ba nasi ba laʼofönaiʼö wolangi numalö ba gawu. 44 Aefa daʼö, tanö böʼö laʼoʼö moroi furi, laʼogunaʼö wafa mazui akhökhöla göfa. Ba gafuriata, larugi dete danö ba lö hadia ia khöra fefu.+