Famaʼeleʼö Nitema Yohane
15 Aefa daʼö, uʼila zahöli-höli dödö moroi ba mbanua si yawa. So dafitu malaʼika+ ba fitu ngawalö wamakao safuria niʼohera. Me no aefa fefu wamakao daʼö ba tebato göi wönu Lowalangi.+
2 Uʼila zi hulö nasi sörömi+ si faruka alitö. Ba uʼila göi niha si möna+ moroi ba gurifö samuʼi andrö awö nadunia.+ Lö tebeʼe khöra dandra numero si tobali töi gurifö samuʼi andrö,+ no mozizio ira ahatö ba nasi sörömi ba no lagogohe harafa Lowalangi. 3 Laʼanunöisi zinunö zawuyu Lowalangi andrö sotöi Moze+ ba sinunö Nono Mbiri-biri+ lamane,
”No ebua wolaumö ba sahöli-höli dödö nifazökhimö+ yaʼugö Lowalangi Yehowa* Fondrege Zabölö.+ Satulö ba sindruhu lalamö+ ba Razo götö-götö waʼara ndraʼugö.+ 4 He Yehowa,* ha yaʼugö zi lö faröi. Haniha zi lö ataʼu khöu ba si lö mamolakhömi töimö?+ Fefu soi laʼondrasi ndraʼugö ba mangalulu ira khöu+ börö me laʼila wa no satulö wanguhukumö.”
5 Aefa daʼö, uʼila naha niʼamoniʼö ba nose Lowalangi+ si no teboka ba zorugo.+ 6 Tohare dafitu malaʼika moroi ba naha niʼamoniʼö andrö ba wamalua si fitu ngawalö wamakao.+ No lafake nukha si sökhi si lö taʼunö ba si takile, hegöi böbö dötöʼa nifazökhi moroi ba ganaʼa. 7 Samösa moroi ba gotalua kerubi si daöfa zameʼe mako anaʼa si fitu khö malaʼika si dafitu andrö si no afönu faoma fönu Lowalangi,+ yaʼia daʼö sauri irugi zi lö aetu. 8 Afönu naha niʼamoniʼö andrö simbo, börö lakhömi Lowalangi+ awö waʼabölönia. Lö hadöi si tola möi ba naha daʼö irege tebato zi fitu wamakao+ moroi khö malaʼika andrö.