Nisura Yohane
20 Ba ngaluo siföföna ba migu daʼö,* ihulö wongi Maria Magadala weʼamöi ba lewatö,+ me ogömi-gömi nasa, iʼila no todege gara wondruhö lewatö.+ 2 Aefa daʼö, fagohi ia wamalukhaisi Simoni Fetero hegöi nifahaʼö tanö böʼö, yaʼia daʼö nifahaʼö niʼomasiʼö Yesu+ ba imane, ”No lahalö mboto Zoʼaya yaʼita ba lewatönia+ ba lö maʼila hezo labeʼe.”
3 Aefa daʼö, möi Wetero hegöi nifahaʼö andrö ba lewatö. 4 Lalau fagohi yaʼira si darua andrö, oföna irugi nifahaʼö andrö moroi khö Wetero. 5 Me ifaöndrö ia wamaigi lewatö, iʼila ba daʼö nukha si sökhi si no latouʼö tou,+ hizaʼi lö möi ia bakha. 6 Igoʼö ia Simoni Fetero ba möi ia bakha. Iʼila göi nukha si sökhi si no latouʼö tou ba daʼö. 7 Nukha famukusi högö Yesu no fasambua moroi ba nukha tanö böʼö, no tegölugö ba zi sambua nahia. 8 Möi bakha ba lewatö nifahaʼö si oföna mondrugi no mege. Iʼila ba faduhu dödönia. 9 Hewaʼae simanö, lö aboto ba dödöra ayati sangumaʼö wa tesusugi Yesu moroi ba gotalua zi mate.+ 10 Aefa daʼö, mangawuli ndra nifahaʼö andrö ba nomora zamösana.
11 No mozizio manö baero ba zinga lewatö Maria ba mege-ege ia. Ifaöndrö ia wamaigi lewatö ba lö iböhöli weʼe. 12 Iʼila darua malaʼika+ samake nukha safusi si dadao ba gamaudu nifadölö boto Yesu mege. Samösa zi dadao tanö ba högö ba samösa tanö ba gahe. 13 Lamane khö Maria, ”Hana wa mege-ege ndraʼugö?” Imane, ”No lahalö mboto Zoʼaya yaʼo, ba lö uʼila hezo labeʼe ia.” 14 Me no aefa iwaʼö daʼö, ifaigi furi ba iʼila Yesu no mozizio ia ba daʼö, hizaʼi lö iʼila wa Yesu daʼö.+ 15 Imane khönia Yesu, ”Hana wa meʼe ndraʼugö? Haniha niʼaluimö?” Börö me iwalinga sohalöwö ba kabu niha andrö, imane Maria, ”He Pa, na yaʼugö zangai, fatunö khögu hezo öbeʼe mbotonia ba möido uhalö.” 16 Imane khönia Yesu, ”He Maria!” Ifaigi furi ba imane ba li Heberaiʼo, ”Rabuni!” (eluahania ”Samahaʼö!”) 17 Imane Yesu, ”Böi babaya ndraʼo, börö me lö si möido nasa khö Nama. Aeʼe khö ndra talifusögu+ ba ömane khöra, ’Möi ndraʼo khö Namagu+ ba khö Namami, khö Lowalangigu+ ba khö Lowalangimi.’” 18 Mofanö Maria Magadala iʼombakhaʼö khö ndra nifahaʼö, ”No uʼila Zoʼaya!” Aefa daʼö, itutunö hadia wehede Yesu khönia.+
19 Me no bongi ba ngaluo siföföna ba migu daʼö, owulo ndra nifahaʼö ba lakusi fefu mbawandruhö börö waʼataʼura niha Yahudi. Aefa daʼö tohare Yesu, mozizio manö ia ba gotaluara imane khöra, ”Yaʼohahau dödömi.”+ 20 Me no aefa iwaʼö daʼö, iforomaʼö dangania hegöi töla nosunia.+ Omuso sibai dödö ndra nifahaʼö me laʼila Zoʼaya.+ 21 Imane zui khöra Yesu, ”Yaʼohahau dödömi.+ Simane famatenge Nama yaʼo,+ simanö göi wamatengegu yaʼami.”+ 22 Me no aefa iwaʼö daʼö, iwuwusi hanu-hanunia khöra ba imane, ”Mitema geheha niʼamoniʼö.+ 23 Na miʼefaʼö zala zi samösa niha, ba teʼefaʼö zalania. Na lö miʼefaʼö zala zi samösa niha, ba lö teʼefaʼö khönia.”
24 Hizaʼi, samösa ba gotalua ndra sinenge si 12 yaʼia daʼö Toma+ nifotöi si Faero, lö hadöi yaʼia ba daʼö me tohare Yesu. 25 Lafatunö khönia ira nifahaʼö tanö böʼö lamane, ”No maʼila Zoʼaya!” Hizaʼi imane, ”Na lö uʼila lahe gosö-osö ba dangania ba na lö ubabaya faoma turugu, simanö göi döla nosunia,+ ba lö faduhu dödögu.”
26 Walu hari aefa daʼö, owulo ndra nifahaʼö ba nomo ba fao khöra Doma. Hewaʼae no tekusi fefu mbawandruhö, tohare Yesu ba mozizio ia ba gotaluara imane, ”Yaʼohahau dödömi.”+ 27 Aefa daʼö imane khö Doma, ”Babaya daʼa faoma turumö, faigi dangagu ba babaya döla nosugu. Böi aombö dödöu saʼae, yafaduhu dödöu.” 28 Imane khönia Toma, ”He Soʼaya yaʼo ba Lowalangigu!” 29 Imane khönia Yesu, ”Hadia faduhu dödöu me no öʼila ndraʼo? Yaʼahowu zi faduhu tödö hewaʼae lö iʼila hörö.”
30 Oya dandra sahöli-höli dödö nifalua Yesu föna ndra nifahaʼönia, si lö musura ba gölu-gölu zura andre.+ 31 Hizaʼi, wa musura daʼa enaʼö faduhu dödömi wa Yesu andrö Keriso, Ono Lowalangi. Börö me faduhu dödömi, misöndra waʼauri ba döinia andrö.+