Dua Ngaʼötö

36 Aefa daʼö, tohare nono mbanua ba lafataro Yoahasi ono Yosia+ tobali razo fangali namania ba Yeruzalema.+ 2 Faʼalawa ndröfi Yoahasi me tobali ia razo yaʼia daʼö 23 fakhe, ba tölu waŵa mamatörö ia ba Yeruzalema. 3 Hizaʼi tohare razo Miserai, iheta Yoahasi ba dadaomania ba waʼarazo ba Yeruzalema. Aefa daʼö, ihuku soi daʼö 3,4 ton* wirö ba 34,2 kilogram* ganaʼa.+ 4 Ifataro dalifusönia Eliaki andrö razo Miserai tobali razo ba Yehuda hegöi ba Yeruzalema. Ifaböʼöni döi Geliaki tobali Yoyaki. Hizaʼi, iʼohe dalifusönia Yoahasi andrö Nekho+ ba Miserai.+

5 Faʼalawa ndröfi Yoyaki+ me tobali ia razo yaʼia daʼö 25 fakhe ba 11 fakhe mamatörö ia ba Yeruzalema. Lö iböhöli wamalua si lö sökhi föna Lowalanginia Yehowa.+ 6 Tohare Nebukanesa,+ möi isuwö ba iböbö Yoyaki, dua rozi rate tembaga ibeʼe famöbönia ba wolohe yaʼia ba Mbabilona.+ 7 Iʼohe ösa Nebukanesa gama-gama nomo Yehowa ba Mbabilona, ibeʼe ba gödo razo khönia ba Mbabilona.+ 8 Fefu waö-waö tanö böʼö sanandrösa khö Yoyaki, ngawalö gamuatania si raʼiö awö zi lö sökhi nifaluania, no tesura daʼö ba Mbuku Razo-Razo Ndraono Gizaraʼeli hegöi Yehuda. Ba ononia Yoyakhi zi tobali razo fangalinia.+

9 Faʼalawa ndröfi Yoyakhi+ me tobali ia razo yaʼia daʼö 18 fakhe, ba tölu waŵa a fulu hari mamatörö ia ba Yeruzalema. Lö iböhöli wamalua si lö sökhi föna Yehowa.+ 10 Ba mböröta ndröfi,* ifatenge niha Razo Nebukanesa ba wolohe yaʼia ba Mbabilona,+ fao gama-gama sebua böli moroi ba nomo Yehowa.+ Baero daʼö, ifataro dalifusö namania sotöi Zedekia tobali razo ba Yehuda hegöi ba Yeruzalema.+

11 Faʼalawa ndröfi Zedekia+ me tobali ia razo yaʼia daʼö 21 fakhe ba 11 fakhe mamatörö ia ba Yeruzalema.+ 12 Lö iböhöli wamalua si lö sökhi föna Lowalanginia Yehowa ba lö mangide-ngideʼö ia khö Yeremia samaʼeleʼö,+ samaʼema oroisa Yehowa. 13 Molawa göi ia khö Razo Nebukanesa,+ sameʼe yaʼia ba hölu khö Lowalangi. Abeʼe högönia,* fatandro ia, ba lö omasi ia iʼalui Yehowa Lowalangi ndraono Gizaraʼeli. 14 Sindruhu-ndruhu wa no faröi fefu gafalo gere hegöi ono mbanua andrö. Lafalua gamuata si raʼiö simane nifalua soi böʼö. Lataʼunöisi nomo Yehowa+ si no iʼamoniʼö ba Yeruzalema.

15 Lö iböhöli Yehowa wamatenge ira enoninia ba wamangelama yaʼira, lö adage-dage ia wamangelama yaʼira, börö me ahakhö dödönia nono mbanuania awö nahiania. 16 Hizaʼi, laʼoʼaya niha nifatenge Lowalangi sindruhu andrö,+ laʼaohasi ba dödö wehedenia,+ laʼailasi zamaʼeleʼö khönia,+ irege mofönu sibai Yehowa ba nono mbanuania,+ ba tebai mufadöhö ira saʼae.

17 Ifatenge razo niha Galedaia+ ba wolawa yaʼira, samunu iraono matua si bohou ebua khöra faoma föda+ ba naha niʼamoniʼö.+ Lö ahakhö dödönia nono matua hegöi ono alawe, satua hegöi si tebai boto.+ Ilulu ira Lowalangi ba danga razo andrö.+ 18 Iʼohe ba Mbabilona fefu gama-gama ba nomo Lowalangi sindruhu, he sebua hegöi side-ide, simanö göi harato ba nomo Yehowa awö harato razo ba okhöta ndra sondröniaʼö khönia.+ 19 Itunu nomo Lowalangi sindruhu,+ idudugö göli Yeruzalema,+ itunu malige nifoʼöli, ba ifakiko fefu gama-gama sebua böli.+ 20 Laʼoloiʼö ba Mbabilona fefu niha si lö ikhamö bawa ziʼöli.+ Tobali ira enoninia hegöi enoni+ ndraononia irege tefasindro wamatörö Weresia,+ 21 enaʼö itörö daromali Yehowa nifaʼemania khö Yeremia,+ irege no ahori labuʼa woʼömöra soi daʼö sanandrösa ba zabato.+ Lafalua zabato ba soi daʼö sagötö tobali tanö si mate danöra irugi moʼahonoa zi 70 fakhe.+

22 Enaʼö itörö niwaʼö Yehowa nifaʼemania khö Yeremia,+ ba ndröfi siföföna wamatörö Razo Kiro+ moroi ba Weresia, ifarou dödönia Yehowa ba wameʼe angombakhata ba zi sagörö famatörönia ba isura göi daʼö ba zura.+ Ösinia: 23 ”Imane Razo Kiro moroi ba Weresia, ’No ibeʼe khögu Yehowa, Lowalangi samatörö sorugo fefu wamatörö ba gulidanö,+ ba no ituyu ndraʼo wamazökhi omo khönia ba Yeruzalema si so ba Yehuda.+ Gofu haniha ba gotaluami zi no tobali ono mbanuania, yafao khönia Lowalanginia Yehowa ba yamangawuli ia ba Yeruzalema.’”+