Ba Mbanua Niha Keriso ba Galatia
3 He yaʼami niha Galatia si lö tödö! Haniha zamaelungu yaʼami andrö?+ Hadia lö nitemami famotokhi ba dödö sanandrösa khö Yesu Keriso niʼosö ba döla geu?+ 2 Ha sambua wanofugu: Hadia mitema geheha niʼamoniʼö börö woloʼömi oroisa mazui börö wamati nirongomi?+ 3 Hadia sindruhu-ndruhu lö tödömi? Me no miʼoʼö wanuturu lala moroi ba geheha niʼamoniʼö, hadia miʼoʼö wangera-ngera niha ba gafuriata?+ 4 Hadia zaya-zaya gölö manö me oya mitörö wamakao? Tatu tenga. 5 Sindruhunia, niha sameʼe khömi eheha niʼamoniʼö ba samalua halöwö safönu faʼabölö+ ba gotaluami, hadia ifalua daʼö börö woloʼömi oroisa mazui börö me mamati ami ba nirongomi? 6 Fagölö simane Aberahamo, ”mamati ia khö Yehowa* ba tefotöi ia niha satulö tödö”.+
7 Tatu aboto ba dödömi wa ono Gaberahamo andrö ha niha samati.+ 8 No oföna so ba zura wa atulö niha baero andrö ba wamaigi Lowalangi börö me mamati ira, ba no tohöna muʼombakhaʼö khö Gaberahamo duria somuso dödö andre, ”Moroi khöu tefahowuʼö dania fefu soi ba gulidanö.”+ 9 Fefu niha samati latema howu-howu simane Aberahamo niha samati.+
10 Fefu niha sangodaligö oroisa barö wangelifi so ira, börö me so ba zura, ”Niʼelifi fefu niha si lö moloʼö si no tesura ba gölu-gölu zura Goroisa andre.”+ 11 Mendrua manö, samösa lö satulö iwaʼö Lowalangi ba woloʼö oroisa,+ börö ”wamati, andrö wa auri niha samalua satulö”.+ 12 Baero daʼö, Oroisa Moze andrö tenga ba wamati teʼodane-dane ia, börö me so ba zura, ”Haniha zamalua oroisa andre, daʼö mbörö wa auri ia.”+ 13 No iʼöli ita Keriso.+ Iʼefaʼö ita+ ba wangelifi andrö ba Goroisa Moze, yaʼia me tobali ia niʼelifi salahida, börö me so ba zura, ”Niʼelifi dozi nitawi ba döla geu.”+ 14 Ohitö dödönia enaʼö ba khö Keriso Yesu,+ fefu soi latema howu-howu nifabuʼu khö Gaberahamo irege tatema geheha niʼamoniʼö+ si no ifabuʼu börö wamati.
15 Yaʼami ira talifusö, uʼogunaʼö duma-duma ba waʼauri si ero maʼökhö: Hewaʼae ha samösa zamaduhuʼö buʼusa li, lö si tola mamawuʼa mazui monönö. 16 Simane daʼa, buʼusa li Lowalangi tefaʼema khö Gaberahamo hegöi ba maʼuwunia.+ Tenga imane ayati daʼö, ”khö ndra maʼuwumö”, hulö ba niha sato manandrösa. Hizaʼi, imane ”khö maʼuwumö”, eluahania ba zi samösa niha, yaʼia daʼö Keriso.+ 17 Omasido göi uwaʼö daʼa: Oroisa Moze nibeʼe me 430 fakhe aefa daʼö,+ tebai iwuʼai mbuʼusa li Lowalangi ba wamobörö mazui iheta mbuʼusa li daʼö. 18 Na tebeʼe gondröita andrö börö Goroisa Moze, eluahania wa tebeʼe daʼö tenga börö zi no mufabuʼu, hizaʼi Lowalangi sebua faʼahakhö dödö zameʼe khö Gaberahamo ondröita andrö börö zi no mufabuʼu.+
19 Na simanö, hadia guna Goroisa Moze andrö? Wa munönö Goroisa andrö enaʼö oroma golalöwa,+ ba moguna irugi tohare maʼuwu sanema ondröita andrö.+ Tebeʼe goroisa andrö khö ndra malaʼika+ nifaʼema zi samösa sangagö talu gotalua.+ 20 Moguna zangagö talu gotalua na töra samösa zi farahu ba mbuʼusa li daʼö. Hizaʼi, lö moguna zangagö talu gotalua khö Lowalangi börö me ha yaʼia. 21 Hadia faböʼö Goroisa Moze ba zi no ifabuʼu Lowalangi? Löʼö! Na so niha sanöndra oroisa si tola mangorifi yaʼia, satulö lawaʼö niha daʼö börö woloʼönia oroisa. 22 Hizaʼi, Buku Niʼamoniʼö zangoromaʼö wa no teböbö fefu niha ba horö irege ha samati ba khö Keriso Yesu daʼö zanöndra buʼusa li Lowalangi.
23 Fatua lö so wamati andrö, no so ita barö mbawa goroisa, iböbö ita horö, ba tadöna-döna wamati nifaʼeleʼö andrö.+ 24 Börö daʼö, tobali samomaha yaʼita Goroisa Moze andrö ba sanuturu lala ba khö Keriso,+ irege satulö ita lawaʼö börö wamati.+ 25 Iadaʼa me no so wamati andrö,+ tenga saʼae barö mbawa zamomaha andrö so ita.+
26 Sindruhunia, ono Lowalangi ami fefu,+ börö wamati ba khö Keriso Yesu.+ 27 Fefu ami nibayagö idanö ba khö Keriso, hulö simane Keriso ami.+ 28 Lö hadöi samaböʼöni niha Yahudi faoma niha Yunani,+ sawuyu mazui niha si no teʼefaʼö,+ ira matua mazui ira alawe.+ Yaʼami fefu ha sambua ba khö Keriso Yesu.+ 29 Na okhöta Keriso ami, sindruhu-ndruhu wa maʼuwu Gaberahamo ami+ ba tola mitema gondröita+ nifabuʼu andrö.+