Sangombakha
6 So wamakao tanö böʼö niʼilagu ba gulidanö,* si toʼölö alua ba niha: 2 Lowalangi sindruhu zameʼe faʼakayo ba zi samösa niha, okhöta ba faʼamolakhömi, irege alua fefu zomasi dödö niha daʼö,* hizaʼi lö ibeʼe khönia ginötö ba worasoi faʼomuso dödö. Niha si fatewu zi manga. Zaya-zaya gölö daʼa ba sindruhu möi fangafatö dödö. 3 Moloʼö yaʼo, na so daotu nono zi samösa niha ba anau nosonia irege atua ia, hizaʼi lö irasoi waʼomuso dödö fatua lö labeʼe ia ba lewatö,* abölö lö sökhi zalua khönia moroi ba nono si mate me tumbu.+ 4 Zaya-zaya gölö waʼatumbu nono daʼa ba numalö ia ba zogömi-gömi ba tobini döinia ba waʼogömi-gömi. 5 Hewaʼae na lö irai iʼila haga luo ba lö aboto ba dödönia hadia ia, abölö sökhi* nono daʼa moroi ba niha daʼö.+ 6 Hadia guna na auri mato dua ribu fakhe ba lö musöndra waʼomuso dödö? Hadia tenga ha sambua lua-luara dania?+
7 Iforege wohalöwö si samösa niha ba wamoʼösi talunia,+ hizaʼi lö irai ahono dödönia. 8 Hadia hude niha satua-tua moroi ba niha si bodo?+ Hadia gunania ba niha si numana na iʼila lala enaʼö anau nosonia?* 9 Sökhi na iʼomusoiʼö dödönia niha ba zi no so föna duduma hörönia, moroi na igohi gisö-isö dödönia samösa.* Zaya-zaya gölö göi daʼa simane folohi angi.
10 Gofu hadia zi so ba no irai labeʼe döi. Hewisa zindruhunia niha andrö, ba no aboto ba dödöda. Tebai fabuʼa niha ba* zabölö moroi khönia. 11 Zaya-zaya gölö na itugu oya wehede.* Hadia gunania daʼö ba niha? 12 Haniha zangila hadia zabölö sökhi ifalua niha sagötö faʼaurinia si lö arara ba si tobali zaya-zaya gölö, si taya si hulö lumö-lumö?+ Haniha zi tola mangombakha khönia hadia zalua ba gulidanö* na no mate ia?