Nisura Yohane
9 Me mofanö Yesu, iʼila samösa ndra matua sauʼa iʼotarai me tumbu. 2 Manofu khönia ndra nifahaʼönia, ”He Samahaʼö,*+ haniha mbörö wa auʼa niha daʼa iʼotarai me tumbu? Hadia börö horönia mazui horö zatuania?” 3 Imane Yesu, ”Tenga börö horönia mazui horö zatuania, hizaʼi wa alua zimane daʼa enaʼö oroma ba niha halöwö Lowalangi.+ 4 Fatua mohaga nasa, datafalua halöwö zamatenge yaʼo,+ na no bongi, samösa lö sangila mohalöwö. 5 Sagötö feʼasogu ba gulidanö, yaʼodo haga gulidanö.”+ 6 Me no aefa iwaʼö daʼö, mangendrilo ia tou ba danö ba ifaruka ba dambu gilonia andrö. Aefa daʼö, ifagule ba hörö niha andrö,+ 7 imane, ”Ae sasai höröu ba mbaʼa Ziloa” (eluahania ”Nifatenge”). Mofanö niha andrö ba wanasai hörönia ba me mangawuli ia, tola iʼila niha saʼae.+
8 Niha si faola omo khönia hegöi niha si toʼölö mangila yaʼia ba wangandrö-ngandrö kefe lamane, ”Hadia tenga yaʼia andre zi dao-dao ba wangandrö-ngandrö kefe?” 9 So zangumaʼö, ”Atulö wa yaʼia.” Tanö böʼö lamane, ”Tenga, si fakhili-khili khönia daʼö.” Hizaʼi lö ibato wangombakha, ”Yaʼodo daʼa.” 10 Manofu ira khönia, ”Hewisa wa tola öʼila niha?” 11 Imane, ”Niha sotöi Yesu andrö, so nifarukania ba ifagule ba hörögu. Aefa daʼö imane, ’Ae sasai hörömö ba mbaʼa Ziloa.’+ Andrö möido usasai hörögu ba uʼila niha.” 12 Lamane, ”Hezo niha daʼö?” Itema lira, ”Lö uʼila.”
13 Laʼohe niha sauʼa no mege khö ndra Farizaiʼo. 14 Tefaudu luo Sabato+ me luo daʼö me ifaruka dambu andrö Yesu, ifagule ba hörö niha daʼö.+ 15 Ibörögö manofu ndra Farizaiʼo ba niha sauʼa andrö hewisa wa tola iʼila niha. Imane khöra, ”So nifagulenia ba hörögu, aefa daʼö usasai hörögu ba tola uʼila niha saʼae.” 16 So ösa ndra Farizaiʼo lamane, ”Tenga moroi khö Lowalangi niha daʼö, börö me isawö luo Sabato.”+ Tanö böʼö lamane, ”Hewisa wa tola ifalua dandra sahöli-höli dödö niha si so horö?”+ Tobali, no faböʼö-böʼö wehedera.+ 17 Lafuli zui manofu khö niha sauʼa andrö, ”Hewisa mbua gera-erau sanandrösa khönia me no ibokai hörömö?” Imane niha andrö, ”Yaʼia samaʼeleʼö.”
18 Hewaʼae simanö, lö faduhu dödö niha Yahudi wa auʼa me mböröta niha daʼa ba iʼila niha mangawuli irege lakaoni zatuania. 19 Manofu ira, ”Hadia sindruhu onomi daʼa, niwaʼömi sauʼa iʼotarai me tumbu? Hewisa wa tola iʼila niha iadaʼa?” 20 Lamane ira satuania, ”Sindruhu wa onoma daʼa, auʼa ia iʼotarai me tumbu. 21 Hizaʼi lö maʼila hana wa tola iʼila niha iadaʼa. Lö maʼila haniha zamokai hörönia. Misofu manö khönia. No ebua ia saʼae ba tola ibeʼe wanema li.” 22 Wa lawaʼö daʼö ira satuania börö waʼataʼura niha Yahudi.+ No mamagölö ndra niha Yahudi, na so zamaduhuʼö wa Yesu andrö Keriso, hasambalö lafofanö moroi ba nahia waʼowulo.*+ 23 Daʼö mbörö wa lawaʼö ira satuania, ”No ebua ia saʼae, misofu manö khönia.”
24 Andrö lafuli zui lakaoni niha sauʼa no mege ba lamane, ”Folakhömi Lowalangi. Maʼila wa sebua horö niha daʼö.” 25 Imane sauʼa no mege, ”Lö uʼila na sebua horö niha daʼö ba na tenga. Awai niʼilagu: Auʼa ndraʼo mege, ba iadaʼa uʼila niha.” 26 Aefa daʼö lamane khönia, ”Hadia nifaluania khöu? Hewisa wamokainia hörömö?” 27 Itema lira, ”No ufatunö khömi, ba lö faduhu dödömi. Hana wa omasi ami mirongo zui? Hadia omasi ami tobali nifahaʼönia?” 28 Lamane si fao fangoʼaya, ”Yaʼugö nifahaʼö niha daʼö, na yaʼaga nifahaʼö Moze. 29 Aboto ba dödöma wa khö Moze fahuhuo Lowalangi, hizaʼi na niha daʼö lö maʼila hezo iʼotarai.” 30 Imane niha sauʼa andrö, ”Ahöli dödögu ami, börö me miwaʼö lö miʼila hezo iʼotarai hewaʼae no ibokai hörögu. 31 Aboto ba dödöda wa lö ifondrondrongo Lowalangi niha si so horö.+ Hizaʼi, ifondrondrongo niha sangataʼufi ba samalua somasi ia.+ 32 Iʼotarai mböröta lö hadöi si tola mamokai hörö niha si no auʼa iʼotarai me tumbu. 33 Na tenga moroi khö Lowalangi iʼotarai niha andre, tebai ifalua zimane daʼa.”+ 34 Latema linia, ”No afönu horö ndraʼugö iʼotarai me tumbu, iadaʼa öfahaʼö ndraʼaga?” Aefa daʼö, lasöbi ia baero!+
35 No irongo Yesu me no lafofanö ia baero ba me falukha ira imane khönia Yesu, ”Hadia mamati ndraʼugö khö Nono niha?” 36 Imane niha daʼö, ”Haniha ia andrö Pa? Fatunö khögu enaʼö mamati ndraʼo khönia.” 37 Imane khönia Yesu, ”No öʼila ia. Yaʼia zi fahuhuo khömö.” 38 Imane, ”Mamati ndraʼo khönia Soʼaya.” Aefa daʼö ituhi danö föna Yesu. 39 Imane khönia Yesu, ”Tohare ndraʼo ba wanguhuku ulidanö andre, irege niha sauʼa laʼila niha,+ ba niha sangila tobali auʼa.”+ 40 So ösa ndra Farizaiʼo si so ba daʼö zamondrongo fehedenia ba lamane khönia, ”Na simanö, auʼa ndraʼaga?” 41 Itema lira Yesu, ”Na sauʼa ami ba lö horömi enaʼö. Hizaʼi miwaʼö iadaʼa, ’Maʼila niha.’ Andrö lö tebulö ami wa si so horö.”+