Famaʼeleʼö Nitema Yohane
1 Daʼa nifaʼeleʼö Yesu Keriso, nitemania moroi khö Lowalangi+ ba wangoromaʼö khö ndra sawuyu Lowalangi+ ngawalö zi lö ara tö alua. Ifatenge malaʼikania Yesu khö zawuyu Lowalangi sotöi Yohane,+ iʼogunaʼö dandra-tandra ba wangombakha daʼö fefu. 2 Ifaduhuʼö Yohane fefu niʼilania, yaʼia daʼö taromali Lowalangi ba famaduhuʼö moroi khö Yesu Keriso. 3 Yaʼahowu zombaso famaʼeleʼö hegöi samondrongo ba samalua si no tesura andre,+ börö me no ahatö ginötö si no mutatugöi.
4 Yohane zanura daʼa sofeta ba zi fitu banua niha Keriso+ ba Provinsi Asia:
Yamitema waʼasökhi dödö sebua* ba faʼohahau dödö moroi khö ”Lowalangi si no so iʼotarai mböröta, si lö tebulö so, ba si so dania”,+ ba moroi ba zi fitu eheha niʼamoniʼö+ si so föna dadaomania, 5 ba moroi khö Yesu Keriso, yaʼia daʼö ”Samaduhuʼö si Lö Faröi”,+ ”Si oföna tesusugi moroi ba gotalua niha si no mate”,+ ba ”Samatörö razo andrö ba gulidanö”.+
Ba khö Yesu sangomasiʼö yaʼita+ hegöi sameʼe donia si tola mangefaʼö yaʼita moroi ba horöda,+ 6 ba samataro yaʼita tobali razo+ ba ere+ ba wangai halöwö khö Lowalangi, Amania, ba khönia lakhömi awö waʼabölö irugi zi lö aetu. Yaduhu.
7 Tohare ia dania si fao lawuo.+ Dozi niha dania laʼila ia, simanö göi niha si no irai mamahö yaʼia. Fefu mado ba gulidanö laböbözi ira si fao faʼabu dödö börö ia.+ Yaʼia, Yaduhu.
8 Imane Lowalangi Yehowa,* ”Alafa ndraʼo ba Omega.*+ Yaʼo Wondrege Zabölö, si no so me mböröta, si lö tebulö so, ba si so dania.”+
9 Yaʼo Yohane, talifusömi si fao awömi tobali razo,+ sanaögö famakao,+ ba si lö faröi+ ba woloʼö Yesu.+ Ba Hulo Fatemo so ndraʼo börö wanuriaigö sanandrösa khö Lowalangi hegöi ba wamaduhuʼö Yesu. 10 Börö geheha moroi khö Lowalangi wa so ndraʼo ba luo Zoʼaya. Urongo li sebua si hulö li dorofe moroi furigu 11 imane, ”Hadia niʼilamö, sura ba zi sambua gölu-gölu zura ba faʼoheʼö ba zi fitu banua niha Keriso: Ba Nefeso,+ Simina,+ Feregamo,+ Tiatira,+ Sade,+ Filadefia,+ ba Laodikia.”+
12 Ufaigi furi ba wamaigi haniha zi fahuhuo khögu. Aefa daʼö, uʼila fitu ngawua naha wandru anaʼa,+ 13 ba gotalua naha wandru andrö, mosindro samösa zi hulö nono niha.+ No ifake mbaru sanau sofeta ba gahe ba so mböbö löwi anaʼa ba dötöʼania. 14 Baero daʼö, afusi mbu högönia hulö mbu mbiri-biri, simane esi, ba mohola-hola hörönia hulö galitö.+ 15 Takile gahenia hulö tembaga salösö ba galitö,+ ba fehedenia hulö handro-handro nidanö sabölö-bölö. 16 So fitu ngawua ndröfi ba dangania kambölö,+ ba moroi ba mbawania kalua gari sanau satarö si faoma bawa,+ hulö haga luo zikhalania.+ 17 Me uʼila ia, alabu ndraʼo tou ba gahenia hulö zi mate.
Aefa daʼö, itufa ndraʼo tangania kambölö imane, ”Böi ataʼufi, yaʼo Zi Oföna+ ba Safuria,+ 18 ba sauri.+ No irai mate ndraʼo,+ ba iadaʼa no ifuli auri, ba auri ndraʼo irugi zi lö aetu.+ Khögu so nono kusi waʼamate ba ono kusi Lewatö.*+ 19 Andrö, sura hadia ia zi no öʼila awö zalua iadaʼa, ba salua aefa daʼö. 20 Si fitu ndröfi niʼilamö ba dangagu kambölö hegöi naha wandru anaʼa si fitu ngawua andrö yaʼia daʼö si tobini niʼamoniʼö. Fitu ndröfi eluahania ira malaʼika ba zi fitu banua niha Keriso, ba fitu naha wandru eluahania fitu mbanua niha Keriso.+