Famaʼeleʼö Nitema Yohane
22 Aefa daʼö, iforomaʼö khögu malaʼika andrö nungo nidanö fangorifi+ sohau-hau ba si takile. Mangele nungo nidanö andrö moroi ba dadaoma Lowalangi hegöi dadaoma Nono Mbiri-biri+ 2 numalö ba lala sebua ba mbanua andrö. Ba zinga nungo nidanö andrö, faoma so fatambai döla geu fangorifi sowua 12 kali ba zi döfi, sakali sara waŵa. Bulunia muʼogunaʼö ba wamadöhö fefu soi.+
3 Lö iʼelifi mbanua daʼö Lowalangi. Ba mbanua andrö so dadaoma Lowalangi hegöi dadaoma Nono Mbiri-biri.+ Fefu zawuyu Lowalangi, lafalua halöwö niʼamoniʼö khönia. 4 Tola laʼila zikhalania,+ ba töinia no tesura ba gangangora.+ 5 Lö hadöi si bongi ba mbanua andrö,+ ba lö saʼae moguna wandru mazui haga luo, börö me Lowalangi Yehowa* zohagaini yaʼira.+ Ba tobali ira razo irugi zi lö aetu.+
6 Aefa daʼö, imane khögu malaʼika andrö, ”Sura daʼa börö me atulö ba tola mufaduhusi tödö wehede andre.+ Fahuhuo Yehowa* Lowalangi khö ndra samaʼeleʼö,+ no ifatenge ndra malaʼikania ba wangoromaʼö khö ndra sawuyunia hadia zi lö ara tö alua. 7 ’Lö ara tö tohare ndraʼo.+ Yaʼahowu niha soloʼö famaʼeleʼö ba gölu-gölu zura andre.’”+
8 Yaʼo Yohane, no urongo ba uʼila fefu daʼö. Me no urongo ba uʼila, mangalulu ndraʼo föna malaʼika sangoromaʼö daʼö fefu. 9 Hizaʼi imane khögu, ”Böi! Böi angalulu khögu! Khö Lowalangi angalulu!+ Sawuyu göi ndraʼo simane yaʼugö ba simane ira talifusöu samaʼeleʼö, ba simane niha soloʼö niwaʼö ba gölu-gölu zura andre.”
10 Imane nasa khögu, ”Böi fotandro wamaʼeleʼö ba gölu-gölu zura andre, börö me no ahatö ginötö si no ihonogöi Lowalangi. 11 Yaʼitohugö wamalua si lö sökhi niha samalua si lö sökhi, ba niha si raʼiö yaʼitohugö wamalua si raʼiö. Hizaʼi, yaʼitohugö wamalua satulö niha satulö, ba niha niʼamoniʼö yaʼitohugö wamalua niʼamoniʼö.
12 ”’Lö ara tö tohare ndraʼo. Ufoluo ba usulöni dozi niha moloʼö amuatara zamösana.+ 13 Alafa ndraʼo ba Omega,*+ si oföna ba safuria, böröta ba amozua. 14 Yaʼahowu niha si no manasai barura sebua andrö,+ irege sinangea ira wemanga bua geu fangorifi,+ ba tola möi ira ba mbanua andrö latörö mbawa gölinia.+ 15 Baero dania toröi fefu nasu* andrö, awö zi fakelemu, samalua amuata wohorö,* samunu niha, samosumange adu, ba dozi niha somasi ba si toʼölö falimo.’+
16 ”’Yesu ndraʼo, samatenge malaʼika ba wangombakha ngawalö hadia ia khömi soguna ba mbanua niha Keriso misa. Moroi ba maʼuwu Dawido ndraʼo.+ Yaʼodo madala si haga sihulö wongi.’”+
17 Imane eheha Lowalangi hegöi niʼowalu andrö,+ ”Miʼaine!” Gofu haniha zamondrongo, yaʼiwaʼö göi, ”Miʼaine!” Ba haniha zowökhi tödö yatohare.+ Haniha zomasi, tola ihalö nidanö fangorifi, lö böli.+
18 ”Ufaduhuʼö ba niha fefu samondrongo nifaʼeleʼö ba gölu-gölu zura andre: Na so zonönö ngawua wehede daʼa,+ inönö khönia wanguhuku Lowalangi si no tesura ba gölu-gölu zura andre.+ 19 Ba na so zangalösi ngawua wehede moroi ba wamaʼeleʼö si no tesura ba gölu-gölu zura andre, lö itehegö khönia Lowalangi ba wanöndra ngawalö zi sökhi si no musura ba gölu-gölu zura andrö. Tebai iʼa mbua geu fangorifi+ ba tebai möi ia ba mbanua niʼamoniʼö andrö.+
20 ”Sangombakha daʼa fefu imane, ’Yaʼia, lö ara tö tohare ndraʼo.’”+
”Yaduhu! Yatohare Zoʼaya yaʼita Yesu.”
21 Yamitema waʼasökhi dödö sebua* moroi khö Zoʼaya yaʼita Yesu, yaʼami niha niʼamoniʼö.