Nisura Mataiʼo
8 Ba me möi ia mitou moroi ba hili, ato zoloʼö yaʼia. 2 Aefa daʼö, tohare samösa zobou auri, ituhi danö fönania imane, ”He Soʼaya, na omasiʼö, tola öfadöhö ndraʼo.”+ 3 Iʼoroʼö dangania Yesu, ibabaya ba imane, ”Omasido! Yadöhö ndraʼugö.”+ Iʼanemaiʼö döhö mbou aurinia ba ginötö daʼö.+ 4 Imane khönia Yesu, ”Böi fatunö ba niha.+ Ofanö, ba ae foromaʼö ndraʼugö khö ndra ere.+ Beʼe zumange si no itatugöi Moze,+ si tobali tandra wa no döhö ndraʼugö.”
5 Ba me möi ia ba Gafanauma, iʼondrasi ia samösa kumandru ba wangandrö tolo+ 6 imane, ”He Pa, no göna fökhö sombuyu-mbuyu zohalöwö khögu, ba tebai ifezawa ia ba naha wemörönia. Marase sibai ia.” 7 Imane khönia Yesu, ”Möido dania ba daʼö ba wamadöhö yaʼia.” 8 Itema linia kumandru andrö, ”He Pa, tenga sinangea möiʼö ba nomogu. Waʼö manö zi sambua fehede enaʼö döhö zohalöwö khögu andrö, ba hasambalö döhö ia. 9 So göi gafalogu, ba so nono buagu. Na uwaʼö khö zi samösa, ’Ofanö!’ ba mofanö ia. Ba na uwaʼö khö zi samösa tö, ’Ae ba daʼa!’ ba hasambalö möi ia. Ba na uwaʼö khö zawuyugu, ’Falua daʼa!’ ba hasambalö ifalua.” 10 Me irongo daʼö Yesu, ahöli-höli dödönia ba imane ba niha soloʼö yaʼia, ”Sindruhu niwaʼögu khömi, lö irai falukha ndraʼo zebua famati simane daʼö ba ndraono Gizaraʼeli.+ 11 Sindruhunia, ato zi otarai ba gatumbukha hegöi ba gaekhula ba modadao ira fao manga khö Gaberahamo, Izaʼaki, ba Yakobo ba Wamatörö Lowalangi ba zorugo andrö.+ 12 Hizaʼi, niha sinangea möi ba Wamatörö zorugo andrö, tetiboʼö dania baero ba zogömi-gömi. Ba daʼö so wege-ege ba fatangisa mboha.”+ 13 Aefa daʼö imane Yesu khö gumandru andrö, ”Fuliʼö. Börö wamatimö, ba alua daʼö.”+ Ba iʼanemaiʼö döhö zohalöwö khönia.+
14 Me ofeta Yesu ba nomo Wetero, iʼila ba warate nina matua Wetero,+ mofaʼaukhu.+ 15 Ibabaya dangania Yesu+ ba döhö waʼaukhunia. Ba maoso ndra alawe andrö, ilau mondrino ibeʼe gö Yesu. 16 Bongi daʼö, ato zolohe khönia niha nifakao malaʼika si lö sökhi. Aefa daʼö, ifofanö malaʼika si lö sökhi andrö ha ba zi sambua fehede ba ifadöhö fefu zofökhö, 17 enaʼö itörö niwaʼö Yesaya samaʼeleʼö andrö, ”No ifadöhö wökhöda, ba iluʼi wamakaoda.”+
18 Me iʼila niha sato ba zi fasuinia Yesu, iwaʼö khö ndra nifahaʼönia enaʼö möi ira yefo Nasi Galilaia.+ 19 Aefa daʼö, tohare samösa zangila amakhoita imane, ”He Samahaʼö, uʼoʼö ndraʼugö gofu hezo manö möiʼö.”+ 20 Hizaʼi, imane khönia Yesu, ”So dögi narö hili ba nasu gatua,* ba so gazuni ba wofo, ba Ono niha andrö lö hadöi nahania wemörö.”+ 21 Ba tohare samösa nifahaʼö tanö böʼö imane, ”He Soʼaya, tehegö khögu, damöido ukoʼo ua namagu sabata.”+ 22 Imane khönia Yesu, ”Böi böhöli woloʼö yaʼo, akha lakoʼo zi mate awönia si mate.”+
23 Me möi ia ba dundraha, laʼoʼö ia ira nifahaʼönia.+ 24 Ba zi lö mudöna-döna alua mbade sabölö-bölö. Ibözi dundraha andrö bade irege möi yawa nidanö. No mörö Yesu ba ginötö daʼö.+ 25 Lasusugi ia ira nifahaʼö ba lamane, ”He Soʼaya, tolo! Mate ita!” 26 Ba imane wangumaʼö, ”Hana wa ataʼu ami, yaʼami sambö famati?”+ Aefa daʼö maoso ia ba ifahono nangi awö nasi, ba iʼanemaiʼö ahono.+ 27 Ahöli-höli dödöra ba lamane, ”Haniha sindruhunia niha daʼa? Angi hegöi asi laʼoʼö linia.”
28 Me larugi yefo ba mbanua Gadara, so darua ndra matua nifakao malaʼika si lö sökhi, tohare ira moroi ba lewatö ba laʼondrasi Yesu.+ Agamuʼi sibai ira irege lö niha si barani wanörö lala daʼö. 29 Muʼao ira, ”Hana wa möiʼö ba daʼa Ono Lowalangi?+ Hadia möi öfakao ndraʼaga ba daʼa+ fatua lö irugi inötö?”+ 30 Fandröndröu moroi ba daʼö, so ngawawa mbawi si manga-manga.+ 31 Ba laʼandrö khönia ira malaʼika si lö sökhi si fatewu ba mboto niha andrö, ”Na öfofanö ndraʼaga, fatengega ba mbawi daʼö.”+ 32 Imane khöra, ”Miʼofanö!” Ba laröi niha no mege, möi ira ba mbawi. Aefa daʼö, manaoka fefu mbawi andrö moroi ba hili ba lafazaumba ira ba nasi ba mate. 33 Hizaʼi, moloi zanaro bawi andrö ba mbanua sebua. Lafatunö fefu hadia zalua hegöi salua ba niha nifakao malaʼika si lö sökhi andrö. 34 Börö daʼö, fefu niha mbanua laʼondrasi Yesu ba lafaso ia enaʼö iröi mbanuara.+