15 Fanema li nihaogö ba möi fangalösi wönu,+
Hizaʼi fehede si lö baga tobali fangandrö wönu.+
2 Lela niha satua-tua iʼogunaʼö waʼaboto ba dödö,+
Hizaʼi bawa niha si bodo itutunö waʼabodo.
3 Gofu hezo ba ikhamö hörö Yehowa,
Ifaigi-faigi niha si lö sökhi hegöi niha si sökhi.+
4 Fehede omasiö amaedola döla geu fangorifi,+
Hizaʼi fehede falimosa möi fangafatö dödö.
5 Niha si bodo iʼosiwawöi wotu namania,+
Hizaʼi niha satua-tua itemaʼö degu-tegu.+
6 Oya harato ba nomo niha satulö tödö,
Hizaʼi tobali fangabu dödö nisöndra niha si lö sökhi.+
7 Bewe niha satua-tua ifazaewe waʼaboto ba dödö,+
Hizaʼi tenga simane daʼö dödö niha si bodo.+
8 Ogoro Yehowa zumange nibeʼe niha si lö sökhi,+
Hizaʼi fangandrö niha sadölö tödö tobali fangomuso dödönia.+
9 Anuzu dödö Yehowa lala niha si lö sökhi,+
Hizaʼi iʼomasiʼö niha solohi faʼatulö.+
10 Lö sökhi wotu andrö ba wamaigi niha sondröi lala satulö,+
Hizaʼi mate dania niha si fatuwu ba degu-tegu.+
11 Lewatö hegöi naha waʼatekiko ba lö tobini ba hörö Yehowa,+
Mendrua manö saʼae dödö niha!+
12 Lö omasi zangoʼaya ba niha sameʼe khönia mene-mene.+
Ba lö iʼandrö wanuturu lala ba niha satua-tua.+
13 Na omuso dödö, ba ohahau göi mbawa,
Hizaʼi faʼabu dödö möi fangafatö dödö.+
14 Tödö satua-tua iʼalui waʼaboto ba dödö,+
Hizaʼi bawa niha si bodo igohi waʼabodo.+
15 Lö hadöi ngaluo si sökhi ba niha si tosasa,+
Hizaʼi lö tebulö mangowasa niha somuso tödö.+
16 Abölö sökhi na lö oya haratoda hizaʼi taʼataʼufi Yehowa+
Moroi na fahöna harato hizaʼi afönu faʼaombö dödö.+
17 Abölö sökhi zi sambua figa sayu si fao faʼomasi+
Moroi ba nagole zawi satabö si fao faʼafökhö dödö.+
18 Niha salio mofönu iʼasogö waʼudusa,+
Hizaʼi niha si lö alio mofönu iʼalösi wasosota.+
19 Lala niha sareu hulö göli sodoi,+
Hizaʼi, lala niha sadölö tödö hulö lala sebolo si lö baʼa-baʼa.+
20 Ono satua-tua tobali fangomuso dödö namania,+
Hizaʼi niha si bodo iʼaohasi ba dödö ninania.+
21 Amuata faʼabodo tobali fangomuso dödö niha si lö tödö,+
Hizaʼi adölö miföna wofanö niha si so faʼaboto ba dödö.+
22 Na lö famagölö ba lö aʼozu gohitö dödö,
Hizaʼi mofozu na ato zanuturu lala.+
23 Omuso dödö niha börö wanema li satulö,+
Ba hawaʼasökhi zi sambua fehede ba ginötö si tefaudu!+
24 Niha si so faʼaboto ba dödö so ia ba lala waʼauri, lala si numalö miyawa,+
Irege lö möi ia ba Lewatö.+
25 Idudugö Yehowa nomo niha sasiliyawa,+
Hizaʼi irorogö nola danö lakha mbanua.+
26 Anuzu dödö Yehowa gera-era niha si lö sökhi,+
Hizaʼi omuso dödönia ba wehede omasiö.+
27 Niha sanöndra hare ba walimosa tobali fangabu dödö ba nösi nomonia,+
Hizaʼi teʼorifi dania niha si fatuwu ba zölö-sölö.+
28 Tödö niha satulö iʼangeragö fatua lö mohede ia,+
Hizaʼi bawa niha si lö sökhi iwaʼö-waʼö manö zi lö atulö.
29 Fandröndröu Yehowa ba niha si lö sökhi,
Hizaʼi ifondrondrongo wangandrö niha satulö tödö.+
30 Hörö si haga tobali fangomuso dödö;
Ba möi fangabeʼe döla duria si sökhi.+
31 Niha samondrondrongo tegu-tegu solohe ba waʼauri
Omasi ia fao ba gotalua niha satua-tua.+
32 Haniha zi fatuwu ba wotu lö iʼomasiʼö nosonia,+
Hizaʼi gofu haniha zamondrondrongo tegu-tegu isöndra waʼaboto ba dödö.+
33 Fangataʼufi Yehowa ba no tobali famomaha ba waʼatua-tua,+
Ba fangide-ngideʼö möi famolakhömi.+