Nisura Luka
16 Aefa daʼö imane Yesu khö ndra nifahaʼönia, ”So samösa ndra matua si kayo ba samösa zohalöwö khönia. Laböbögö ba zohalöwö khönia andrö wa no ihorigö harato zokhö yaʼia ba zi lö karua. 2 Börö daʼö, ikaoni zohalöwö khönia ba imane, ’Hadia nirongogu andrö sanandrösa khöu? Beʼe khögu zura waö-waö halöwöu barö daʼa, tenga yaʼugö saʼae zohalöwö ba nomogu.’ 3 Lö ara imane tödönia sohalöwö andrö, ’Hadia nifaluagu iadaʼa? Lö ara tö iʼefasi ndraʼo ba halöwögu. Tebaido wamaku tanö ba ailado göi wangandrö-ngandrö sadaka. 4 Aha! Uʼila hadia nifaluagu, enaʼö latemado dania ba nomora niha na laʼefasido ba halöwö.’ 5 Andrö, ikaoni fefu niha soʼömö khö zokhö yaʼia. Imane ba zi oföna, ’Hauga gömöu khö zokhö yaʼo?’ 6 Itema li, ’Otu fanuʼa* wanikha zaitu.’ Imane khönia, ’Fuli halö zura woʼömöu. Dadao ba aliokö wanura 50.’ 7 Aefa daʼö imane ba danö böʼö, ’Na yaʼugö, hauga gömöu?’ Itema li, ’Otu fanuʼa sebua* gandru.’ Imane, ’Fuli halö zura woʼömöu ba sura 80.’ 8 Isuno zohalöwö andrö sokhö yaʼia. Hewaʼae lö atulö nifaluania, hizaʼi onekhe ia. Ba ngawalö nifaluara khö ngaʼötöra, onekhe sa nono niha ba götö* daʼa moroi ba ndraono haga.+
9 ”Ufatunö göi khömi: Miʼogunaʼö ganaʼa si lö atulö ba wanöndra si fahuwu khömi,+ enaʼö latemaʼö ami dania ba nahia si lö tebulö na no ahori ganaʼa andrö.+ 10 Niha si lö faröi ba wondrege zide-ide, lö faröi ia ba wondrege zebua. Ba niha si lö atulö ba wondrege zide-ide, lö göi atulö ia ba wondrege zebua. 11 Börö daʼö, na faröi ami ba wangogunaʼö anaʼa si lö atulö andre, haniha zi faduhu tödö khömi ba wondrorogö faʼakayo sindruhu? 12 Ba na faröi ami ba wondrorogö harato niha böʼö, haniha zameʼe khömi ondröita sinangea mitema?+ 13 Lö hadöi sawuyu zi tobali enoni zi darua niha, börö me fatuwu ia ba zi samösa dania ba iʼomasiʼö zi samösa. Mazui, lö faröi ia khö zi samösa ba iʼaohasi ba dödö zi samösa. Tebai tobali ami sawuyu Lowalangi ba sawuyu Ganaʼa göi.”+
14 Me larongo wehede Yesu andrö, ibörögö laʼoʼaya ia ira Farizaiʼo sangomasiʼö kefe.+ 15 Imane khöra Yesu, ”No miʼosatulö föna niha,+ hizaʼi iʼila Lowalangi hadia zi so ba dödömi.+ Hadia zabölö moguna ba wamaigi niha, sindruhunia no sogoro Lowalangi daʼö.+
16 ”Teturiaigö Goroisa Moze hegöi Nisura Ndra Samaʼeleʼö irugi ba götö Yohane. Iʼotarai daʼö, teturiaigö Wamatörö Lowalangi si tobali turia somuso dödö ba laforege niha weʼamöi ba daʼö.+ 17 Hewaʼae awuʼa mbanua ba awuʼa danö, hizaʼi lö hadöi sambua hurufo mazui sambua titi moroi ba Goroisa Moze zi lö itörö.+
18 ”Na so samösa zamabali foʼomonia, ba mangowalu ia ba ndra alawe böʼö, no sohorö daʼö. Niha sangowalu khö ndra alawe nifabali andrö lafotöi ia göi sohorö.+
19 ”So samösa ndra matua si kayo. No ifake mbaru si ungu* ba nukha si sökhi sebua böli. Ero maʼökhö iʼomusoiʼö dödönia ba lö hadöi soʼamböta ia. 20 So zangandrö-ngandrö sadaka sotöi Lazaro, sasese laʼohe föna ba mbawa göli nomo niha si kayo andrö. Afönu ia faosa. 21 Omasi menaʼö iʼa gakhökhöla gö satoru moroi ba meza niha si kayo andre. Asese tohare nasu ba wamelai faosania. 22 Ba gafuriata, mate zangandrö-ngandrö sadaka andrö ba laʼohe ia ira malaʼika ba zinga* Gaberahamo.
”Mate göi niha si kayo andrö ba lakoʼo. 23 Me tefakao ia ba Lewatö,* ifaöga hörönia ba iʼila moroi ba zaröu Gaberahamo, so ba zingania* Lazaro. 24 Börö daʼö muʼao ia, ’He amagu Aberahamo, hakhösi tödö ndraʼo. Fatenge Lazaro andrö enaʼö iʼungugö zara nuwu durunia ba nidanö ba iʼokafui lelagu. Tefakao sibai ndraʼo ba galitö si hola-hola andre.’ 25 Imane Aberahamo, ’He onogu, törö tödöu, sagötö faʼaurimö no ösöndra zi sökhi, hizaʼi si lö sökhi nisöndra Lazaro. Iadaʼa, nirara tödö ia ba yaʼugö tefakao. 26 Aefa daʼö, so mbaho sebua nifazökhi ba gotaluada. Lö si tola möi ba daʼö si otarai ba daʼa. Ba lö göi si tola möi ba daʼa si otarai ba daʼö.’ 27 Itema li, ’Na simane daʼö, uʼandrö khöu fatenge ia ba nomo namagu. 28 So nasa dalima tö dalifusögu. Fatenge ia enaʼö ifangelama ira, faböi möi ba tefakao ira ba nahia daʼa.’ 29 Imane Aberahamo, ’So khöra mbuku nisura Moze hegöi Ira Samaʼeleʼö. Tola lafondrondrongo daʼö.’+ 30 Itema li, ’Lö lafondrondrongo daʼö amagu Aberahamo. Hizaʼi, na ifalukhaisi ira niha sauri moroi ba lewatö, awena lafalalini gera-erara.’ 31 Imane Aberahamo, ’Na lö lafondrondrongo nisura Moze+ hegöi Ira Samaʼeleʼö, lö göi lafondrondrongo niha sauri moroi ba lewatö.’”