Nisura Luka

20 Samuza maʼökhö me mamahaʼö Yesu ba gosali ba ituriaigö duria somuso dödö, laʼondrasi ia ira kafalo gere, sangila amakhoita hegöi ira sondröniaʼö ba daʼö. 2 Lamane khönia, ”Hezo moroi khöu waʼabölö ba wamalua daʼa fefu? Haniha zameʼe khöu faʼabölö daʼö?”+ 3 Itema lira Yesu, ”So göi sambua nisofugu khömi. Mifatunö khögu, 4 famayagö idanö nifalua Yohane andrö, hadia moroi ba zorugo mazui moroi ba niha?” 5 Ibörögö fangöngö-ngöngö ira, ”Na tawaʼö, ’Moroi ba zorugo,’ imane khöda dania, ’Ba hana wa lö faduhu dödömi khönia?’ 6 Na tawaʼö, ’Moroi ba niha,’ tola manö latebu ita kara niha sato, börö me faduhu dödöra wa Yohane andrö samösa samaʼeleʼö.”+ 7 Latema li Yesu lamane, ”Lö maʼila hezo moroi.” 8 Imane khöra Yesu, ”Lö göi ufatunö khömi hezo moroi usöndra waʼabölö ba wamalua daʼa fefu.”

9 Aefa daʼö, ifatunö gamaedola daʼa ba niha sato: ”So samösa zamazökhi kabu nagu+ ba ifaʼokosiʼö ba niha sohalöwö ba danö, aefa daʼö mofanö ia ba mbanua saröu ba ara mangawuli ia.+ 10 Me irugi inötö waneteu bua nagu, ifatenge zawuyunia khö ndra sohalöwö ba danö ba wangai tana khönia. Hizaʼi, laböbözi zawuyu andrö ira sohalöwö ba danö, ba lafofanö ia lö noro danga.+ 11 Aefa daʼö, ifatenge zui zawuyunia tanö böʼö. Hizaʼi, laböbözi ba laʼailasi göi zawuyu andrö, lafofanö ia lö noro danga. 12 Ifatenge zui zawuyunia si medölu, hizaʼi lafesokho ba lafofanö zawuyu andrö. 13 Börö daʼö, mangera-ngera zokhö kabu nagu, ’Hadia nasa zinangea ufalua? Ufatenge nonogu omasiö.+ Tatu laʼataʼufi ia.’ 14 Me laʼila ia sohalöwö ba danö, faoma lamane khö nawöra, ’Yaʼia zangokhögö kabu daʼa dania. Aine, tabunu ia ba tahalö gokhötania.’ 15 Börö daʼö, ladöni ia moroi ba kabu ba labunu.+ Hadia nifalua zokhö kabu andrö khö ndra sohalöwö ba danö? 16 Tohare ia ba ibunu fefu zohalöwö andrö, aefa daʼö ibeʼe kabunia ba niha böʼö.”

Me larongo daʼö niha sato lamane, ”Böi alua zimane daʼö!” 17 Hizaʼi, ifaigi ira Yesu imane, ”Na simanö, hadia geluaha ayati daʼa, ’Kara nitimbagö zamazökhi omo, no tobali kara* sabölö moguna’?+ 18 Dozi niha saekhu ba dete gara andrö tekiko.+ Ba niha nilangögö gara andrö afufu.”

19 Ba ginötö daʼö, laʼodödögö wondraʼu Yesu ira kafalo gere hegöi sangila amakhoita börö me laʼila wa khöra manandrösa gamaedola daʼö. Hizaʼi, ataʼu ira niha sato.+ 20 Börö daʼö, lahörö-hörögö ia. Lasölö niha ba wamaʼala Yesu enaʼö laʼosatulö ira ba wanofu khönia irege teʼala samösa ia ba wehedenia.+ Daʼö mbörö dania wa tola labeʼe ia ba danga zamatörö, yaʼia daʼö gubernur. 21 Lamane khönia, ”He Samahaʼö, aboto ba dödöma wa sindruhu manö na mohede ndraʼugö ba lö öfaigi mbawa niha, ba öfahaʼö zindruhu sanandrösa ba lala Lowalangi. 22 Na simanö, hadia tola tabuʼa pajak khö Kaisaro?” 23 Iʼila Yesu wa so khöra gera-era si lö sökhi. Andrö imane khöra, 24 ”Miforomaʼö khögu sambua gefe loga dinar.* Gambara haniha daʼa ba haniha döinia?” Latema linia, ”Kaisaro.” 25 Aefa daʼö imane, ”Mibeʼe khö Kaisaro dana khö Kaisaro,+ ba khö Lowalangi dana khö Lowalangi.”+ 26 Tebai lafaʼala ia ba wehede föna niha sato. Lö hede-hedera ba ahöli-höli dödöra ba wamondrongo fanema linia.

27 Hizaʼi, so ösa ndra Sadukaiʼo si lö faduhu tödö ba wanusugi niha si no mate.+ Laʼondrasi ia ba manofu ira,+ 28 ”He Samahaʼö, moloʼö huku Moze, ’Na so ndra matua si no mate ba lö ono, gaʼania mazui akhinia zangai foʼomonia ira alawe, enaʼö mongaʼötö dalifusöra matua andrö.’+ 29 So dafitu ndra matua si fatalifusö. Mangowalu ziaʼa ba no mate, lö ononia. 30 Numero dua, 31 aefa daʼö numero tölu, irugi numero fitu zangowalu khö ndra alawe daʼö. Mate fefu zi dafitu andrö lö ono. 32 Ba gafuriata, mate göi ndra alawe andrö. 33 Na simanö, haniha dania woʼomo ndra alawe andrö ba ginötö tesusugi zi no mate? Börö me no irai tobali foʼomonia ndra matua si dafitu andrö.”

34 Itema lira Yesu, ”Niha ba götö* daʼa mangowalu ba tebeʼe nihalö, 35 hizaʼi niha sinangea tesusugi dania moroi ba gotalua zi mate ba sanöndra faʼauri ba zi so miföna, lö mangowalu ira mazui tebeʼe nihalö.+ 36 Sindruhunia, lö saʼae mate ira ba tobali ira simane malaʼika. Na tesusugi, tobali ira ono Lowalangi. 37 Hizaʼi, sanandrösa ba wanusugi niha si no mate, no ifatunö daʼö Moze me so zalua ba gotalua ndruʼu sodoi me iwaʼö, ’Yehowa* andrö Lowalangi Gaberahamo, Lowalangi Gizaʼaki, ba Lowalangi Yakobo.’+ 38 Yaʼia andrö Lowalangi niha sauri, tenga Lowalangi niha si mate. Auri sa ira fefu ba wamaiginia.”+ 39 So ösa zangila amakhoita lamane, ”Atulö sibai niwaʼömö Samahaʼö.” 40 Lö barani ira saʼae manofu khö Yesu.

41 Aefa daʼö manofu khöra Yesu, ”Hana wa lawaʼö Keriso andrö maʼuwu Dawido?+ 42 Dawido samösa zangumaʼö bakha ba mbuku Zinunö, ’No iwaʼö Yehowa* khö Zoʼaya yaʼo, ”Dadao ba gambölögu 43 irege ubeʼe tou barö gaheu zi faʼudu khöu.”’+ 44 Dawido manö ikaoni khönia Soʼaya, hewisa wa tobali maʼuwu Dawido ia?”

45 Me larongo daʼö niha sato, imane Yesu khö ndra nifahaʼönia, 46 ”Miʼangelama khö ndra sangila amakhoita andrö samangörö-ngörö yaʼira, samake baru sebua sanau ba omasi ira nifosumange ba nahia sato niha* ba omasi ira modadao ba gurusi tanö föna* ba nahia waʼowulo* hegöi nahia si sökhi ba gowasa,+ 47 larabu nomo* lakha mbanua, ba laʼanauʼö wangandröra enaʼö laʼila ira niha. Latema dania hukumara sabölö ebua.”