Nisura Luka
14 Samuza inötö me luo Sabato, möi manga Yesu ba nomo zondröniaʼö ira Farizaiʼo. Lahaogö lafaigi-faigi ia niha sato ba daʼö. 2 So samösa ndra matua föna Yesu si göna fökhö faʼagambu.* 3 Manofu Yesu khö ndra sangila amakhoita hegöi ira Farizaiʼo, ”Hadia tola mufadöhö niha ba luo Sabato?”+ 4 Hizaʼi, lö hede-hedera. Ibabaya niha sofökhö andrö Yesu, ifadöhö ba iwaʼö enaʼö mangawuli ia. 5 Aefa daʼö imane khöra, ”Na aekhu ba mbaʼa nonomi mazui sawi khömi ba luo Sabato,+ tatu miʼanemaiʼö misöbi yawa lö?”+ 6 Lö laʼila fabuʼa khönia.
7 Ifaigi-faigi dome si tohare ba daʼö Yesu me lahalö nahiara si sökhi.+ Andrö itutunö gamaedola daʼa, 8 ”Na lakaoni ndraʼugö ba walöwa, böi dadao tanö föna.+ Ma dania ikaoni niha sabölö ifosumange moroi khöu sokhö omo. 9 Aefa daʼö, tohare zokhö omo sogaoni yaʼami ba imane khöu, ’Tenga dadaomamö daʼa.’ Ba börö waʼailamö, öfindrakö ndraʼugö furi. 10 Hizaʼi na lakaoni ndraʼugö, tanö furi ua dadao enaʼö na tohare zogaoni yaʼugö imane khöu, ’He kawa, aine, ba daʼa dadao föna.’ Ba tefosumange ndraʼugö föna dome sato.+ 11 Haniha zangebuaʼö yaʼia, daʼö niʼide-ideʼö, ba haniha zangide-ngideʼö yaʼia, daʼö niʼebuaʼö.”+
12 Aefa daʼö, imane Yesu ba niha sogaoni yaʼia, ”Na ökaoni niha wemanga ba zi laluo mazui ba zi bongi, böi kaoni zi fahuwu khöu mazui gaʼau mazui akhiu mazui talifusöu mazui si faola omo khöu si kayo, tola manö zui lakaoni ndraʼugö mangawuli ba ötema zulö. 13 Hizaʼi, na öfalua gowasa, kaoni niha si numana, sombuyu-mbuyu töla, sakela-kela ba sauʼa.+ 14 Omuso dödöu börö me tebai lasulöni khöu. Ötema zulö dania ba ginötö tesusugi niha satulö.”+
15 Me larongo daʼö fefu, so samösa dome sangumaʼö khönia, ”Tefahowuʼö niha si manga ba Wamatörö Lowalangi.”
16 Imane khönia Yesu, ”So samösa ndra matua samalua owasa sebua,+ ikaoni niha sato. 17 Me arakhagö tebörögö gowasa, ifatenge zawuyunia ba niha nikaoninia imane, ’Miʼaine, no awai mufaʼanö fefu.’ 18 Hizaʼi, laʼalui lala enaʼö lö möi ira.+ Si oföna imane, ’Awena uʼöli kabu ba hasambalö möido ufaigi. Bologö dödöu, tebai möido.’ 19 Tanö böʼö imane, ’Awena uʼöli khögu zawi lima fasa, uhaogö wamaigi ua. Bologö dödöu, tebai möido.’+ 20 Tanö böʼö imane, ’Tebai möi ndraʼo börö me awena mangowaludo.’ 21 Mangawuli zawuyu andrö ba ifatunö khö zokhö omo. Börö daʼö, mofönu zokhö omo ba imane khö zawuyunia, ’Aliokö ae ba lala sebua hegöi ba nono lala ba mbanua andre. Ohe ba daʼa niha si numana, sombuyu-mbuyu töla, sauʼa ba sakela-kela.’ 22 Ba gafuriata imane sawuyu andrö, ’No ufalua fefu niwaʼöu Pa. Hizaʼi, so nasa gurusi si lö niha.’ 23 Imane sokhö omo, ’Aeʼe ba lala sebua hegöi ba nono lala baero mbanua andre. Fangaösö ira ba haogö khöra wangumaʼö enaʼö möi ira laʼondrasi ba tola afönu nomogu.+ 24 Ufatunö khömi, niha si oföna ukaoni mege, lö manga ira ba gowasa nifaluagu.’”+
25 Me ato niha si fao khö Yesu ba lala ifaigi ira imane, 26 ”Na so zangondrasi yaʼo ba abölö iʼomasiʼö namania, inania, foʼomonia, ononia, gaʼania, akhinia, mazui nosonia samösa,+ tebai tobali nifahaʼögu.+ 27 Haniha zi lö moluʼi töla geu famakaonia* ba lö iʼoʼö ndraʼo, tebai tobali nifahaʼögu.+ 28 Duma-dumania, na so ba gotaluami zomasi mamazökhi malige, tatu modadao ia sakali wangerai hadia ibönö gefenia ba wangasiwai malige andrö. 29 Na löʼö, tola manö ha irugi wamazökhi fondrasi ba tebai iʼasiwai, ba dozi niha samaigi ibörögö laʼoʼaya ia, 30 lamane, ’Hadia niha daʼa, no ibörögö wamazökhi ba tebai iʼasiwai.’ 31 Mazui, na omasi fasuwö zi samösa razo khö razo tanö böʼö, tatu manö modadao ia sakali ba wangandrö fanuturu lala enaʼö aboto ba dödönia hadia tola ilawa zaradadu si 20.000 na ha 10.000 zaradadunia. 32 Na tebai ilawa, ifatenge mato hadauga niha ba wangandrö faʼatulö fatua lö tohare zanuwö yaʼia. 33 Simanö göi, yafaduhu dödömi, tebai tobali ami nifahaʼögu na tebai miröi fefu haratomi.+
34 ”Sindruhu wa sökhi nasio. Hizaʼi, na lö asi-asi nasio, hewisa wa tola muʼasioni zui?+ 35 Lö hadöi gunania ba danö mazui mubaliʼö pupu. Latiboʼö manö ia. Si so talinga, yamufondrondrongo.”+