Famaʼeleʼö Nitema Yohane
16 Ba urongo li sebua moroi ba naha niʼamoniʼö andrö+ samatenge ira malaʼika si dafitu imane, ”Ofanö ba duwagö wönu Lowalangi ba gulidanö si so bakha ba mako si fitu andrö.”+
2 Mofanö malaʼika si oföna ba iduwagö nösi makonia ba gulidanö.+ Ba göna faosa sabölö-bölö+ niha si so tandra gurifö samuʼi andrö+ ba sangalulu ba nadu andrö khönia.+
3 Iduwagö ba nasi nösi makonia malaʼika si dua.+ Tobali do nasi,+ simane do niha nibunu. Mate fefu zi so noso, sauri ba nasi.+
4 Iduwagö nösi makonia malaʼika si tölu ba nungo nidanö hegöi ba gumbu nidanö.+ Ba tobali do fefu.+ 5 Urongo li malaʼika si so kuaso ba nidanö andrö imane, ”Yaʼugö Lowalangi si lö faröi,+ si no so iʼotarai mböröta ba si lö tebulö so.+ Atulö ndraʼugö me no simane daʼö wanguhukumö,+ 6 börö me no laduwagö ndro niha niʼamoniʼö hegöi do ndra samaʼeleʼö khöu.+ Andrö wa öfabadugö khöra ndro+ ba sinangea na tehuku ira simane daʼö.”+ 7 Aefa daʼö, urongo li moroi ba naha wanunu sumange imane, ”He Lowalangi Yehowa* Fondrege Zabölö,+ sindruhu ba atulö gangetulamö.”+
8 Iduwagö ba luo nösi mako andrö khönia malaʼika si öfa,+ ba tetehegö ba luo enaʼö ikhozi niha. 9 Akhozi niha börö waʼaukhu sabölö-bölö. Hizaʼi, lö lafalalini gera-erara ba laʼoʼaya döi Lowalangi. Lö lafolakhömi Lowalangi safönu faʼabölö me no ifalua wanguhuku andrö.
10 Iduwagö nösi makonia malaʼika si lima ba dadaoma gurifö samuʼi andrö. Ba ogömi wamatörö gurifö daʼö+ ba laʼusu lelara niha börö waʼafökhö. 11 Hizaʼi, lö lafalalini gera-erara moroi ba gamuatara, laʼoʼaya Lowalangi fondrege zabölö ba zorugo, börö waʼafökhö ba börö waosara andrö.
12 Iduwagö nösi makonia malaʼika si önö ba nungo nidanö sebua sotöi Oiferati.+ Ba ogöʼö nidanö+ irege tola latörö ira razo+ moroi ba gatumbukha.
13 Aefa daʼö uʼila naga,+ urifö samuʼi, hegöi samaʼeleʼö sofaya. Dozi ira latötöi wehede si raʼiö moroi ba mbawara. Si tölu fehedera andrö hulö dalaho. 14 Fehedera andrö moroi khö ndra malaʼika si lö sökhi ba larongo ira razo ba zi sagörö ulidanö. Fehedera andrö zangaʼasogö ngawalö dandra sahöli-höli dödö+ enaʼö owulo ndra razo andrö ba ngaluo wasuwöta sebua+ khö Lowalangi Fondrege Zabölö.+
15 Aefa daʼö urongo li sebua sangumaʼö, ”Miʼangelama! Tohare ndraʼo hulö weʼaso zanagö.+ Yaʼahowu niha si lö arörö+ irege lö tehalö mbarunia tanö baero, faböi laʼila niha wa si lö nukha ia ba teʼailasi.”+
16 Laʼowuloi razo-razo andrö ba nahia nifotöi ba li Heberaiʼo yaʼia daʼö Hamagedo.*+
17 Iduwagö nösi makonia malaʼika si fitu ba dalu mbanua. Aefa daʼö, terongo li sebua moroi ba naha niʼamoniʼö,+ moroi ba dadaoma andrö imane, ”No awai!” 18 Ba alua gari mbanua, urongo li, feʼugu-ugu mbanua, ba duru danö sabölö-bölö, si lö irai alua iʼotarai me tewöwöi niha ba gulidanö.+ 19 Asila mbanua sebua+ andrö tobali tölu, ba adudu fefu mbanua si so ba soi. Aefa daʼö itörö tödö Lowalangi Mbabilona Sebua+ enaʼö ibadu nagu wönu Lowalangi sabölö-bölö.+ 20 Taya fefu hulo ba ahöndrö hili-hili.+ 21 Ba göna niha teu esi moroi ba dalu mbanua.+ Faʼabua ero sambua ngawua esi mato 20 kilogram.* Laʼoʼaya Lowalangi börö deu esi+ sabölö-bölö andrö.