Nisura Luka
7 Me no aefa iwaʼö daʼö Yesu ba niha sato, möi ia ba Gafanauma. 2 So ba daʼö gafalo zaradadu, mofökhö sibai zawuyu niʼomasiʼönia ba arakhagö mate.+ 3 Me irongo sanandrösa khö Yesu, ifatenge mato hadauga zondröniaʼö niha Yahudi ba wangandrö khö Yesu enaʼö möi ia ifadöhö zawuyunia andrö. 4 Laʼondrasi Yesu ba laʼandrö sibai khönia, ”Sinangea ötolo ia Soʼaya, 5 börö me iʼomasiʼö sibai soida ba yaʼia zamazökhi nahia waʼowulo khöma.” 6 Möi Yesu fao ia khöra. Hizaʼi, me arakhagö irugi nomo andrö, ifatenge zi fahuwu khönia kafalo zaradadu daʼö ba wangumaʼö, ”Böi fakaoʼö saʼae Pa, tenga sinangea möiʼö ba nomogu.+ 7 Daʼö mbörö wa alawö-lawö ndraʼo wamalukhaisi yaʼugö. Waʼö manö zi sambua fehede ba hasambalö döhö zohalöwö khögu andrö. 8 So göi gafalogu, ba so göi nono buagu. Na uwaʼö khö zi samösa, ’Ofanö!’ ba mofanö ia. Ba na uwaʼö khö zi samösa tö, ’Ae ba daʼa!’ ba hasambalö möi ia. Ba na uwaʼö khö zawuyugu, ’Falua daʼa!’ ba hasambalö ifalua.” 9 Me irongo daʼö Yesu, ahöli-höli dödönia. Aefa daʼö mohede ia ba niha soloʼö yaʼia, ”Ufatunö khömi, lö irai falukha ndraʼo zebua famati simane daʼö ba ndraono Gizaraʼeli.”+ 10 Me mangawuli denge-tenge zaradadu andrö ba nomo, laʼila wa no döhö zawuyu andrö.+
11 Lö ara aefa daʼö, mofanö Yesu ba mbanua sotöi Naʼi. Fao khönia niha sato hegöi ira nifahaʼönia. 12 Me ahatö irugi mbawa göli ba mbanua daʼö, so mboto zi mate nifahea, laʼohe baero. Si mate andrö ono si ha sambua khö lakha mbanua.+ Ato niha ba mbanua daʼö zi fao khö ndra alawe andrö. 13 Me iʼila daʼö Yesu, ahakhö dödönia+ ba imane, ”Böi miʼaeʼe saʼae.”+ 14 Ihatöʼö ia ba mbea-bea zi mate andrö ba ibabaya. Molombase zamabea ba imane Yesu, ”He ono matua, uwaʼö khöu, faoso!”+ 15 Maoso zi mate andrö, ilau modadao ba ibörögö fahuhuo. Aefa daʼö itouʼö ba danga ninania nono andrö Yesu.+ 16 Ahöli-höli dödö niha sato ba ibörögö lasuno Lowalangi. Lamane, ”No tohare zamaʼeleʼö sebua ba gotaluada,”+ ba, ”No iʼameʼegö tödö nono mbanuania Lowalangi.”+ 17 Tehöngö duria sanandrösa khö Yesu ba zi sagörö Yudea hegöi banua si fasui.
18 Lafatunö khö Yohane fefu zalua andre ira nifahaʼönia.+ 19 Börö daʼö, ikaoni darua nifahaʼönia Yohane ba ifatenge ira khö Zoʼaya ba wanofu, ”Hadia yaʼugö niha nifabuʼu Lowalangi andrö,+ mazui so danö böʼö nibaloima?” 20 Me falukha ira, lamane khönia, ”Nifatenge Yohane Samayagö Idanö ndraʼaga ba wanofu khöu, ’Hadia yaʼugö nifabuʼu Lowalangi andrö, mazui so danö böʼö nibaloima?’” 21 Me luo daʼö, ato nifadöhönia niha, ifadöhö fefu ngawalö wökhö,+ ifofanö malaʼika si lö sökhi, ba teboka hörö zauʼa. 22 Itema lira Yesu, ”Miʼaeʼe ba mifatunö khö Yohane hadia niʼilami hegöi nirongomi. Teboka hörö zauʼa,+ mofanö zombuyu-mbuyu töla, döhö zobou auri, safiso tola larongo li,+ ifuli auri zi no mate, ba larongo duria somuso dödö niha si numana.+ 23 Yaʼahowu zi faduhu tödö khögu.”*+
24 Me no mofanö denge-tenge Yohane, ibörögö fahuhuo Yesu ba niha sato sanandrösa khö Yohane, ”Hadia nifaigimi ba danö si mate? Hadia ba wamaigi bulu zukhu nifadögö-dögö nangi?+ 25 Na tenga, hadia nifaigimi andrö? Ba wamaigi niha samake nukha sebua böli?+ Ha ba gödo razo so niha si kayo hegöi samake baru sebua böli. 26 Hadia sindruhunia nifaigimi ba daʼö? Mamaigi samaʼeleʼö? Atulö, samösa samaʼeleʼö ia, tenga samaʼeleʼö si toʼölö.+ 27 Yaʼia nitötöi ba ayati daʼa, ’Hiza, ufadari-dariʼö fönau zinengegu sangehenaigö lala khöu.’+ 28 Uʼombakhaʼö khömi, ba gotalua niha niʼadonogö ndra alawe, lö sabölö ebua moroi khö Yohane, hizaʼi fondrege zide-ide ba Wamatörö Lowalangi andrö, abölö ebua moroi khönia.”+ 29 (Me larongo daʼö niha sato hegöi ira sanugi pajak, lafaduhuʼö wa atulö Lowalangi, börö me no ibayagö ira idanö Yohane.+ 30 Hizaʼi, laʼosiwawöi wanuturu lala moroi khö* Lowalangi ira Farizaiʼo hegöi sangila amakhoita,+ börö me lö nibayagö Yohane ira idanö.)
31 ”Börö daʼö, haʼökhö tola ufaomagö niha ba ginötö andre? Simane haniha ira andre?+ 32 Hulö ndraono side-ide ira si dadao ba fasa si fawude-wude khö nawöra. Lamane wangumaʼö, ’Fasurune ndraʼaga ba lö manari ami. Maʼanunöisi zinunö waʼabu dödö ba lö meʼe ami.’ 33 Simanö göi Yohane, lö iʼa roti ba lö ibadu nagu,+ hizaʼi miwaʼö wa no fatewu khönia malaʼika si lö sökhi. 34 Aefa daʼö, tohare Nono niha, manga ba mamadu ia. Hizaʼi, mimane khönia oluʼa-luʼa ba tuka mabu, fahuwu ia ba zanugi pajak hegöi ba niha sebua horö!+ 35 Hewaʼae simanö, oroma waʼatua-tua niha ba nifaluania.”+
36 So samösa Warizaiʼo samorege khö Yesu enaʼö fao ira wemanga. Möi Yesu ba nomonia, modadao ira ba lalau manga. 37 So samösa ndra alawe ba mbanua daʼö si no tehöngö ba wamalua horö. Me irongo wa manga Yesu ba nomo Warizaiʼo andrö, möi ia ba iʼohe mbuli-buli* wanikha somuhua.+ 38 Modadao ia tanö furi ahatö ba gahe Yesu, ibörögö meʼe ia ba ibasöi gahe Yesu faoma idanö hörönia. Aefa daʼö, iʼosi gahe Yesu faoma bunia ba ihaogö woʼuma, ba ifagule wanikha somuhua andrö. 39 Me iʼila daʼö Farizaiʼo sogaoni Yesu wemanga, imane bakha tödönia, ”Na sindruhu samaʼeleʼö niha andre, tatu iʼila haniha ba hewisa ndra alawe sombambaya yaʼia. Yaʼia andrö niha sebua horö.”+ 40 Hizaʼi, imane Yesu khönia, ”He Simoni, so zomasido uwaʼö khöu.” Imane Simoni, ”Hadia yaʼö, Samahaʼö?”
41 ”Darua ndra matua soʼömö khö zi samösa niha. Foʼömö zi samösa 500 dinar* ba si samösa 50 dinar. 42 Samuza inötö me lö khöra famuʼa, ibeʼe saohagölönia woʼömöra andrö. Na simanö, haniha ba gotalua zi darua andrö zabölö mangomasiʼö niha daʼö?” 43 Itema linia Simoni, ”Moloʼö yaʼo, niha sabölö ebua foʼömö.” Imane Yesu, ”Atulö niwaʼömö.” 44 Aefa daʼö, ifaigi ndra alawe andrö Yesu ba imane khö Zimoni, ”Hadia öʼila ndra alawe daʼa? Möi ndraʼo ba nomomö, ba lö öbeʼe khögu nidanö fanasa gahe. Hizaʼi, ira alawe andre, ibasöi gahegu faoma idanö hörönia ba iʼosi faoma bunia. 45 Lö faʼuma ndraʼugö khögu tandra wa ötemaʼö ndraʼo, hizaʼi ira alawe andrö lö ibato wanguma ahegu iʼotarai me so ndraʼo. 46 Lö öbayoini högögu fanikha, hizaʼi ira alawe andre iduwagö wanikha somuhua ba gahegu. 47 Börö daʼö uʼombakhaʼö khömi, hewaʼae ebua* horö ndra alawe andre, hizaʼi no teʼefaʼö+ khönia börö me iforomaʼö waʼomasi sebua. Hizaʼi, niha niʼefaʼö horö si ha maʼifu, ha göi maʼifu waʼomasi niforomaʼönia.” 48 Imane Yesu khö ndra alawe andrö, ”No teʼefaʼö horöu.”+ 49 Niha si fao ira wedadao ba wemanga faoma lamane khö nawöra, ”Haniha sindruhunia niha daʼa wa tola iʼefaʼö horö?”+ 50 Aefa daʼö, imane Yesu khö ndra alawe andrö, ”Famatimö zangorifi yaʼugö,+ ofanö yaʼohahau dödöu.”