2 Moze
1 Me mofanö Yakobo mazui Izaraʼeli ba danö Miserai, fao khönia fefu nononia matua awö nösi nomora zamösana.+ Töi ndraononia matua yaʼia daʼö 2 Rubeno, Simeoni, Lewi, Yehuda,+ 3 Isasari, Sebuloni, Beniami, 4 Dano, Nafetali, Gado ba Aseri.+ 5 Fefu ngaʼötö Yakobo 70 niha, ba Miserai+ so Yosefo me luo daʼö. 6 Ba gafuriata mate Yosefo,+ simanö göi ndra talifusönia awö niha sauri ba götöra. 7 Ato sibai ngaʼötö ndraono Gizaraʼeli ba itugu monönö waʼatora. Alio sibai monönö waʼatora ba tedou waʼabölöra irege lanönöi soi daʼö.+
8 Lö ara, tohare razo si bohou samatörö Miserai, si lö mangila haniha Yosefo. 9 Imane ba nono mbanuania, ”Itugu ato ndraono Gizaraʼeli ba abölö ira moroi khöda.+ 10 Taʼalui lala enaʼö böi monönö waʼatora. Na lö tafalua daʼö, ba ginötö alua wasuwöta tola manö faʼawö ira ba nudu ba lalawa ita irege taröi soi daʼa.”
11 Börö daʼö, lafataro zondröniaʼö ira niha Miserai ba wamakao iraono Gizaraʼeli ba lafaso ira wohalöwö.+ Lawaʼö ba ndraono Gizaraʼeli wamazökhi Fitomo faoma Ramese,+ yaʼia daʼö banua sebua khö Waraʼo naha wangiröʼö soguna. 12 Hewaʼae lafakao ndraono Gizaraʼeli, itugu monönö waʼatora ba muzawili ira misa ba danö. Ataʼu niha Miserai ba fatuwu sibai ira ba ndraono Gizaraʼeli.+ 13 Daʼö mbörö wa lö sökhi gamuata niha Miserai ba laforege wangosawuyu yaʼira.+ 14 Tefakao ndraono Gizaraʼeli ba labeʼe khöra halöwö sabua. Lafaso ira wamakoe simi* ba lafazökhi batu bata, ba lafaso ira göi wohalöwö ba nowi. Lö sökhi gamuata niha Miserai khöra ba laʼosawuyu ira wohalöwö.+
15 Aefa daʼö, mohede razo Miserai khö ndra alawe niha Heberaiʼo sotöi Sifera ba Fua, sanolo ira alawe soʼono, 16 ”Na mitolo ndra alawe Heberaiʼo ba ginötö moʼono ira,+ mibunu nonora andrö na ono matua zi tumbu. Hizaʼi na ono alawe, böi mibunu.” 17 Ira alawe si darua andrö laʼataʼufi Lowalangi sindruhu ba lö laʼoʼö niwaʼö razo Miserai. Latehegö manö auri nono matua si tumbu.+ 18 Ikaoni ira razo Miserai ba imane khöra, ”Hana wa mitehegö auri nono matua?” 19 Lamane ira alawe si darua andrö, ”Ira alawe Heberaiʼo tenga simane ira alawe Miserai. Agabölö sibai ira, lö fakhamö tohare ndraʼaga ba no tumbu nonora.”
20 Börö daʼö, ifahowuʼö ndra alawe si darua andrö Lowalangi ba monönö waʼato soi daʼö ba abölö ira. 21 Börö me laʼataʼufi Lowalangi sindruhu, andrö wa ibeʼe ngaʼötöra Lowalangi. 22 Lua-luania, ifaretakö nono mbanuania Faraʼo, ”Mitiboʼö fefu nono matua Heberaiʼo sawena tumbu ba Nungo Nidanö Nilo, ba lö salania na auri nono alawe.”+