Ba Mbanua Niha Keriso ba Roma
11 So wanofugu: Hadia itimbagö nono mbanuania Lowalangi?+ Löʼö! Iraono Gizaraʼeli göi ndraʼo, maʼuwu Gaberahamo moroi ba mado Mbeniami. 2 Lö itimbagö nono mbanuania Lowalangi, ono mbanua si oföna iʼameʼegö tödö.+ Hadia lö miʼila niwaʼö ba zura sanandrösa khö Gelia? Mukökö-kökö ia khö Lowalangi börö ndraono Gizaraʼeli, 3 ”He Yehowa,* no labunu ndra samaʼeleʼö andrö khöu ba ladudugö naha wanunu sumange. Hatö yaʼo zauri, ba iadaʼa laʼalui lala wamunu yaʼo.”+ 4 Hizaʼi, hadia niwaʼö Lowalangi khönia? ”Ba gotalua nono mbanuagu, so 7.000 tö nasa niha si lö mangalulu khö Mbaʼali.”+ 5 Simanö göi iadaʼa, so nasa niha si tosai,+ si no ifili Lowalangi börö waʼasökhi dödönia sebua.* 6 Eluahania, no ifili ira börö waʼasökhi dödönia sebua,+ tenga börö mbua-buara.+ Na ifili ira börö mbua-buara, tenga saʼae börö waʼasökhi dödönia sebua daʼö.
7 Na simanö, hewisa? Niʼalui ndraono Gizaraʼeli andrö lö lasöndra, niha nifili andrö sa zanöndra.+ Ba tanö böʼö, lö ba dödöra+ 8 simane niwaʼö ba zura, ”No ifeförö ira Lowalangi, femörö sabölö-bölö,+ ba ibeʼe khöra hörö ba walömangila ba talinga si lö mamondrongo irugi iadaʼa.”+ 9 Imane göi Dawido, ”Akha tobali famaʼala khöra gowasa andrö, tandrawa, fangala ba fanguhuku. 10 Yaʼogömi-gömi wamaigira irege lö laʼila, ba akha itugu aköu hulura.”+
11 So wanofugu: Hadia manendre ira ba alabu irege tebai mosindro? Löʼö! Hizaʼi, börö zala nifaluara, andrö wa teʼorifi niha moroi ba soi böʼö irege afökhö dödöra.+ 12 Iadaʼa, na tobali howu-howu ba gulidanö zala nifaluara, ba faʼalöra tobali howu-howu ba soi böʼö,+ mendrua manö saʼae na ahori so ira!
13 Iadaʼa, fahuhuo ndraʼo khömi yaʼami moroi ba soi böʼö. Yaʼodo sinenge nifatenge ba soi böʼö,+ ufolakhömi* halöwö nibeʼe khögu.+ 14 Uʼalui lala enaʼö tola afökhö dödö soigu irege so ösa ba gotaluara niʼorifi. 15 Na tobali fangatulö niha gulidanö wanimbagö yaʼira andrö,+ hadia tenga faʼauri geluaha wanemaʼö yaʼira moroi ba gotalua niha si no mate? 16 Na teʼamoniʼö ösa hamo darigu nibeʼe sumange tobali bua si oföna, fefu danö böʼö si no mufaruka ahori teʼamoniʼö. Na teʼamoniʼö waʼa geu, tatu teʼamoniʼö göi ndrahania.
17 Na lataba ösa ndraha geu zaitu, ba yaʼami si no amaedola daha geu zaitu nisöndra ba ndruʼu, lafatöfa ami ba ndraha geu si no so ba moʼurakha ami moroi ba waʼa andrö, 18 böi mifayawa ba* ndraha geu andrö. Na fayawa* ami,+ mitörö tödömi wa tenga yaʼami zameʼe gö ba waʼa andrö, hizaʼi waʼa daʼö zameʼe gömi. 19 Aefa daʼö mimane, ”Mutaba ndraha geu daʼö enaʼö tola mufatöfa ndraʼo ba dölania.”+ 20 Atulö daʼö! Wa mutaba ira+ börö me lö khöra famati,+ hizaʼi lö tebulö ami börö wamatimi andrö. Böi fayawa ami. Si sökhinia miʼangelama 21 börö me tola manö itaba ndraha sindruhu andrö Lowalangi, mendrua manö ami. 22 Iadaʼa, mifaigi waʼasökhi dödö ba faʼabeʼe Lowalangi.+ Abeʼe ia ba ndraha satoru,+ hizaʼi sökhi dödönia khömi asala lö tebulö so ami barö waʼasökhi dödönia. Na löʼö, mutaba göi ami. 23 Na mamati ira, mufatöfa ira mangawuli+ börö me tola ifalua daʼö Lowalangi. 24 Na yaʼami manö nitaba moroi ba döla geu zaitu nisöndra ba ndruʼu, tola mufatöfa ami ba döla geu zaitu nifaliaro hewaʼae lö toʼölö mufalua daʼö, mendrua manö ndraha geu sindruhu tola mufatöfa ba döla geu zaitu andrö khöra!
25 He yaʼami ira talifusö, omasido na miʼila zi tobini niʼamoniʼö+ andre enaʼö lö miwaʼö tödömi atua-tua ami: So ösa ndraono Gizaraʼeli si lö tebulö ba waʼabeʼe högö irege moʼahonoa waʼato niha niʼowuloi moroi ba soi böʼö. 26 Daʼö mbörö wa teʼorifi dania fefu ndraono Gizaraʼeli.+ Tefaudu daʼa simane niwaʼö ba zura, ”Moroi ba Ziona+ dania iʼotarai sangorifi* andrö, ba iböhöli Yakobo* wamalua si lö sökhi föna Lowalangi. 27 Daʼa wawuʼusa ligu khöra+ me uheta horöra.”+ 28 Sindruhu sa, no tobali ira si faʼudu khö Lowalangi börö me lö latema duria somuso dödö, ba yaʼami zanöndra bua. Hizaʼi, börö mbuʼusa li Lowalangi khö ndra tuara, mufili ira tobali niha niʼomasiʼö.+ 29 Löʼö sa maniasa Lowalangi ba mbualania hegöi ba niha si no ifili. 30 Lö miʼoʼö li Lowalangi me mböröta,+ ba iadaʼa no mitema waʼahakhö dödö+ börö me lö moloʼö ira.+ 31 Tobali, mitema waʼahakhö dödö börö me lö moloʼö ira, ba iadaʼa latema göi waʼahakhö dödö. 32 Noa sa ikuru ira Lowalangi ba walömoloʼö andrö,+ enaʼö tola iforomaʼö waʼahakhö dödönia ba niha fefu.+
33 Sahöli-höli dödöda sa howu-howu Lowalangi andrö, faʼatua-tuania, ba faʼaboto ba dödönia! Lö aboto sibai ba dödöda gangetulania, ba lö ikhamö tödöda lalania andrö! 34 So ba zura, ”Haniha zangila era-era Yehowa,* mazui haniha zi tola mameʼe khönia mene-mene?”+ 35 Mazui, ”Haniha zameʼe hadia ia khö Lowalangi, irege moʼömö Lowalangi ba wanulöni khönia?”+ 36 Moroi khönia ba börö ia, ba no khönia fefu hadia ia. Yaʼia nifosumange irugi zi lö aetu. Yaduhu.