Nisura Mareko
7 So ösa ndra Farizaiʼo hegöi sangila amakhoita si tohare moroi ba Yeruzalema, owulo ira ba zinga Yesu.+ 2 Laʼila wa taʼunö danga ndra nifahaʼö Yesu me manga ira, yaʼia daʼö lö nisasaira tangara.* 3 (Ira Farizaiʼo hegöi niha Yahudi, laʼoʼö sibai zi toʼölö nifalua ndra tuara me föna, lasasai dangara irugi dalinga ziʼu fatua lö manga. 4 Na mangawuli ira moroi ba fasa, hasambalö lasasai ira fatua lö manga. Oya nasa zi toʼölö lafalua si tebai labulöʼö, duma-dumania foʼungugö mako, teko hegöi paci nifazökhi moroi ba tembaga.)+ 5 Börö daʼö, manofu ndra Farizaiʼo hegöi sangila amakhoita khö Yesu, ”Hana wa lö laʼoʼö zi toʼölö lafalua ira satua me föna ira nifahaʼömö, hizaʼi manga manö ira lö lasasai dangara?”+ 6 Imane khöra Yesu, ”Yaʼami niha samini tödö, tefaudu sibai wamaʼeleʼö nisura Yesaya khömi, ’Lafosumange ndraʼo niha andre faoma bewera, ba tödöra no aröu khögu.+ 7 Zaya-zaya gölöra wamosumangera yaʼo, börö me oroisa niha gulidanö nifahaʼöra, hulö na oroisagu daʼö.’+ 8 Lö ba dödömi oroisa Lowalangi ba mifalua zi toʼölö lafalua ira tuami.”+
9 Itohugö wangumaʼö Yesu, ”Onekhe sibai ami wangalui lala enaʼö lö miʼoʼö goroisa Lowalangi, ha börö zi toʼölö lafalua ira tuami andrö.+ 10 Duma-dumania imane Moze, ’Fosumange namau awö ninau,’+ ba ’Dozi si falele khö namania mazui inania, huku famunu hukumania.’+ 11 Hizaʼi mimane, ’Tola so zangumaʼö khö namania mazui inania, ”Tebai utolo ami börö me fefu gokhötagu hegöi faʼaurigu no ahori ubeʼe tobali sumange niʼosambuaʼö* khö Lowalangi.”’ 12 Börö daʼö, lö mitehegö ba niha wameʼe hadia ia khö namania mazui inania.+ 13 Andrö lö moguna daromali Lowalangi mibeʼe börö me lö mibato zi toʼölö lafalua ira tuami andrö.+ No oya nifaluami simane daʼa.”+ 14 Ifuli ikaoni niha sowulo ba daʼö Yesu imane khöra, ”Yaʼami fefu, mifondrondrongo niwaʼögu. Yaʼaboto ba dödömi daʼa:+ 15 Hadia zi möi bakha ba mbetuʼa niha, lö möi fotaʼunöisinia daʼö. Hizaʼi, si otarai moroi bakha ba zi samösa niha, daʼö zotaʼunöisi yaʼia.”+ 16* ——
17 Me no iröi ndra niha daʼö Yesu, möi ia bakha ba nomo, ibörögö lasofu khönia ira nifahaʼönia geluaha gamaedola daʼö.+ 18 Imane Yesu, ”Hadia lö göi aboto ba dödömi simane yaʼira? Hadia lö miʼila wa si möi bakha ba dalu niha, lö möi fotaʼunöisinia daʼö? 19 Börö me tenga ba dödönia möi daʼö, hizaʼi ba mbetuʼania. Aefa daʼö tetiboʼö ba lala zi taʼunö.” Börö daʼö, ifatunö Yesu wa lö taʼunö fefu gö. 20 Itohugö wangumaʼö, ”Sotaʼunöisi niha, si otarai moroi bakha.+ 21 Börö me bakha ba dödö niha+ iʼotarai fangera-ngera si lö sökhi: fohorö,* fanagö, fabunusa, 22 fohoröni donga zodonga, gamaʼuʼu, faʼalösökhi, falimosa, amuata si lö faʼaila,* faʼafökhö dödö, fangoʼaya, faʼasiliyawa, ba falötödö. 23 Fefu zi lö sökhi andrö kalua moroi bakha ba dödö, daʼö zi tola motaʼunöisi niha.”
24 Mofanö ia moroi ba daʼö numalö ba mbanua Diro hegöi ba Zidona.+ Möi ia bakha ba nomo ba lö omasi ia na so zangila yaʼia. Hizaʼi, hasambalö laʼila ia niha. 25 Me no irugi, so samösa ndra alawe samondrongo turia Yesu, no ifakao nononia malaʼika si lö sökhi. Tohare ndra alawe daʼö ituhi danö föna Yesu.+ 26 Niha Yunani ndra alawe daʼö, banua* Ziria-Wönikia. Iforege wangandrö khö Yesu enaʼö ifofanö malaʼika si lö sökhi andrö moroi ba mboto nononia. 27 Imane Yesu, ”Lö sökhi na lahalö gö ndraono ba lafazaumba ö nono nasu. Iraono andrö ua zi oföna muʼabusoiʼö.”+ 28 Itema linia ira alawe andrö, ”Atulö Pa, hizaʼi niʼa nono nasu yaʼia daʼö satoru tou ba narö meza, hama-hama gö ndraono.” 29 Imane khönia Yesu, ”Börö me öwaʼö daʼö, angawuli, no aheta malaʼika si lö sökhi andrö moroi ba mboto nonou.”+ 30 Mangawuli ndra alawe daʼö, iʼila nononia no ifadölö ia wemörö, ba no aheta malaʼika si lö sökhi andrö ba mbotonia.+
31 Me mangawuli Yesu moroi ba Diro, numalö ia ba Nasi Galilaia, itörö mbanua Zidona italuʼi Dekafoli.*+ 32 Laʼohe khönia ba daʼö samösa ndra matua safiso ba si lö hede.+ Laʼandrö khö Yesu enaʼö itufa tangania. 33 Iʼohe niha andrö ba zaröu. Aefa daʼö, me lö niha ba zi fasuira, iʼoroʼö durunia ba dalinga niha andrö. Me no aefa mangendrilo ia, itufa lela niha daʼö.+ 34 Ifaöga hörönia Yesu, ara ifahasu ia imane, ”Effata,” eluahania ”Yateboka”. 35 Iʼanemaiʼö teboka dalinga niha andrö,+ aefa wesu lelania ba tola fahuhuo ia simane si toʼölö. 36 Itegu niha sato Yesu enaʼö böi lafatunö gofu haʼökhö.+ Hizaʼi ihötöi itegu, ihötöi ladunö-dunö misa.+ 37 Ahöli-höli dödöra+ ba lamane, ”Sahöli-höli dödöda fefu nifaluania. Niha safiso tola larongo li niha ibeʼe, ba si lö hede tola fahuhuo.”+