Nisura Yohane
12 Önö hari fatua lö alua Wasa, ofeta Yesu ba Mbetania, banua Lazaro+ nisusugi Yesu moroi ba gotalua zi mate. 2 Labeʼe gö Yesu bongi daʼö, Marata zondrino.+ Modadao Lazaro fao ia wemanga awö Yesu. 3 Aefa daʼö, ihalö Maria wanikha somuhua yaʼia daʼö sindruhu-ndruhu fanikha naridu sebua böli, te matonga liter.* Ibayoini gahe Yesu, iʼosi faoma bunia irege afönu nomo hua wanikha andrö.+ 4 Samösa moroi ba gotalua nifahaʼö sotöi Yuda banua Gariota+ si manga mbölinia dania imane, 5 ”Hana wa lö mufamawa wanikha andrö 300 dinar,* ba kefe daʼö tabeʼe ba niha si numana?” 6 Sindruhunia, wa iwaʼö daʼö tenga börö waʼahakhö dödönia niha si numana, hizaʼi börö me managö-nagö ia. Yaʼia zololohe naha gefe ba asese itagö-tagö. 7 Imane Yesu, ”Böi mitaha ia wamalua daʼa si tobali tandra wamaʼanö ba luo wogoʼo yaʼo.+ 8 Lö tebulö fao khömi zi numana,+ hizaʼi tenga sagötö faʼara wefaoda.”+
9 Gasa-gasa daʼö, ato niha Yahudi sangila wa so Yesu ba daʼö. Tohare ira tenga ha ba wamalukhaisi yaʼia, hizaʼi ba wamaigi Lazaro nisusuginia moroi ba gotalua zi mate.+ 10 Iadaʼa mamagölö ndra kafalo gere ba wamunu Lazaro göi, 11 ha börö ia wa ato niha Yahudi si möi ba daʼö ba mamati ira khö Yesu.+
12 Mahemolunia, ato niha si möi ba gowasa, ba larongo wa möi Yesu ba Yeruzalema. 13 Lahalö mbulu nohi ba laʼondrasi ia. Muʼao ira lamane, ”He Lowalangi, lumöʼö* ia! Yatefahowuʼö zi tohare ba döi Yehowa,*+ Razo ndraono Gizaraʼeli!”+ 14 Me isöndra nono galide andrö Yesu, modadao ia yawa+ simane si no tesura, 15 ”Böi ataʼufi yaʼugö Siona! Hiza tohare razomö, modadao ia ba hulu nono galide.”+ 16 Lö aboto ba dödö ndra nifahaʼö ba wamobörö, hizaʼi me tefolakhömi Yesu+ awena itörö tödöra wa fefu nifalua niha andrö tefaudu simane si no tesura sanandrösa khönia.+
17 Lö tebulö lafaduhuʼö ia+ niha sato si fao khönia me luo daʼö, me ikaoni Lazaro moroi ba lewatö+ ba isusugi moroi ba gotalua zi mate. 18 Daʼö mbörö wa ato zangondrasi yaʼia börö me larongo no ifalua dandra sahöli-höli dödö andrö. 19 Faoma lamane ira Farizaiʼo, ”Faigi atö, lö eluaha nifaluada. Ahori laʼoʼö ia fefu niha.”+
20 Me luo daʼö, so ösa niha Yunani si möi ba gowasa andrö ba wamosumange Lowalangi. 21 Fahuhuo ira khö Wilifo+ si otarai Mbetisaida si so ba Galilaia lamane, ”He Pa, omasiga falukha khö Yesu.” 22 Ifatunö daʼa Filifo khö Gandrea ba möi ira laʼombakhaʼö khö Yesu.
23 Imane khöra Yesu, ”No irugi inötö tefolakhömi Nono niha.+ 24 Sindruhu-ndruhu niwaʼögu, na lö atoru ba danö zi sambua ngawua gandru ba mate, lö tebulö wa ngawua gandru daʼö. Hizaʼi na mate,+ oya mbuania mangawuli. 25 Haniha zangomasiʼö nosonia, daʼö zamaʼala yaʼia, ba haniha zanehegö aetu nosonia+ börö ndraʼo ba gulidanö daʼa, daʼö zolumöʼö yaʼia ba wanöndra faʼauri si lö aetu.+ 26 Na so zomasi möi enonigu, ba hasambalö iʼoʼö ndraʼo. Hezo so ndraʼo, ba daʼö so göi genonigu.+ Na so zomasi möi enonigu, ifosumange ia Ama. 27 Abu dödögu iadaʼa,+ ba hadia zinangea uwaʼö? He Ama, efaʼö ndraʼo ba waʼabu dödö andre.+ Hewaʼae simanö, tohare ndraʼo ba wanaögö faʼabu dödö. 28 He Ama, folakhömi döimö.” Aefa daʼö terongo li moroi ba zorugo,+ ”No ufolakhömi ba ufolakhömi nasa dania.”+
29 Larongo li daʼö niha sato ba lawalinga ugu-ugu mbanua. Tanö böʼö lamane, ”So malaʼika si fahuhuo khönia.” 30 Imane Yesu, ”Tenga soguna khögu wa terongo li daʼö hizaʼi soguna khömi. 31 Iadaʼa no tehuku gulidanö ba tetiboʼö baero+ zamatörö ulidanö+ andre. 32 Na tefazawa ndraʼo moroi ba gulidanö,+ udönisi fefu niha moroi ba ngawalö soi.” 33 Sindruhunia, wa iwaʼö daʼö ba wangoromaʼö hewisa dania na mate ia ba zi lö ara tö.+ 34 Lamane niha sato, ”No marongo ba Goroisa Moze wa so Keriso sagötö faʼara.+ Ba hana wa öwaʼö hasambalö tefazawa Nono niha?+ Haniha Nono niha andrö?” 35 Imane Yesu, ”Lö ara tö toröi haga andrö ba gotaluami. Miʼowaö-waö fatua so haga andrö enaʼö lö ihawui ami faʼogömi-gömi. Niha sowaö-waö ba zogömi-gömi lö iʼila hezo numalö ia.+ 36 Fatua so khömi haga andrö, miʼamati khönia enaʼö tobali ami ono haga.”+
Me no aefa iwaʼö daʼö, mofanö Yesu, ibiniʼö ia khöra. 37 Hewaʼae oya ifalua dandra sahöli-höli dödö fönara, hizaʼi lö faduhu dödöra khönia, 38 irege itörö niwaʼö Yesaya samaʼeleʼö yaʼia daʼö, ”He Yehowa,* haniha zamati ba duria nirongora moroi khöma?+ Ba haʼökhö teforomaʼö waʼabölö* Yehowa?”*+ 39 Ifatunö göi Yesaya hadia mbörö wa lö faduhu dödöra, 40 ”Noa sa imbawainö höröra ba no iʼabeʼeʼö dödöra enaʼö lö laʼila faoma höröra ba lö aboto ba dödöra, ba lafuli ira khögu ba ufadöhö ira.”+ 41 Wa iwaʼö daʼö Yesaya börö me iʼila lakhömi Keriso.+ 42 Sindruhunia, ato niha hegöi ira sondröniaʼö samati khö Yesu,+ hizaʼi ataʼu ira wamaduhuʼö börö ndra Farizaiʼo enaʼö lö lafofanö ira moroi ba nahia waʼowulo.*+ 43 Abölö omasi ira lakhömi nibeʼe niha moroi ba lakhömi Lowalangi.+
44 Muʼao Yesu, ”Haniha zamati khögu tenga ha khögu mamati ia, hizaʼi khö zamatenge yaʼo.+ 45 Dozi sangila yaʼo ba no iʼila zamatenge yaʼo.+ 46 Möi ndraʼo ba gulidanö tobali haga,+ enaʼö dozi samati khögu lö mowaö-waö ba zogömi-gömi.+ 47 Na so zamondrongo fehedegu ba na lö ifalua, lö uhuku ia. Wa tohare ndraʼo tenga ba wanguhuku ulidanö hizaʼi ba wangorifi ulidanö.+ 48 So zanguhuku si lö moloʼö ba si lö manemaʼö fehedegu. Fehede si no ufaʼema andrö zanguhuku yaʼia dania ba ngaluo safuria. 49 Lö fahuhuo ndraʼo ba zomasi dödögu. Hizaʼi, Ama samatenge yaʼo zangumaʼö hadia zinangea uwaʼö ba ufatunö.+ 50 Aboto ba dödögu goroisania andrö tobali fangorifi irugi zi lö aetu.+ Börö daʼö, gofu hadia niwaʼögu ufaʼema simane sibai nifatunö Nama khögu.”+