Nisura Luka
22 No ahatö ginötö ba wamalua Owasa Roti si Lö Mufaruka Ragi,+ nifotöi Wasa.+ 2 Laʼalui lala si tefaudu ira kafalo gere hegöi sangila amakhoita ba wamunu Yesu,+ börö me ataʼu ira niha sato.+ 3 Aefa daʼö, möi Zatana ba dödö Yuda nifotöi Kariota, samösa moroi ba gotalua zinenge Yesu si 12.+ 4 Ifalukhaisi ndra kafalo gere hegöi kafalo zanaro osali ba mamagölö ia khöra ba wemanga böli Yesu.+ 5 Omuso dödöra ba lazazi khönia wameʼe kefe firö.+ 6 Fao dödö Yuda ba iʼalui ginötö si tefaudu ba wameʼe Yesu ba dangara ba zi lö laʼila niha.
7 Irugi inötö Gowasa Roti si Lö Mufaruka Ragi, yaʼia daʼö ba wanaba urifö Gowasa Fasa.+ 8 Imane Yesu khö Wetero hegöi Yohane, ”Miʼaeʼe mifaʼanö wemanga Wasa khöda.”+ 9 Manofu ira, ”Hezo so zomasiʼö mafaʼanö Gowasa Fasa andrö?” 10 Imane khöra, ”Na möi ami ba mbanua, so dania samösa ndra matua solohe naha nidanö zamalukhaisi yaʼami. Miʼoʼö ia gofu hezo nomo möi ia.+ 11 Aefa daʼö mimane ba zokhö omo, ’No iwaʼö Samahaʼö, ”Hezo mbateʼe dome si tola uʼogunaʼö ba wemanga Wasa si fao ira nifahaʼögu?”’ 12 Ituturu dania khömi sambua mbateʼe sebua ba lote si no muʼehaogö enaʼö taʼogunaʼö. Ba daʼö mifaʼanö wemanga Wasa khöda.” 13 Mofanö ira, ba laʼila wa itörö fefu niwaʼö Yesu khöra ba lafaʼanö Wasa.
14 Me irugi inötö, modadao Yesu fao ndra sinengenia.+ 15 Aefa daʼö imane, ”No udöna-döna wemanga Wasa andre fao khömi fatua lö tefakao ndraʼo, 16 ba uʼombakhaʼö khömi, lö irai uʼa saʼae dania irege itörö fefu zi no mufaʼeleʼö ba Wamatörö Lowalangi.” 17 Me no aefa ihalö mako, iʼandrö saohagölö khö Lowalangi ba imane, ”Halö mako andre ba midozigö ami, 18 ba uʼombakhaʼö khömi, iʼotarai iadaʼa lö saʼae ubadu nagu dania irege tohare Wamatörö Lowalangi.”
19 Aefa daʼö, ihalö roti,+ iʼandrö saohagölö khö Lowalangi. Iboboto roti andrö ba ibeʼe khöra imane, ”Amaedola mbotogu daʼa+ nibeʼe soguna khömi.+ Böi miböhöli wamalua daʼa ba wanörö tödö yaʼo.”+ 20 Me no aefa manga ira ba zi bongi, ifalua göi zimane daʼö ba mako andrö. Imane, ”Mako andre amaedola mbuʼusa li si bohou+ si no muʼetuʼö ba ndrogu,+ niduwagö soguna khömi.+
21 ”Hizaʼi, so zi manga mböligu si fao khögu wedadao ba zinga meza andre.+ 22 Mofanö dania Nono niha simane si no muhonogöi.+ Hizaʼi, alai niha si manga mbölinia!”+ 23 Ibörögö lafadunö-dunö haniha sindruhunia ba gotaluara zamalua daʼö.+
24 Hizaʼi lafadöni göi haniha zabölö ebua ba gotaluara.+ 25 Imane khöra, ”Mamatörö razo ba nono mbanuania, ba niha samatörö yaʼira lafotöi niha Soböwö.+ 26 Hizaʼi, tebai simane daʼö ami.+ Haniha zabölö ebua ba gotaluami yatobali ia simane siakhi,+ ba niha sondröniaʼö yatobali simane enoni. 27 Haniha zabölö ebua, niha si manga mazui enoninia? Tatu manö niha si manga. Hizaʼi, tobali ndraʼo enonimi.+
28 ”Yaʼami niha si lö faröi khögu+ me göna ndraʼo fanandraigö.+ 29 Fawuʼu li ndraʼo khömi wa fao ami ba zi sambua famatörö simane Amagu si no fawuʼu li khögu,+ 30 enaʼö fao ami wemanga ba mamadu ba meza Wamatörögu,+ ba modadao ami ba wanguhuku+ si 12 mado Gizaraʼeli.+
31 ”He Simoni, he Simoni, faigi! No iʼandrö Satana ba wanafiʼö* yaʼami simane gandru.+ 32 Hizaʼi, no uʼandrö khö Lowalangi börö ndraʼugö, enaʼö lö taya wamatiu.+ Na no öfalalini gera-erau, abeʼeʼö ndra talifusöu.”+ 33 Imane Fetero, ”He Soʼaya, utehegö möido ba gurunga ba mate ndraʼo awöu.”+ 34 Imane Yesu, ”He Fetero, ufatunö khöu, fatua lö miwo zilatao maʼökhö andre, no tölu kali öʼosilöʼögö ndraʼo.”+
35 Imane göi khöra, ”Me ufatenge ami enaʼö lö miʼohe naha gefe, naha gö, ba sandrala,+ lö hadöi soʼamböta ami lö?” Latema linia, ”Löʼö!” 36 Itohugö wangumaʼö, ”Hizaʼi, iadaʼa na so naha gefemi mazui naha gö, miʼohe daʼö. Na lö hadöi födami, miʼamawa mbarumi tanö baero ba miʼöli wöda. 37 So ba zura, ’Lafotöi ia sanawö huku.’+ Ufatunö khömi wa khögu manandrösa ayati daʼö. No alua nisura sanandrösa khögu.”+ 38 Ba lamane khönia, ”He Soʼaya, faigi atö! So ba daʼa dua rozi wöda.” Imane Yesu, ”Ibönö daʼö.”
39 Simane si toʼölö, möi ia ba Hili Zaitu ba laʼoʼö ia ira nifahaʼö.+ 40 Me larugi daʼö imane khöra Yesu, ”Böi miböhöli wangandrö, enaʼö böi aekhu ami ba wanandraigö.”+ 41 Ifandröndröu ia föna maʼifu moroi khöra, aefa daʼö ituhi danö ba ibörögö wangandrö, 42 ”He Ama, na tola fataluʼiʼö khögu mako andre. Hizaʼi böi fatörö ba zomasi ndraʼo, yaʼitörö zomasi ndraʼugö.”+ 43 Aefa daʼö, tohare malaʼika moroi ba zorugo ba wangabölöʼö yaʼia.+ 44 Hizaʼi abu sibai dödönia, andrö iforege wangandrö.+ Böböinia hulö ndro sowöi tou ba danö. 45 Me no awai mangandrö ia, ifalukhaisi ndra nifahaʼönia. No mörö ira börö waʼamarase ba waʼabu dödö.+ 46 Imane khöra, ”Hana wa mörö ami? Mifaoso, böi miböhöli wangandrö enaʼö böi aekhu ami ba wanandraigö.”+
47 Gasa-gasa wahuhuosania, tohare niha sato nidöniaʼö Yuda, samösa moroi ba gotalua zinengenia si 12. Ifahatö ia khö Yesu aefa daʼö iʼuma.+ 48 Imane khönia Yesu, ”He Yuda, hadia faʼuma ndraʼugö ba wemanga böli Nono niha?” 49 Börö me laʼila hadia zalua, lamane ira nifahaʼö si so ba zingania, ”He Soʼaya, hadia masuwö ira faoma föda?” 50 Samösa moroi ba gotaluara zanaba talinga kambölö zawuyu gere sebua irege aetu.+ 51 Imane Yesu, ”Noa daʼö.” Aefa daʼö, ibabaya dalinga zawuyu andrö ba ifadöhö. 52 Imane Yesu khö ndra kafalo gere, kafalo zanaro osali, hegöi ira sondröniaʼö si möi mondraʼu yaʼia, ”Hadia sorabu ndraʼodo andre wa miʼohe wöda awö wagado?+ 53 Ero maʼökhö so ndraʼo ba gosali khömi,+ ba lö miraʼu ndraʼo.+ Hizaʼi, no irugi inötö khömi, ba iadaʼa no inötönia mamatörö zogömi-gömi.”+
54 Laraʼu ba laʼohe ia+ ba nomo gere sebua. Hizaʼi, igoʼö-goʼö ia Fetero moroi ba zaröu.+ 55 Ba dalu golayama nomo andrö, no lafohola galitö ba modadao niha fasui. Modadao göi Wetero ba gotaluara.+ 56 Samösa zawuyu ira alawe sangila me modadao ia ba zinga galitö, ihaogö ifaigi-faigi Wetero ba imane, ”Yaʼia andre awö niha daʼö.” 57 Hizaʼi mangosilöʼögö Wetero imane, ”Lö uʼila haniha ia.” 58 Lö ara aefa daʼö, laʼila ia niha böʼö ba lamane, ”Samösa ndraʼugö moroi ba gotaluara.” Imane Fetero, ”Tenga.” + 59 Mato sambua za aefa daʼö, so zangumaʼö si fao faʼafaduhu dödö, ”Awönia göi niha daʼa. Yaʼia andre niha Galilaia!” 60 Imane Fetero, ”Lö uʼila hadia niwaʼömö.” Iʼanemaiʼö miwo zilatao me fahuhuo ia. 61 Ba ginötö daʼö, ifakhölö ia Yesu* ba wamaigi Fetero. Itörö tödö Wetero hadia niwaʼö Zoʼaya khönia, ”Fatua lö miwo zilatao maʼökhö andre, no tölu kali öʼosilöʼögö ndraʼo.”+ 62 Mofanö ia baero, aefa daʼö iduhugö wege-ege.
63 Aefa daʼö, ibörögö laʼoʼaya+ ba laböbözi Yesu ira niha sanaha yaʼia.+ 64 Labalugö mbawania ba lamane, ”Na samaʼeleʼö ndraʼugö, fatunö khöma haniha zamözi yaʼugö!” 65 Oya nasa wehede fangoʼaya niwaʼöra khönia.
66 Me arakhagö moluo, owulo fefu ndra sondröniaʼö, yaʼia daʼö ira kafalo gere ba sangila amakhoita.+ Laʼohe ia ba gödo Zangetuʼö Huku ba lamane, 67 ”Na sindruhu Keriso ndraʼugö, fatunö khöma.”+ Itema lira, ”Na ufatunö khömi, ba lö faduhu dödömi. 68 Na usofu khömi, ba lö mitema ligu. 69 Iʼotarai iadaʼa, modadao Nono niha+ ba gambölö Lowalangi fondrege zabölö.”+ 70 Aefa daʼö, manofu ira khönia, ”Na simanö, hadia Ono Lowalangi ndraʼugö?” Itema li, ”Atulö, simane niwaʼömi.” 71 Lamane, ”Lö moguna taʼalui zamaduhuʼö tanö böʼö saʼae. No tarongo samösa yaʼi moroi ba mbawania.”+