Sura Yohane Siföföna
4 Yaʼami ira talifusö niʼomasiʼö, böi mifaduhusi tödö fefu wehede* si hulö moroi khö Lowalangi.+ Hizaʼi, mitandraigö ua samuza hadia moroi khö Lowalangi wehede* daʼö,+ börö me ato zamaʼeleʼö sofaya ba gulidanö andre.+
2 Simane daʼa enaʼö aboto ba dödömi wa fehede andrö moroi khö Lowalangi: Na ifaduhuʼö wa no möi Yesu Keriso ba gulidanö tobali niha, moroi khö Lowalangi wehede daʼö.+ 3 Ba na lö ifaduhuʼö Yesu, tenga moroi khö Lowalangi wehede andrö,+ hizaʼi moroi ba niha si faʼudu khö Keriso. No mirongo wa hasambalö tohare daʼö,+ ba no so ba gulidanö iadaʼa.+
4 Yaʼami iraono, okhöta Lowalangi ami ba no mikalaisi ira+ börö me abölö zi hasara tödö khömi+ moroi ba zi hasara tödö ba gulidanö.+ 5 Moroi ba gulidanö ira,+ irege fefu niwaʼöra moroi ba gulidanö ba ifondrondrongo wehedera ulidanö.+ 6 Moroi khö Lowalangi ita. Niha saboto ba dödö khö Lowalangi ifondrondrongo ita,+ na si tenga moroi khö Lowalangi lö ifondrondrongo ita.+ Simanö lalada ba wamaehusi fehede satulö ba si sala.+
7 Yaʼami ira talifusö niʼomasiʼö, böi taböhöli wangomasiʼö awöda,+ börö me faʼomasi andrö moroi khö Lowalangi. Niha samalua faʼomasi daʼö nono Lowalangi ba aboto ba dödönia Lowalangi.+ 8 Si lö mangomasiʼö awönia ba lö saboto ba dödönia Lowalangi, börö me Lowalangi andrö no faʼomasi.+ 9 Daʼa lala Lowalangi ba wangoromaʼö faʼomasinia khöda: Ifatenge Nononia si ha sambua+ ba gulidanö enaʼö tasöndra waʼauri ba döinia.+ 10 Ifatenge Nononia Lowalangi tobali sumange+ fangatulö ba horöda,+ tenga börö me no taʼomasiʼö ia hizaʼi börö me no iʼomasiʼö ita.
11 Yaʼami ira talifusö niʼomasiʼö, na simane daʼa lala Lowalangi ba wangomasiʼö yaʼita, moʼömö göi ita ba wangomasiʼö awöda.+ 12 Lö hadöi niha si no irai mangila Lowalangi.+ Hizaʼi, na faoma taʼomasiʼö nawöda, lö tebulö fao khöda Lowalangi ba moʼahonoa waʼomasinia ba waʼaurida.+ 13 No taʼila wa hasara dödöda khönia, ba hasara dödönia khöda, börö me no ibeʼe khöda geheha niʼamoniʼö. 14 Baero daʼö, no maʼila samösa ba mafaduhuʼö wa no ifatenge Nononia Ama tobali sangorifi niha gulidanö.+ 15 Na so zamaduhuʼö wa Yesu andrö Ono Lowalangi,+ lö tebulö hasara dödö Lowalangi khönia, ba hasara dödönia khö Lowalangi.+ 16 No taʼila ba faduhu dödöda wa iʼomasiʼö ita Lowalangi.+
Lowalangi andrö no faʼomasi.+ Niha si lö tebulö ba wamalua faʼomasi, hasara dödönia khö Lowalangi ba hasara dödö Lowalangi khönia.+ 17 Daʼö mbörö wa moʼahonoa waʼomasi ba waʼaurida, irege lö alawö ita+ fahuhuo na luo wanguhuku andrö, börö me fagölö ita Keriso yaʼita si so ba gulidanö andre. 18 Lö faʼataʼu ba waʼomasi andrö.+ Ifofanö waʼataʼu faʼomasi soʼahonoa, börö me faʼataʼu andrö zanaisi yaʼita. Niha sataʼu lö moʼahonoa waʼomasinia.+ 19 Taʼomasiʼö Lowalangi börö me no oföna iʼomasiʼö ita.+
20 Na so zangumaʼö, ”Uʼomasiʼö Lowalangi,” ba na fatiu dödönia khö dalifusönia, no si falimo ia.+ Si lö mangomasiʼö talifusönia+ niʼila hörönia, tebai iʼomasiʼö Lowalangi si lö iʼila hörönia.+ 21 No tatema goroisa daʼa khönia: Sangomasiʼö Lowalangi lö tola löʼö iʼomasiʼö dalifusönia.+