Dua Korindro
8 Yaʼami ira talifusö, omasiga na miʼila iadaʼa hewisa waʼasökhi dödö sebua* moroi khö Lowalangi niforomaʼönia ba mbanua niha Keriso misa ba Makedonia.+ 2 Sagötö ba wanaögöra famakao ba fanandraigö sabölö-bölö, fahöna waʼoböwö ba faʼomuso dödöra hewaʼae numana ira. 3 Labeʼe ndrohu-ndrohu zi sagu khöra.+ Sindruhunia, töra nibeʼera moroi ba waʼabölöra.+ No uʼila samösa. 4 Yaʼira samösa zamorege khöma enaʼö mabeʼe khöra halöwö si sökhi andrö ba wameʼe tolo-tolo, ba fao ira ba wanolo niha niʼamoniʼö.+ 5 Hadia nifaluara töra moroi ba zi no matötöna. Si oföna, lalulu waʼaurira khö Zoʼaya hegöi khöma simane ohitö dödö Lowalangi. 6 Börö daʼö, maʼandrö khö Dito+ enaʼö iʼasiwai wangowuloi tolo-tolo nibeʼemi si fao faʼaoha gölö, börö me yaʼia zamörögö fangowuloi ba gotaluami. 7 Sökhi sibai gamuatami ba ngawalö hadia ia: So khömi wamati saro, onekhe ami fahuhuo, oya waʼaboto ba dödömi, soroi ba dödömi wamalua hadia ia, miʼomasiʼö niha böʼö simane fangomasiʼöma yaʼami. Iadaʼa, yaʼoböwö ami ba wameʼe tolo-tolo.+
8 Uwaʼö daʼa tenga ba wameʼe khömi fareta, hizaʼi ba wangombakha khömi fangodödögö nifalua niha böʼö ba utandraigö waʼomasimi soroi ba dödö. 9 No aboto ba dödömi waʼasökhi dödö sebua* moroi khö Zoʼaya yaʼita Yesu Keriso, yaʼia daʼö hewaʼae kayo ia, itehegö numana ia börö ami,+ enaʼö kayo ami ba waʼanumanania andrö.
10 Moloʼö yaʼo,+ mitema mbua na no awai halöwö daʼa, börö me no döfi mibörögö ba zilalö ba soroi ba dödömi wamalua yaʼia. 11 Andrö iadaʼa, miʼasiwai hadia zi no mibörögö andrö soroi ba dödö dali waʼaso khömi zamösana. 12 Na so zameʼe soroi ba dödö, omuso dödö Lowalangi börö me omasi ia na so niha sameʼe ndrohu-ndrohu zi sagu khönia,+ tenga si tebai sagu khönia. 13 Eluaha niwaʼögu tenga enaʼö aoha noro niha böʼö ba monönö waʼabua noromi. 14 Omasido na fagölö-gölö noromi: Hadia zi töra ba khömi möi fombönökhi zoʼamböta ira, ba si töra khöra möi fombönökhi zoʼamböta ami. 15 Tefaudu daʼa ba ayati sangumaʼö, ”Lö si töra ba zoya mangowuloi, ba lö moʼamböta ba zi lö oya-oya mangowuloi.”+
16 Maʼandrö saohagölö khö Lowalangi börö me yaʼia mbörö wa iʼameʼegö tödö ami Tito, simane yaʼaga woʼameʼegö tödö yaʼami,+ 17 börö me no iʼoʼö niʼandröma Tito, ba soroi ba dödönia göi wamalua niʼandröma irege möi ia khömi iadaʼa börö waʼedönania samösa. 18 Mafatenge göi dalifusöda tanö böʼö si fao khönia. Lasuno dalifusöda daʼö ira talifusöda ba mbanua niha Keriso börö nifaluania ba duria somuso dödö. 19 Baero daʼö, latuyu ia ira talifusöda ba mbanua niha Keriso enaʼö fao ia khöma na mubagi dolo-tolo andre. Mafalua ia ba wamolakhömi Soʼaya ba mafaduhuʼö waʼowölö-ölöma ba wanolo niha böʼö. 20 Börö daʼö, mangelama ndraʼaga enaʼö böi so zamöbögö khöma si lö duhu ba wombagi tolo-tolo sebua andre.+ 21 ’Mafalua fefu hadia ia si lö falimosa, tenga ha föna Yehowa* hizaʼi föna niha.’+
22 Baero daʼö, mafatenge zui dalifusöda tanö böʼö si fao khöra. No asese matandraigö ia ba lö tebulö waʼowölö-ölönia, iadaʼa itugu owölö-ölö ia börö me faduhu dödönia khömi. 23 Na so zanofu sanandrösa khö Dito, mimane wangumaʼö wa yaʼia andrö awögu, si falulu fohalöwö khögu ba zoguna khömi. Na so wanofu sanandrösa khö ndra talifusöda andrö, mimane wangumaʼö nifatenge mbanua niha Keriso ira ba samolakhömi Keriso. 24 Andrö miforomaʼö dandra wa miʼomasiʼö ira,+ ba miforomaʼö ba mbanua niha Keriso hadia mbörö wa masuno ami.