Dua Ngaʼötö

35 Ifalua Gowasa Fasa+ Yosia khö Yehowa ba Yeruzalema, ba lataba zumange Wasa+ ba ngaluo si 14 ba mbaŵa siföföna.+ 2 Itatugöi halöwö ndra ere ba ibeʼe khöra wamarou dödö enaʼö lafalua halöwöra ba nomo Yehowa.+ 3 Imane khö ndra niha Lewi, khö ndra samahaʼö ba zi sagörö tanö Gizaraʼeli,+ ba khö ndra niha niʼamoniʼö khö Yehowa, ”Mibeʼe Dawöla niʼamoniʼö andrö ba nomo nifazökhi Zelomo ono Dawido razo ndraono Gizaraʼeli.+ Böi saʼae mifazawa ba galisimi.+ Iadaʼa, mifosumange Lowalangimi Yehowa hegöi ono mbanuania Izaraʼeli. 4 Mifaʼanö ami moloʼö ösi nomo zatuami ira matua, moloʼö ngawawami, simane nisura Dawido+ razo ndraono Gizaraʼeli hegöi nisura nononia Selomo.+ 5 Miʼozizio ba nahia niʼamoniʼö moloʼö ngawawami, enaʼö so sambua ngawawa moroi ba nösi nomo ndra tuami niha Lewi zanolo ösi nomo dalifusö zatuami ira matua, yaʼia nono mbanua andrö. 6 Mitaba zumange Wasa andrö,+ miʼamoniʼö ami, ba mifaʼanö zoguna khö ndra talifusömi ba wamalua si no ifaʼema Yehowa khö Moze.”

7 Mamuala Yosia ba soi daʼö, ibeʼe nambi ba biri-biri yaʼia daʼö, ono mbiri-biri si matua ba ono nambi si matua nibaliʼö sumange ba Wasa ba niha sangondrasi. Faʼoyania 30.000 ngaʼeu nambi awö mbiri-biri, ba 3.000 ngaʼeu zawi. Fefu daʼö okhöta Razo.+ 8 Labeʼe göi dolo-tolo si no aoha gölö ira sondröniaʼö ba nono mbanua, khö ndra ere, hegöi ba niha Lewi. Mamuala göi Hilikia,+ Zakharia, ba Yehieli, sondröniaʼö ba nomo Lowalangi sindruhu, labeʼe khö ndra ere 2.600 ngaʼeu zumange Wasa ba 300 ngaʼeu zawi. 9 Mamuala Khanania, Semaya, Netaneʼeli, ira talifusönia, simanö göi Hasabia, Yeieli, ba Yosabada, ira sondröniaʼö niha Lewi, labeʼe 5.000 ngaʼeu zumange Wasa ba 500 ngaʼeu zawi ba niha Lewi.

10 Me no awai lafaʼanö zumange andrö, mozizio ndra ere ba nahiara, ba mozizio niha Lewi moloʼö ngawawara,+ simane niwaʼö Razo. 11 Lataba zumange Wasa+ ba latefeʼö ndro si no latema ira ere moroi ba danö böʼö,+ ba niha Lewi zamoʼa uli gurifö.+ 12 Ba lahenaigö zumange nitunu enaʼö labagi ba nono mbanua andrö, nifongawawa moloʼö ösi nomo zatua ira matua, enaʼö tola labeʼe daʼö sumange khö Yehowa, simane si no tesura ba goroisa Moze. Simane daʼö göi nifaluara ba zawi andrö. 13 Larino* zumange Wasa ba galitö simane si toʼölö lafalua.+ Larino zumange niʼamoniʼö ba kukusa, ba mbowoa, ba mbalanga sebua, ba iʼanemaiʼö laʼohe föna nono mbanua andrö. 14 Lafaʼanö zumange soguna khöra hegöi khö ndra ere, börö me lö laböhöli ira ere, ngaʼötö Gaʼaroni, ba wameʼe sumange nitunu hegöi tawö. Lafalua daʼö ofeta bongi. Börö daʼö, lafaʼanö zumange soguna khöra ira niha Lewi hegöi khö ndra ere ngaʼötö Gaʼaroni.

15 Laʼiagö nahara ira sanunö, yaʼia daʼö iraono Gasafo,+ simane niʼoroisi Dawido,+ Asafo,+ Hemano, Yedutuno,+ sangiʼila andrö khö Razo. Hizaʼi, misa ba mbawa göli so zanaro.+ Lö laröi nahiara wohalöwö börö me ira talifusöra niha Lewi zamaʼanö sumange khöra. 16 Me luo daʼö, fefu zi no lahenaigö ba wamosumange Yehowa, moguna ia ba wamalua Owasa Fasa+ ba labeʼe zumange nitunu ba naha wanunu sumange khö Yehowa, simane si no iwaʼö Razo Yosia.+

17 Lafalua Wasa iraono Gizaraʼeli si tohare me luo daʼö hegöi Owasa Roti si Lö Mufaruka Ragi, fitu hari waʼara.+ 18 Lö irai mufalua Wasa simane daʼö ba ndraono Gizaraʼeli iʼotarai ba götö Zamueli samaʼeleʼö. Lö irai lafalua Wasa ira razo ndraono Gizaraʼeli simane nifalua Yosia,+ ira ere, niha Lewi, ba fefu niha Yehuda hegöi iraono Gizaraʼeli awö mbanua Yeruzalema. 19 Mufalua Wasa andre me no 18 fakhe mamatörö Yosia.

20 Me no awai daʼö fefu ba me no ifaʼanö gosali andrö Yosia, tohare Nekho+ razo Miserai, möi ia fasuwö ba Garikemi sahatö ba Nungo Nidanö Oiferati. Ba möi ifalukhaisi ia Yosia.+ 21 Ifaʼema goroisania Nekho imane, ”Hadia urusamö khögu Razo niha Yehuda? Tenga ba wolawa yaʼugö wa tohare ndraʼo maʼökhö. Fasuwötagu andre ba wolawa ösi nomo tanö böʼö, ba Lowalangi zamatenge yaʼo wamalua daʼa ba waʼalio. Böi lawa Lowalangi samatenge yaʼo börö me si sökhi khöu daʼa. Na löʼö, ifakiko ndraʼugö.” 22 Lö mofanö Yosia, iʼalui lala enaʼö tobali ia niha böʼö+ ba wolawa Nekho. Lö ifondrondrongo wehede Nekho, si otarai mbawa Lowalangi. Andrö fasuwö ira ba Danö Saloʼo Megido.+

23 Lafana Razo Yosia ba göna khönia irege iwaʼö khö ndra enoninia, ”Mifazawa ndraʼo, ebua sibai zokhogu.” 24 Ba laheta ia ba gureta wasuwöta ira enoninia. So sara tö gureta wasuwöta khönia si no lahenaigö ba lafazawa ia ba daʼö, awena laʼohe ia ba Yeruzalema. Ba gafuriata, mate ia ba lakoʼo ba lewatö ndra tuania,+ ba laʼeʼesi waʼamatenia andrö ira niha Yehuda hegöi banua Yeruzalema. 25 Mangenu-ngenu Yeremia+ ba waʼamate Yosia andrö, ba fefu zanunö ira matua hegöi ira alawe+ lö laböhöli wanunö sanandrösa khö Yosia, ba wangeʼesi yaʼia irugi maʼökhö. Aefa daʼö, lahalö gangetula enaʼö laʼanunöisi zinunö daʼö ba Gizaraʼeli, ba lasura fefu ba mbuku zinunö fangeʼesi.

26 Fefu waö-waö tanö böʼö sanandrösa khö Yosia, faʼomasinia si lö faröi ba wamalua Oroisa Yehowa, 27 ba fefu nifaluania iʼotarai wamobörö irugi gafuriata, no tesura daʼö ba Mbuku Razo-Razo Ndraono Gizaraʼeli hegöi Yehuda.+