Famaʼeleʼö Nitema Yohane
17 Iʼondrasi ndraʼo samösa moroi ba gotalua ndra malaʼika si dafitu solohe mako si fitu ngawua andrö+ imane, ”Daʼuʼoromaʼö khöu wanguhuku si göna zohorö sebua si no modadao ba dete nidanö soya.+ 2 Mohorö+ khönia razo-razo ba gulidanö ba mabu fefu niha börö nagu andrö khönia yaʼia daʼö fohorönia.”*+
3 Börö geheha niʼamoniʼö, iʼohe ndraʼo malaʼika andrö ba danö si mate. Uʼila samösa ndra alawe si dadao yawa ba hulu gurifö samuʼi soyo si hulö hola-hola galitö. So fitu högö gurifö daʼö ba fulu dandrunia, ba afönu mbotonia maʼasageu döi-töi sangoʼaya Lowalangi. 4 No ifake mbaru si ungu laʼa-laʼa*+ ira alawe daʼö ba soyo si hola-hola, simanö göi gama-gama anaʼa, feremata, ba mutiara.+ No igogohe galasi anaʼa safönu ngawalö zogoro niha awö ngawalö zi raʼiö börö wohorönia* andrö. 5 Ba gangangonia no tesura sambua döi si lö muʼila eluaha: ”Babilona Sebua, ina zohorö-horö+ awö ngawalö zogoro niha ba gulidanö.”+ 6 Ba uʼila wa mabu ndra alawe daʼö börö ndro niha niʼamoniʼö hegöi do zamaduhuʼö Yesu.+
Me uʼila ia, ahöli-höli sibai dödögu. 7 Imane khögu malaʼika andrö, ”Hana wa ahöli-höli dödöu? Uʼombakhaʼö khöu haniha zindruhunia ndra alawe daʼö+ ba urifö samuʼi nidadaoninia, si fitu högö ba si fulu tandru.+ 8 No irai so mböröta gurifö samuʼi niʼilamö daʼö. Lö hadöi yaʼia iadaʼa, hizaʼi lö ara tö tohare ia moroi ba mbaho sabakha sibai*+ ba tehori ia dania. Ahöli-höli dödö zowanua ba gulidanö dania si lö musura töi ba gölu-gölu zura waʼauri+ andrö iʼotarai me tumbu ngaʼötö niha ba gulidanö,* börö me no irai so me mböröta gurifö daʼö ba lö yaʼia iadaʼa, hizaʼi ifuli so ia.
9 ”Moguna so waʼatua-tua ba faʼaboto ba dödö enaʼö muʼila geluaha daʼa: Fitu högö+ eluahania fitu hili, ba no modadao ndra alawe andrö yawania. 10 Si fitu andrö eluahania fitu razo: Lima moroi ba gotaluania no adudu, sambua zi so, ba sambua tö zi lö tohare nasa. Na tohare ia dania, ba lö arara. 11 Urifö samuʼi si no irai so mböröta, hizaʼi lö yaʼia iadaʼa+ eluahania razo si walu. Moroi ba gotalua razo si dafitu andrö ia ba tehori ia dania.
12 ”Si fulu tandru niʼilamö yaʼia daʼö dafulu razo si lö mamatörö nasa, hizaʼi latema kuaso ba wamatörö awö gurifö samuʼi andrö sambua za waʼara. 13 Ha sambua gohitö dödöra, andrö wa labeʼe waʼabölö hegöi kuaso khö gurifö samuʼi andrö. 14 Fasuwö ira ba wolawa Ono Mbiri-biri,+ hizaʼi ikalaisi ira+ dania börö me yaʼia Soʼaya yawa zoʼaya, ba Razo yawa razo.+ Lakalaisi göi ira dania niha niʼamoniʼö si lö faröi si fao ba Nono Mbiri-biri andrö.”+
15 Imane khögu malaʼika daʼö, ”Idanö niʼilau ba zi dadao zohorö andrö eluahania ngawalö soi, mado, banua, hegöi li.+ 16 Tandru si fulu rozi+ ba urifö samuʼi andrö+ fatiu dödöra dania ba zohorö andrö.+ Lahalö fefu gokhötania, laheta nukhania, laʼa nagolenia, ba latunu.+ 17 Börö me Lowalangi zameʼe ba dödöra wamalua ohitö dödönia,+ yaʼia daʼö ba wamalua ohitö dödöra si fagölö. Ohitö dödöra andrö yaʼia daʼö ba wameʼe famatöröra ba gurifö samuʼi+ irege alua niwaʼö daromali Lowalangi. 18 Ira alawe+ niʼilamö andrö yaʼia daʼö banua sebua samatörö fefu razo ba gulidanö.”