Esera
6 Ba ginötö daʼö ibeʼe fareta Razo Dario enaʼö lafareso waö-waö salua ba naha wangiröʼö harato ba Mbabilona. 2 Aefa daʼö, lasöndra sambua gölu-gölu zura ba gödo si so ba Gameta, Provinsi Media, ösinia yaʼia daʼö:
3 ”Ba ndröfi siföföna wamatörö Razo Kiro, ibeʼe fareta sanandrösa ba nomo Lowalangi si so ba Yeruzalema:+ ’Moguna mufuli mufazökhi nomo andrö tobali naha wanunu sumange. Fazökhi wondrasi ba nahia daʼö 26,7 meter* waʼalawa ba 26,7 meter* waʼebolo.+ 4 Moguna mufalaete dowania tölu winaeta gara segebua ba sambua winaeta geu.+ Fefu gefe niʼogunaʼö tehalö moroi ba gödo razo.+ 5 Aefa daʼö, fefu gama-gama firö ba anaʼa si no ihalö Nebukanesa ba nomo Lowalangi si so ba Yeruzalema ba si no iʼiröʼö ba gosali lowalanginia ba Mbabilona,+ enaʼö lafuli fefu ba gosali Yeruzalema ba mubeʼe daʼö ba nomo Lowalangi.’+
6 ”Yaʼugö Tatenai gubernur ba mbanua Yefo Nungo Nidanö,* ba Sitara-bosinai ba awömi wohalöwö, ira salahi gubernur moroi ba mbanua Yefo Nungo Nidanö,+ böi misaisi halöwöra ba daʼö. 7 Böi mitenawa ira ba wamazökhi omo Lowalangi. Tehegö khö ndra gubernur niha Yahudi hegöi ira sondröniaʼö niha Yahudi ba wamazökhi mangawuli omo Lowalangi ba nahania siföföna. 8 Baero daʼö, ubeʼe khömi fareta enaʼö mifalua daʼa khö ndra sondröniaʼö niha Yahudi ba wamazökhi mangawuli omo Lowalangi andrö: Halö gefe moroi ba gödo razo,+ pajak si no teʼowuloi moroi ba mbanua Yefo Nungo Nidanö, ba anemaiʼö beʼe khöra enaʼö lö tebato halöwöra.+ 9 Gofu hadia ia niʼogunaʼöra ero maʼökhö hasambalö mibeʼe khöra, ono zawi sawuyu-wuyu,+ biri-biri si matua,+ ono mbiri-biri,+ gandru,+ asio,+ agu+ ba fanikha+ moloʼö niwaʼö ndra ere ba Yeruzalema, 10 enaʼö lö aetu labeʼe zumange somasi Lowalangi samatörö sorugo, ba mangandrö ira enaʼö ohahau dödö Razo hegöi ngaʼötönia.+ 11 Ubeʼe göi gamakhoita, gofu haniha zanawö amakhoita daʼa, laʼosö ia ba döla geu nideha moroi ba nomonia samösa. Aefa daʼö, labaliʼö naha waniboʼö si taʼunö* nomonia börö me no isawö gamakhoita andrö. 12 Lowalangi zamili nahia daʼa börö döinia,+ yaʼikalaisi razo hegöi soi böʼö sanawö amakhoita andrö ba sedöna mamakiko omo Lowalangi si so ba Yeruzalema. Yaʼodo andre Dario sameʼe amakhoita daʼa. Miʼaliokö wamalua.”
13 Andrö iʼanemaiʼö lafalua gamakhoita Razo Dario andrö ira Tatenai, gubernur ba mbanua Yefo Nungo Nidanö, Sitara-bosinai+ hegöi awöra wohalöwö. 14 Lö laböhöli wamazökhi omo andrö ira sondröniaʼö niha Yahudi ba itugu tedou manö halöwöra.+ Tefarou dödöra börö wamaʼeleʼö moroi khö Hagaʼi+ simanö göi Zakharia+ samaʼeleʼö maʼuwu Ido. Laʼasiwai wamazökhi omo andrö börö goroisa Lowalangi ndraono Gizaraʼeli+ hegöi amakhoita Giro,+ Dario+ ba Aretazasa+ razo Weresia. 15 Awai lafazökhi nomo andrö ba ngaluo si tölu ba mbaŵa Adara,* me no önö fakhe mamatörö Razo Dario.
16 Aefa daʼö, laʼamoniʼö nomo Lowalangi andrö si fao faʼomuso dödö iraono Gizaraʼeli, ere, niha Lewi+ ba fefu niha si no mangawuli moroi ba nahia wangoloiʼö. 17 Ba wangamoniʼö omo Lowalangi andre labeʼe 100 ngaʼeu zawi si matua, 200 mbiri-biri si matua, ba 400 nono mbiri-biri. Ba sumange fameta horö ba ndraono Gizaraʼeli maʼafefu, labeʼe 12 ngaʼeu nambi si matua moloʼö faʼato mado Gizaraʼeli.+ 18 Aefa daʼö, lafataro gere hegöi niha Lewi moloʼö ngawawara ba wangai halöwö khö Lowalangi si so ba Yeruzalema+ simane si no tesura ba mbuku Moze.+
19 Fefu niha si no mangawuli moroi ba nahia wangoloiʼö andrö lafalua Gowasa Fasa ba ngaluo si 14 ba mbaŵa siföföna.+ 20 Dozi ngawawa gere hegöi niha Lewi, no laʼamoniʼö ira zamösana+ irege teʼamoniʼö fefu. Aefa daʼö, lataba zumange Gowasa Fasa ba niha si no mangawuli no mege, khö nawöra ere hegöi khöra samösa. 21 Dozi iraono Gizaraʼeli si no mangawuli moroi ba nahia wangoloiʼö, fao khöra niha tanö böʼö ba wemanga sumange andrö yaʼia daʼö niha si no mamabali yaʼira moroi ba waʼaraʼiö soi ba zi fasuira ba wamosumange* Yehowa Lowalangi ndraono Gizaraʼeli.+ 22 Lafalua göi Gowasa Roti si Lö Mufaruka Ragi+ fitu hari waʼara si fao faʼomuso dödö. No iʼomusoiʼö dödö soi andrö Yehowa ba fatema ba dödö Razo Asiria* nifaluara,+ irege itolo ira* wamazökhi omo Lowalangi sindruhu, Lowalangi ndraono Gizaraʼeli.