Ba Mbanua Niha Keriso ba Roma
4 Na simane daʼö, hadia nisöndra duada Aberahamo? 2 Na tefotöi Gaberahamo niha satulö börö gamuatania, so dane-dane wa isuno ia samösa, hizaʼi lö isuno ia föna Lowalangi. 3 So ayati sangumaʼö, ”Mamati Gaberahamo khö Yehowa,* andrö wa lafotöi ia niha satulö.”+ 4 Lagazi zohalöwö tenga börö me sökhi dödö zokhö yaʼia, hizaʼi börö me sinangea itema daʼö. 5 Niha si lö mohalöwö manö na mamati ia khö Lowalangi, ba lafotöi ia niha satulö. Hewaʼae no ifalua horö, börö wamatinia wa lafotöi ia satulö.+ 6 Simane niwaʼö Dawido sanandrösa ba waʼomuso dödö niha satulö ba wamaigi Lowalangi tenga börö gamuatania, 7 ”Yaʼahowu niha si no muʼefaʼö lalö ba si no mubalugö horö; 8 yaʼahowu niha si lö itörö tödö Yehowa* horönia.”+
9 Hadia ha niha si no lasuna zomuso tödö? Hewisa göi niha si lö nisuna?+ No muwaʼö ba wamobörö, ”Börö wamati wa tefotöi niha satulö Gaberahamo.”+ 10 Hamega tobali niha satulö Gaberahamo? Me no aefa lasuna mazui fatua lö lasuna? Sindruhunia lö nisuna ia me lafotöi ia niha satulö. 11 Iwaʼö khönia Lowalangi enaʼö lasuna ia me daʼö zi tobali tandra*+ wa satulö ia börö wamatinia fatua lö nisuna. Andrö tobali ia ama zamati ba niha fefu+ fatua lö lasuna ia, ba atulö ira fefu ba wamaigi Lowalangi. 12 Tobali, amada Aberahamo+ tenga ha ama niha nisuna fefu, hizaʼi ama niha satulö soloʼö famatinia, yaʼia daʼö famati niʼokhögönia fatua lö lasuna ia.
13 Tenga börö wamalua oroisa wa itema mbuʼusa li Aberahamo hegöi maʼuwunia wa yaʼia dania zangokhögö ulidanö,*+ hizaʼi faʼatulö dödö börö wamatinia.+ 14 Na niha samalua oroisa zanema ondröita andrö, zaya-zaya gölö wamati ba lö eluaha mbuʼusa li daʼö. 15 Sindruhunia, börö Goroisa Moze wa mofönu Lowalangi,+ na lö hadöi oroisa lö hadöi olalöwa.+
16 Tobali, börö wamati si teʼodane-dane ba waʼasökhi dödö sebua*+ moroi khö Lowalangi, andrö wa latema mbuʼusa li fefu maʼuwu Gaberahamo,+ he samalua Oroisa Moze hegöi samati simane Aberahamo, amada fefu.+ 17 Tefaudu daʼa ba ayati sangumaʼö, ”No ubaliʼö ndraʼugö ama ba soi soya.”+ Hasambalö alua zi no ifabuʼu Lowalangi ba mamati Gaberahamo khönia börö me no iʼorifi niha si no mate ba tola ifatunö ngawalö zi lö alua, hulö zi no alua daʼö.* 18 Manötöna ba mamati ia wa tobali ia ama dozi soi hewaʼae na tebai dali wamaigi niha. Faduhu dödönia ba wehede, ”Simane daʼö waʼoya maʼuwumö dania.”+ 19 Lö awuwu wamati Gaberahamo hewaʼae iwaʼö tödönia tebai tumbu khönia nono börö me no arakhagö 100 fakhe ndröfinia,+ ba no teduhö naha nono Zara.+ 20 Mamati ia ba nifabuʼu Lowalangi ba lö aombö dödönia. Aro wamatinia irege ifolakhömi Lowalangi 21 ba faduhu dödönia wa tola ifalua mbuʼusa linia Lowalangi.+ 22 Daʼö mbörö wa ”lafotöi ia niha satulö”.+
23 Sindruhunia tenga ha khönia manandrösa ngawua wehede ”lafotöi ia niha satulö”,+ 24 hizaʼi khöda fefu. Lafotöi ita niha satulö börö me faduhu dödöda khö Lowalangi sanusugi Yesu Soʼaya yaʼita moroi ba gotalua zi mate.+ 25 Itehegö mate Yesu ba wangefaʼö horöda+ ba isusugi ia Lowalangi enaʼö tola lafotöi ita niha satulö.+