Yesaya
32 Hiza! So dania samösa razo+ samatörö ba waʼaduhu,+
Ba mamatörö dania ndra sondröniaʼö ba waʼatulö.
2 Yaʼira andre no amaedola zawatö moroi ba nangi,
Simane naha wolumöʼö ba deu laöhö,
Simane gelea nidanö ba danö sabeʼe,+
Ba simane lumö hili sokara ba danö si mate.
3 Lö dania muduhö hörö niha samaigi,
Ba labeʼe mbörö dalingara niha samondrongo.
4 Niha salio mangai angetula iʼangeragö waʼaboto ba dödö,
Ba lö fadöʼö-döʼö na mohede niha si no tobaʼa lela ba muʼila geluaha ngawua wehedenia.+
5 Niha si bodo, lö saʼae lafotöi ia niha soböwö,
Niha si lö tatu fangera-ngera, lö saʼae lafosumange ia niha;
6 Lö eluaha na fahuhuo niha si bodo,
Ifakhai zi lö sökhi ba dödönia,+
Börö me iʼoʼö nifalua niha sondröi sindruhu* ba iwaʼö zi lö atulö sanandrösa khö Yehowa,
Lö ibeʼe gö niha solofo,
Ba itenawa niha somasi mamadu idanö.
7 Oya lala niʼogunaʼö niha si lö tatu fangera-ngera ba wamalua si lö sökhi;+
Faʼawö ia ba gamuata si möi fangaila,
Iʼalui lala ba wamaʼala niha nifakao si fao falimosa,+
Hewaʼae no atulö wehede niha si numana andrö.
8 Hizaʼi, niha soböwö so ba dödönia waʼoböwö,
Ba lö iböhöli wamalua faʼoböwö andrö.
9 ”He yaʼami ira alawe sahono tödö, mifaoso ba mifondrondrongo wehedegu!
He yaʼami ono alawe somuso tödö,+ ameʼegö tödö wehedegu andre!
10 Na no töra döfi dania, mirasoi waʼataʼu ba fanizi-nizi, yaʼami somuso tödö iadaʼa,
Börö me lö hadöi agu si no muʼowuloi me no awai wamasi.+
11 Yamanizi ami, he yaʼami ira alawe sahono tödö!
Yaso khömi waʼataʼu, yaʼami somuso tödö!
Miheta nukhami,
Ba mifake nukha goni ba löwi-löwimi.+
12 Mibözi dötöʼami si fao fege-ege
Ba wangeʼesi nowimi hegöi tanömö nagu sowua.
13 Ihawui dania soigu andrö sinanö sodoi hegöi ngafu ndruʼu sodoi;
Ihawui fefu nomo si no irai morasoi faʼomuso dödö,
Ba ihawui mbanua safönu faʼomuso dödö.+
14 Adudu dania malige nifoʼöli;
Ba laröi mbanua si rami;+
Ba tobali dania nahia si lö niha-niha Gofeli+ awö malige zanaro sagötö faʼara,
Omasi galide weʼamöi ba daʼö,
Ba daʼö göi iʼalui gönia biri-biri,+
15 Irege ibeʼe gehehania khöda+ Lowalangi,
Ba tobali kabu zinanö dania danö si mate,
Ba lawalinga gatua dania kabu zinanö.+
16 Ba danö si mate dania toröi waʼatulö,
Ba kabu zinanö dania so zindruhu.+
17 Lua-lua waʼatulö dödö sindruhu yaʼia daʼö faʼohahau dödö,+
Bua moroi ba waʼatulö sindruhu yaʼia daʼö faʼahono dödö ba lö ametaʼuö irugi zi lö aetu.+
18 Ba mowanua dania nono mbanuagu ba nahia safönu faʼohahau dödö,
Ba nahia si lö ametaʼuö ba sahono dödö.+
19 Adudu dania gatua börö deu esi,
Ba mududugö mbanua segebua maʼafefu.
20 Yaʼahowu niha samazaewe tanömö ba zinga gelea nidanö,
Ba sanotoʼö böbö zawi awö galide.”+