Nisura Mataiʼo
11 Me no aefa ibeʼe wanuturu lala khö ndra nifahaʼönia si 12, mofanö Yesu moroi ba daʼö, möi ia mamahaʼö ba manuriaigö ba mbanua böʼö.+
2 Irongo Yohane bakha ba gurunga+ duria nifalua Keriso. Andrö wa ifatenge ndra nifahaʼönia+ 3 ba wanofu khönia, ”Hadia yaʼugö Niha Nifabuʼu Lowalangi andrö, mazui so danö böʼö nibaloima?”+ 4 Imane khöra Yesu, ”Miʼaeʼe ba mifatunö khö Yohane hadia niʼilami hegöi nirongomi:+ 5 Teboka hörö zauʼa,+ mofanö zombuyu-mbuyu töla,+ döhö zobou auri, safiso tola larongo li, ifuli auri zi mate, ba larongo duria somuso dödö niha si numana.+ 6 Yaʼahowu zi faduhu tödö khögu.”*+
7 Me no mofanö ira, ibörögö fahuhuo Yesu ba niha sato sanandrösa khö Yohane, ”Hadia nifaigimi ba danö si mate?+ Hadia ba wamaigi bulu zukhu nifadögö-dögö nangi?+ 8 Na tenga, hadia nifaigimi andrö? Ba wamaigi niha samake nukha sebua böli? Ha ba gödo razo so daʼö. 9 Hadia sindruhunia nifaigimi ba daʼö? Mamaigi samaʼeleʼö? Atulö, samösa samaʼeleʼö ia, tenga samaʼeleʼö si toʼölö.+ 10 Yaʼia nitötöi ba ayati daʼa, ’Hiza! Ufadari-dariʼö fönau zinengegu sangehenaigö lala khöu!’+ 11 Yafaduhu dödömi, ba gotalua niha niʼadonogö ndra alawe, lö sabölö ebua moroi khö Yohane Samayagö Idanö. Hizaʼi, fondrege zide-ide ba Wamatörö Lowalangi ba zorugo andrö, abölö ebua moroi khönia.+ 12 Iʼotarai me götö Yohane Samayagö Idanö irugi iadaʼa, laforege niha weʼamöi ba Wamatörö Lowalangi ba zorugo andrö, ba niha si lö atage, daʼö zanöndra.+ 13 Irugi ba götö Yohane, tefaʼeleʼö ngawalö zalua Nisura Ndra Samaʼeleʼö hegöi Oroisa Moze.+ 14 He faduhu dödömi he löʼö, ’si tohare andrö Elia’.+ 15 Si so talinga, yamufondrondrongo.
16 ”Haʼökhö tola mufaomagö niha ba ginötö andre?+ Hulö ndraono side-ide ira ba fasa, si fawude-wude khö nawöra. 17 Lamane wangumaʼö, ’Fasurune ndraʼaga ba lö manari ami. Maʼanunöisi zinunö waʼabu dödö ba lö meʼe ami.’ 18 Simanö göi Yohane, lö manga ba lö mamadu ia, ba lamane khönia niha no ifakao ia malaʼika si lö sökhi. 19 Aefa daʼö, tohare Nono niha, manga ba mamadu ia.+ Hizaʼi, lawaʼö khönia niha, oluʼa-luʼa ba tuka mabu, fahuwu ia ba zanugi pajak hegöi ba niha sebua horö.+ Hewaʼae simanö, oroma waʼatua-tua niha moroi ba ngawalö zatulö nifaluania.”+
20 Aefa daʼö, iʼelifi zi hauga banua börö me lö khöra famalalini era-era, hewaʼae oya dandra sahöli-höli dödö nifaluania ba daʼö. 21 Imane, ”Alai ami Khorazi! Alai ami Mbetisaida! Na ba Diro hegöi ba Zidona menaʼö alua dandra sahöli-höli dödö niʼilami, tatu iʼotarai me föna no lafalalini gera-erara. Laʼonukha goni ba lalau nawu ba högöra.+ 22 Uwaʼö khömi, abölö-bölö wanguhuku si göna khömi moroi ba mbanua Diro hegöi Sidona na Luo Wanguhuku.+ 23 Ba yaʼugö Kafanauma,+ hadia teʼalawaʼö ndraʼugö ba mbanua si yawa? Ba Lewatö* nahau.+ Na ba Zodoma menaʼö alua dandra sahöli-höli dödö andrö niʼilamö, tatu so manö mbanua andrö irugi iadaʼa. 24 Uwaʼö khömi, abölö-bölö wanguhuku si göna khömi moroi ba zi göna banua Zodoma na Luo Wanguhuku andrö.”+
25 Me luo daʼö imane Yesu, ”Usuno ndraʼugö föna niha sato, he Ama, Samatörö banua si yawa awö danö, börö me no öbiniʼö daʼa ba niha sagatua-tua ba salawa sekola, hizaʼi no öfatunö ba niha sangide-ngideʼö yaʼia simane iraono.+ 26 Tefaudu ba gohitö dödöu daʼa, he Ama.” 27 Imane nasa Yesu, ”No ibeʼe ba dangagu fefu hadia ia Amagu.+ Sabölö mangila Ono ha Ama,+ ba sabölö mangila Ama ha Ono. Aboto ba dödö niha Nama na omasi ifahaʼö niha andrö Ono sanandrösa khö Nama.+ 28 Miʼaine khögu dozi serege tödö awö zonoro sabua, ba ufolombase ami. 29 Mihareʼö khömi kalo mbagi andrö khögu, ba mifahaʼö ami khögu börö me no sebolo tödö ndraʼo+ ba si lö fayawa, ba misöndra wolombase. 30 Sökhi kalo mbagi andre, ba aoha noro khögu.”