Nisura Yohane
1 Ba mböröta so Daromali,+ ba fao khö Lowalangi Daromali andrö,+ ba Taromali no lowalangi.*+ 2 Khö Lowalangi fao ia ba mböröta. 3 Iʼogunaʼö ia Lowalangi ba wamazökhi fefu hadia ia.+
Na lö yaʼia, ba lö tefazökhi hadia ia. 4 Börö ia wa tola so waʼauri, ba faʼauri andrö haga ba niha.+ 5 Ihagaini zogömi-gömi haga andrö,+ hizaʼi tebai ifatörö ia faʼogömi-gömi.
6 So niha nifatenge si tobali salahi Lowalangi. Töinia Yohane.+ 7 Tohare ia ba wamaduhuʼö haga andrö,+ enaʼö faduhu dödö niha fefu ba wehedenia. 8 Tenga yaʼia haga andrö,+ hizaʼi tohare ia ba wamaduhuʼö haga andrö.
9 Lö ara tö tohare haga sindruhu sohagaini fefu niha gulidanö.+ 10 No irai so ia ba gulidanö,+ börö ia wa so gulidanö,+ hizaʼi lö aboto ba dödö niha gulidanö ia. 11 Möi ia ba mbanua si tumbu ia, hizaʼi lö latemaʼö ia ba soinia. 12 Hewaʼae simanö, itehegö tobali ono Lowalangi fefu niha sanemaʼö yaʼia+ börö me mamati ira ba döinia.+ 13 Tenga si tumbu moroi ba ndro ira hegöi ba waʼedöna zatua mazui ba waʼedöna niha, hizaʼi moroi khö Lowalangi tumbu ira.+
14 Taromali andrö no tobali niha+ ba so ia ba gotaluada. No taʼila lakhöminia yaʼia daʼö lakhömi nitema nono si ha sambua+ moroi khö namania. Afönu ia faʼasökhi dödö sebua* si otarai khö Lowalangi hegöi faʼaduhu. 15 (Ifaduhuʼö Yohane sanandrösa khönia imane, ”Daʼa niha niwaʼögu khömi me umane, ’Niha si tohare aefa ndraʼo no idari-dari fönagu, börö me no so ia fatua lö yaʼo.’”)+ 16 Fefu ita tatema waʼasökhi dödö sebua* börö me afönu ia faʼasökhi dödö andrö. 17 Khö Moze tefaʼema Goroisa,+ ba Yesu Keriso+ mbörö wa so waʼasökhi dödö sebua*+ hegöi faʼaduhu. 18 Samösa lö niha si no irai mangila Lowalangi.+ Hizaʼi, ha ono si ha sambua andrö si hulö lowalangi+ si so ba zinga Nama,*+ yaʼia zangombakha sanandrösa khö Lowalangi.+
19 Daʼa nifaduhuʼö Yohane khö ndra ere hegöi niha Lewi moroi ba Yeruzalema, nifatenge niha Yahudi ba wanofu khönia, ”Haniha ndraʼugö?”+ 20 Lö fabuʼa ia, ba lö ibiniʼö khöra wangombakha, ”Tenga Keriso ndraʼo.” 21 Manofu ira, ”Na simanö, haniha? Elia ndraʼugö?”+ Itema li, ”Tenga.” ”Yaʼugö zamaʼeleʼö nifabuʼu andrö?”+ Itema li, ”Tenga!” 22 Manofu ira, ”Na simanö, haniha ndraʼugö? Enaʼö maʼila mabeʼe wanema li khö zamatenge yaʼaga. Tutunö, haniha ndraʼugö.” 23 Itema lira, ”Yaʼo niha siʼao-ao ba danö si mate, ’Mihaogö lala sadölö khö Yehowa,’*+ simane niwaʼö Yesaya samaʼeleʼö.”+ 24 Nifatenge ndra Farizaiʼo ira, 25 lasofu khönia lamane, ”Na tenga Keriso ndraʼugö mazui Elia mazui Samaʼeleʼö nifabuʼu andrö, hana wa öbayagö idanö niha?” 26 Itema lira Yohane, ”Ubayagö niha faoma idanö, hizaʼi so niha si lö miʼila ba gotaluami, 27 si tohare aefa ndraʼo. Tenga sinangea ndraʼo wangeheta tali sandralania.”+ 28 Alua fefu daʼö ba Mbetania yefo Yoridano, nahia Yohane wamayagö idanö.+
29 Mahemolunia, me iʼila tohare Yesu, imane Yohane, ”Hiza, yaʼia Nono Mbiri-biri+ andrö khö Lowalangi, sangeheta horö+ gulidanö!+ 30 Yaʼia andrö niwaʼögu me umane, ’Niha si tohare aefa ndraʼo no idari-dari fönagu, börö me no so ia fatua lö yaʼo.’+ 31 Sindruhunia lö uʼila haniha ia, hizaʼi andrö so ndraʼo ba wamayagö idanö enaʼö aboto ba dödö ndraono Gizaraʼeli haniha ia.”+ 32 Ifaduhuʼö göi Yohane, ”Uʼila geheha niʼamoniʼö si otarai mbanua si yawa hulö marafadi, ba lö tebulö yawania.+ 33 Hewaʼae lö uʼila haniha ia, imane khögu Lowalangi samatenge yaʼo ba wamayagö idanö, ’Na öʼila ahono geheha niʼamoniʼö ba zi samösa niha,+ daʼö niha samayagö faoma eheha niʼamoniʼö.’+ 34 No uʼila ba no ufaduhuʼö wa yaʼia andrö Ono Lowalangi.”+
35 Mahemolunia zui, no mozizio Yohane awö nifahaʼönia si darua, 36 me iʼila itörö daʼö Yesu imane, ”Hiza, yaʼia Nono Mbiri-biri+ andrö khö Lowalangi!” 37 Me larongo daʼö, laʼoʼö Yesu ira nifahaʼönia si darua. 38 Ifaigi ira Yesu börö me laʼoʼö ia, isofu khöra, ”Hadia niʼaluimi andrö?” Lamane, ”He Rabi (eluahania ”Samahaʼö”), hezo toröi ndraʼugö?” 39 Itema lira, ”Na omasi ami miʼila, aine miʼoʼö ndraʼo.” Laʼoʼö ia ba wamaigi hezo toröi ia. Me luo daʼö mato bözi öfa tanö owi,* ofeta manö bongi ira ba daʼö. 40 Samösa moroi ba gotalua zi darua andrö zamondrongo fehede Yohane tobali ia soloʼö Yesu, töinia Andrea+ talifusö Zimoni Fetero. 41 Iʼanemaiʼö iʼalui dalifusönia sotöi Simoni ba imane, ”No masöndra Mesia.”+ (Eluahania ”Keriso”.) 42 Aefa daʼö iʼohe ia föna Yesu. Me iʼila Zimoni,+ imane khönia Yesu, ”Simoni ndraʼugö, ono Yohane. Lafotöi ndraʼugö dania Kefa.” (Eluahania ”Fetero”.)+
43 Mahemolunia, omasi Yesu weʼamöi ba Galilaia. Aefa daʼö, falukha ia khö Wilifo+ ba imane, ”Aine, oʼö ndraʼo.” 44 Filifo andrö moroi ba Mbetisaida, banua Gandrea faoma Fetero. 45 Falukha Wilifo khö Natanaʼeli+ ba imane, ”No masöndra niha nidunö-dunö ba Goroisa Moze hegöi Nisura Ndra Samaʼeleʼö. Yaʼia andrö Yesu, ono Yosefo+ moroi ba Nazareta.” 46 Imane khönia Natanaʼeli, ”Hadia tesöndra zi sökhi moroi ba Nazareta?” Imane Filifo, ”Aine, datafaigi.” 47 Me iʼila iʼondrasi ia Natanaʼeli, imane Yesu sanandrösa khönia, ”Hiza, yaʼia andre niha Gizaraʼeli sindruhu. Lö hadöi falimosa ba dödönia.”+ 48 Imane Natanaʼeli, ”Hana wa öʼila ndraʼo?” Itema linia Yesu, ”Fatua lö ikaoniʼö Filifo, no uʼila me so ndraʼugö ba lumö geu ara.” 49 Imane Natanaʼeli, ”He Rabi, Ono Lowalangi ndraʼugö, Razo ndraono Gizaraʼeli.”+ 50 Imane Yesu, ”Hadia faduhu dödöu börö me uwaʼö no uʼila ndraʼugö ba lumö geu ara? Öʼila nasa dania zabölö ebua moroi andre.” 51 Itohugö wangumaʼö Yesu, ”Sindruhu-ndruhu niwaʼögu khömi, miʼila dania teboka mbanua si yawa ba mangörö-ngörö miyawa ba mitou ndra malaʼika Lowalangi khö Nono niha.”+