Ba Niha Heberaiʼo
12 Tobali, me no ato zamaduhuʼö samasui yaʼita simane lawuo, datatouʼö tou noroda awö horö andrö samöbö yaʼita,+ ba yaʼanau gölöda wagohisa ba watandrisa si no muhonogöi khöda,+ 2 tatöngöni Zalawa ba Samoʼahonoa famatida, yaʼia Yesu andrö.+ Börö waʼomuso dödö si no so fönania, itaögö waʼafökhö ba döla geu famakao* ba lö aila ia. Iadaʼa, no modadao ia ba gambölö dadaoma Lowalangi.+ 3 Enaʼö lö atage ba awuwu ami, mitörö-törö tödömi ia. Anau gölönia ba wanaha tödö me lalawa ia ira niha sebua horö+ ba wehede si tobali famaʼalara samösa.+
4 Lö irai aduwa ndromi ba wasöndratami wolawa horö. 5 Sindruhu-ndruhu no olifu ami mene-mene nibeʼe Lowalangi khömi, yaʼami iraononia yaʼia daʼö, ”He onogu, böi zi lö ba dödöu wotu andrö moroi khö Yehowa,* ba böi abu dödöu na iʼotuʼö ndraʼugö. 6 Iʼotuʼö niha niʼomasiʼönia Yehowa,* ba ileasi* dozi niha si tobali ononia.”+
7 Yaʼanau gölömi me daʼö wamahaʼö nibeʼe khömi. Hulö nono Lowalangi ami.+ Haniha nama si lö mamotu iraononia?+ 8 Na lö göna fefu ami fotu, eluahania ono horö ami, tenga sindruhu ononia. 9 Amada si so ba gulidanö manö ibeʼe khöda wotu ba tafosumange ia. Mendrua manö khö Namada sameʼe ö wamati, moguna tafondrondrongo wotunia enaʼö auri ita.+ 10 Ibeʼe khöda wotu satuada ba zi lö arara moloʼö satulö ba wamaiginia, na Lowalangi ibeʼe khöda wotu enaʼö sökhi ita ba teʼamoniʼö simane yaʼia.+ 11 Sindruhu sa, lö hadöi faʼomuso dödö na labeʼe khöda wotu, ba tobali fangafökhö dödöda. Hizaʼi, lua-luania faʼohahau dödö ba faʼatulö ba zi no tefahaʼö ba wotu andrö.
12 Börö daʼö, miʼabeʼeʼö dangami si no adada ba balöduhi si no atage,+ 13 ba böi atage ami miʼadölöʼö wofanö,+ enaʼö lö itugu monönö waʼatebai mbuʼu si fakaole andrö, hizaʼi tefadöhö. 14 Miʼodödögö waʼatulö ba niha fefu+ ba migohi waʼohau-hau.+ Si lö mamalua daʼö ba lö iʼila Zoʼaya.* 15 Miʼangelama enaʼö böi so fazamösa zi lö aʼozu manema faʼasökhi dödö sebua* moroi khö Lowalangi, enaʼö lö tumbu waʼa si faruka langu irege ifakuyu ba itaʼunöisi niha sato.+ 16 Böi so ba gotaluami zamalua fohorö* mazui sangosiwawöi ngawalö niʼamoniʼö simane Ezau samawa faʼasiaʼania ha börö gö si sambua mako.+ 17 No miʼila ba gafuriata me omasi ia itema howu-howu, hizaʼi lö tebeʼe khönia. Hewaʼae ikila weʼe ba iforege enaʼö tebulö gera-era namania,+ ba tobali zaya-zaya gölö.
18 Lö nirugimi hili si tola mubabaya andrö+ ba si hola-hola ba galitö+ nifasui lawuo saitö, fondrege waʼogömi-gömi ba si fao angi sabölö-bölö,+ 19 li dorofe+ sebua hegöi li zi fahuhuo,+ irege me awena larongo, mangandrö soi daʼö enaʼö tebato li si hede khöra andrö.+ 20 Tebai lataha wamondrongo oroisa, ”Urifö manö, na ihundragö hili andre, ba latebu ia kara irege mate.”+ 21 Ataʼu Moze zoroma andrö irege imane, ”Oi so waʼataʼugu ba manizi-nizi dölagu.”+ 22 Hizaʼi, möi ami ba Hili Ziona+ ba banua Lowalangi sauri yaʼia daʼö Yeruzalema+ si so ba zorugo, ngafulu ribu ndra malaʼika 23 sowulo,+ siaʼa nono mbanua si no tesura töi ba zorugo, Lowalangi Sanguhuku fefu,+ faʼauri wamati+ niha satulö si no moʼahonoa,+ 24 hegöi Yesu sangagö talu gotalua+ ba wawuʼusa li si bohou,+ do nitefe, si fahuhuo sabölö sökhi moroi ba ndro Habeli.+
25 Böi miʼosiwawöi* li zi fahuhuo andrö. Na lö teʼefaʼö niha gulidanö sangosiwawöi famangelama Lowalangi, mendrua manö ita, na taʼosiwawöi li zi fahuhuo moroi ba zorugo!+ 26 Me luo daʼö, muheu gulidanö ba wehedenia,+ iadaʼa no fawuʼu li ia, ”Sakali tö nasa ufuli ufaheu, tenga ha ulidanö saʼae, hizaʼi banua si yawa.”+ 27 Ngawua wehede ”sakali tö nasa”, daʼö zangoromaʼö wa ihori Lowalangi fefu zi no muheu andrö si tenga nifazökhi dangania irege lö taya zi lö muheu. 28 Börö me tatema Wamatörö si tebai muheu, dataforege wanema faʼasökhi dödö sebua* moroi khö Lowalangi, sanolo yaʼita ba wamalua halöwö niʼamoniʼö si faudu ba zomasi ia, si fao faʼataʼu ba famosumange. 29 Lowalangida andrö amaedola galitö si manga hadia ia.+