Sara Tesalonika
2 Yaʼami ira talifusö, tatu aboto ba dödömi wa tenga zaya-zaya gölö wangondrasima yaʼami.+ 2 No matörö wamakao ba fangoʼaya ba Wilifi+ simane si no miʼila, hizaʼi no ibeʼe khöma waʼabarani Lowalangi ba wamaʼema turia somuso dödö khömi+ hewaʼae oya wanandraigö. 3 Lö mabeʼe khömi mene-mene moroi ba wangera-ngera si sala mazui tödö si lö sökhi hegöi falimosa. 4 Börö me sinangea ndraʼaga ba wamaigi Lowalangi irege tebeʼe khöma duria somuso dödö, andrö wa fahuhuo ndraʼaga, tenga ba wangomusoiʼö tödö niha hizaʼi ba wangomusoiʼö tödö Lowalangi samareso tödöma.+
5 No miʼila samösa wa lö irai masuno-suno mazui maʼosatulö ndraʼaga khömi enaʼö so nibeʼemi khöma.+ Lowalangi zamaduhuʼö! 6 Lö göi irai maʼalui lakhömi moroi ba niha, he moroi khömi hegöi moroi ba danö böʼö, hewaʼae menaʼö tola manö tobali noro dödömi ndraʼaga ba zoguna khöma börö me sinenge Keriso ndraʼaga.+ 7 Hizaʼi, mahaogö-haogö khömi, simane ina na ifaenu nononia sawuyu ba ihaogö wondrorogö. 8 Börö waʼomasima, mahalö gangetula* ba wamaʼema turia somuso dödö khömi moroi khö Lowalangi, ba matehegö waʼaurima*+ börö waʼomasima khömi.+
9 He yaʼami ira talifusö, tatu lö olifu ami waʼamarase ba faʼerege dödöma. Mohalöwöga bongi maʼökhö enaʼö lö tobali noro dödömi ndraʼaga ba zoguna khöma+ me maturiaigö khömi duria somuso dödö moroi khö Lowalangi. 10 Yaʼami zamaduhuʼö hegöi Lowalangi wa lö si faröi ndraʼaga, atulö, ba lö nifaluama sala khömi yaʼami soloʼö Soʼaya. 11 Miʼila samösa hewisa me lö maböhöli wameʼe mene-mene, fondrara dödö, ba mafaduhuʼö khömi ero samösa,+ hulö simane ama+ khö nononia, 12 enaʼö sinangea gamuatami föna Lowalangi,+ sogaoni yaʼami weʼamöi ba Wamatörönia+ hegöi ba wanema lakhöminia.+
13 Daʼö mbörö wa lö maböhöli wangandrö saohagölö khö Lowalangi,+ börö me mirongo daromali Lowalangi moroi khöma, mitema ia tenga simane fehede niha, hizaʼi sindruhunia fehede Lowalangi zondrönisi tödömi yaʼami soloʼö Soʼaya. 14 He yaʼami ira talifusö, no miʼoʼö nono mbanua Lowalangi si so ba Yudea si hasara tödö khö Keriso Yesu, börö me lafakao ami niha si sambua soi khömi,+ simane me lafakao ndra talifusömi andrö ira niha Yahudi, 15 mendrua manö me yaʼira zamunu Soʼaya Yesu+ hegöi ira samaʼeleʼö ba samakao yaʼaga.+ Fatuwu khö Lowalangi niha simane daʼö ba lö moguna ira ba niha. 16 Fahuhuo ndraʼaga ba soi böʼö enaʼö lasöndra wangorifi,+ hizaʼi lasaisi ndraʼaga ira niha Yahudi. Andrö wa itugu monönö horöra, ba latema wanguhuku moroi khö Lowalangi ba gafuriatania.+
17 He yaʼami ira talifusö, fabali ita ba zi lö arara, hizaʼi lö tebulö so ba dödöma ami. Börö waʼomasima khömi, andrö maforege wamalukhaisi yaʼami. 18 Andrö wa omasiga falukha khömi. Yaʼo, Faulo, tenga ha sakali uforege wamalukhaisi yaʼami, hizaʼi no dua kali. Hewaʼae simanö, isaisi ndraʼaga Satana. 19 Na tenga yaʼami, haniha nasa nitötönama mazui somuso dödöma mazui takula niʼalawaʼöma föna Zoʼaya Yesu na tohare ia?+ 20 Yaʼami lakhömi ba faʼomuso dödöma.