Nisura Yohane
16 ”Uwaʼö khömi daʼa enaʼö lö faröi ami khögu. 2 Lafofanö ami dania moroi ba nahia waʼowulo.+ Samuza inötö dania, dozi niha samunu yaʼami+ lawalinga no lafalua halöwö niʼamoniʼö khö Lowalangi. 3 Hizaʼi, wa lafalua daʼö börö me lö aboto ba dödöra Nama hegöi yaʼo.+ 4 Hewaʼae simanö, no uʼombakhaʼö khömi daʼa enaʼö na alua dania ba ginötönia, itörö tödömi wa no irai ufatunö khömi.+
”Lö ufatunö khömi ba wamobörö, börö me so ndraʼo nasa khömi. 5 Iadaʼa, mofanödo khö zamatenge yaʼo.+ Hizaʼi, samösa lö sanofu moroi ba gotaluami hezo möi ndraʼo. 6 Hewaʼae simanö, abu dödömi börö me no ufatunö khömi daʼa.+ 7 Sindruhu-ndruhu niwaʼögu, soguna khömi wa mofanö ndraʼo. Na lö mofanödo, ba lö möi khömi zanolo andrö.+ Hizaʼi na mofanödo, ufatenge ia khömi. 8 Na tohare ia, daʼö zamaduhuʼö ba niha gulidanö sanandrösa ba horö, sanandrösa ba zindruhu, ba sanandrösa ba wanguhuku: 9 si oföna sanandrösa ba horö,+ börö me lö mamati ira khögu;+ 10 aefa daʼö sanandrösa ba zindruhu börö me möi ndraʼo khö Nama, ba lö miʼila ndraʼo saʼae; 11 ba sanandrösa ba wanguhuku, börö me samatörö ulidanö andre no tehuku.+
12 ”Oya nasa menaʼö niwaʼögu khömi, hizaʼi lö ikhamö fangera-ngerami iadaʼa. 13 Na tohare dania zanolo andrö, eheha niʼamoniʼö sangombakha sindruhu,+ ituturu khömi lala enaʼö aboto ba dödömi fefu zindruhu. Lö fahuhuo ia moroi ba wangera-ngerania samösa, hizaʼi hadia nirongonia daʼö nifatunönia. Ifatunö khömi ngawalö zedöna alua.+ 14 Ifolakhömi ndraʼo,+ börö me ifatunö khömi fefu zi no itema moroi khögu.+ 15 Fefu gokhöta Nama ba okhötagu daʼö.+ Andrö wa umane, ’Sanolo andrö zangombakha khömi hadia nitemania moroi khögu.’ 16 Ba zi lö ara tö lö miʼila ndraʼo saʼae,+ ba zi lö ara tö göi miʼila ndraʼo.”
17 Me larongo daʼö ira nifahaʼö, faoma lamane khö nawöra, ”Hadia geluaha wa iwaʼö, ’Ba zi lö ara tö lö miʼila ndraʼo saʼae, ba zi lö ara tö göi miʼila ndraʼo,’ ba ’börö me möi ndraʼo khö Nama’?” 18 Lamane, ”Hadia geluaha me iwaʼö ’ba zi lö ara tö’? Lö aboto ba dödöda niwaʼönia.” 19 Iʼila Yesu wa omasi manofu ira khönia. Andrö imane, ”Hadia manofu ami börö me uwaʼö, ’Ba zi lö ara tö lö miʼila ndraʼo saʼae, ba zi lö ara tö göi miʼila ndraʼo’? 20 Sindruhu niwaʼögu khömi, mege-ege ami dania ba mangeʼesi, hizaʼi omuso dödö niha gulidanö. Sabu tödö ami dania, ba tobali faʼomuso dödö waʼabu dödömi andrö.+ 21 Hulö simane faʼafökhö nirasoi ndra alawe soʼono, na no tumbu nononia, lö itörö tödönia saʼae waʼafökhö andrö. Omuso dödönia me no tumbu khönia nono ba gulidanö. 22 Simanö göi ami, abu dödömi iadaʼa. Hizaʼi, omuso dödömi na no falukha ita dania,+ ba lö si tola mangeheta faʼomuso dödö andrö khömi. 23 Ba luo daʼö, lö saʼae misofu hadia ia khögu. Sindruhu niwaʼögu khömi, gofu hadia ia niʼandrömi khö Nama+ ba döigu, hasambalö ibeʼe khömi.+ 24 Irugi iadaʼa, sambua lö niʼandrömi ba döigu. Miʼandrö ba mitema dania, enaʼö sindruhu-ndruhu omuso dödömi.
25 ”Ufatunö khömi fefu daʼa si fao amaedola. Samuza inötö dania, lö saʼae fahuhuo ndraʼo khömi si fao amaedola, ba lö ubiniʼö wangombakha sanandrösa khö Nama. 26 Ba luo daʼö, miʼandrö dania khö Nama ba döigu. Tenga daʼö geluahania wa yaʼo dania zangandrö salahimi. 27 Iʼomasiʼö ami Ama, börö me no miʼomasiʼö ndraʼo+ ba faduhu dödömi wa tohare ndraʼo salahi Lowalangi.+ 28 Tohare ndraʼo ba gulidanö tobali salahi Nama. Iadaʼa, uröi gulidanö ba mangawulido khö Nama.”+
29 Lamane ira nifahaʼönia, ”Lö öʼogunaʼö gamaedola na fahuhuo ndraʼugö iadaʼa. 30 Aboto ba dödöma iadaʼa wa öʼila fefu hadia ia, ba lö moguna manofu khöu niha börö me no ötahö zi so ba gera-erara. Andrö faduhu dödöma wa moroi khö Lowalangi ndraʼugö.” 31 Imane khöra Yesu, ”Hadia sindruhu-ndruhu faduhu dödömi iadaʼa? 32 Hiza, irugi dania inötönia, ba no irugi iadaʼa, oi zara fabali ami dania ba nomo misa ba miröi ndraʼo.+ Hizaʼi, tenga ha yaʼo, börö me lö iröi ndraʼo Ama.+ 33 No ufatunö khömi daʼa fefu, enaʼö miʼokhögö waʼahono dödö börö ndraʼo.+ Tefakao ami ba gulidanö andre. Tobali, böi miʼataʼufi! No ukalaisi gulidanö.”+