Ruti

2 So zi fahatö khö Naʼemi niha si kayo sibai, si tenga böʼö woʼomonia Elimelekhi. Töinia Boasi.+

2 Imane Ruti ira alawe Moabi andrö khö Naʼemi, ”Uʼandrö khöu, tehegö khögu weʼamöi ba nowi ba wangozaragö si toröi mbasitö+ furi niha si sökhi tödö khögu.” Imane Naʼemi, ”Aeʼe onogu.” 3 Mofanö Ruti ba ibörögö wangozaragö si toröi mbasitö furi niha samasi. Tefaudu nowi si möi ia andrö khö Mboasi,+ si tenga böʼö Gelimelekhi.+ 4 Lö ara aefa daʼö, tohare Mboasi moroi ba Mbetilekhema ba wamalukhaisi sohalöwö ba nowi. Imane khöra, ”Yaʼibeʼe khömi waʼabölö Yehowa.” Latema linia, ”Yaʼifahowuʼö ndraʼugö Yehowa.”

5 Manofu Mboasi khö nono matua nifataro ba wamaigi samasi, ”Haniha ndra alawe daʼö?” 6 Imane ono matua andrö, ”Ira alawe Moabi+ sangawuli moroi ba mbanua Moabi si fao khö Naʼemi.+ 7 Imane khögu, ’Uʼandrö khöu, tehegö khögu wangozaragö ngalai mbasitö+ niröi ndra sohalöwö.’ Iʼotarai mege sihulö wongi mohalöwö ia, ba awena sibai ilau molombase sabata.”

8 Aefa daʼö imane Boasi khö Ruti, ”He onogu, fondrondrongo niwaʼögu. Böi aeʼe ba nowi niha böʼö wangozaragö si toröi mbasitö khöra. Ba daʼa manö iagö. Abölö sökhi na so ndraʼugö ba gotalua ndra alawe sohalöwö khögu.+ 9 Faigi hezo mamasi ira ba oʼö ira. No uwaʼö khö ndraono matua enaʼö lö lagadu* ndraʼugö. Na owökhi dödöu, aeʼe ba zi so rumbi naha nidanö, ba yaʼira saʼae dania zangai öu idanö.”

10 Me irongo daʼö Ruti, ituhi danö ba imane, ”Hana wa sökhi sibai gamuatamö khögu Pa? Hana wa öʼameʼegö tödö niha si fatewu simane yaʼo?”+ 11 Imane Boasi, ”No urongo fefu hadia nifaluamö khö ninau matuau me no mate woʼomomö. Öröi namau awö ninau hegöi banuamö ba möiʼö ba soi böʼö si lö irai öʼila.+ 12 Yaʼisulöni nifaluamö Yehowa,+ ba yaʼötema howu-howu* soʼahonoa moroi khö Yehowa Lowalangi ndraono Gizaraʼeli, me ölumöʼö ndraʼugö barö gafinia.”+ 13 Imane Ruti, ”Yalötebulö waʼasökhi wamaigimö yaʼo Pa, börö me no örara dödögu ba ahono dödögu ba wehedemö, hewaʼae na tenga sohalöwö khöu ndraʼo.”

14 Me inötö wemanga, imane khönia Boasi, ”Aine, lau manga ba ungugö gömö roti ba cuka.” Modadao Ruti ba zinga ndra sohalöwö. Aefa daʼö, ibeʼe khönia Boasi mbua nowi si no mufakoe, ba manga ia irege abuso, hizaʼi iröi ösa. 15 Me mosindro Ruti wangozaragö si töra mbasitö,+ imane Boasi khö ndra sohalöwö khönia, ”Böi mitaha ia, akha iʼozaragö zi toröi mbasitö, hewaʼae na ngalai si no mutataba. Böi mitegu ia.+ 16 Midöni ösa ngalai si no muböbö, ba miröi enaʼö iʼozaragö. Böi mitenawa ia.”

17 Lö iböhöli Ruti wangozaragö si toröi mbasitö irugi tanö owi.+ Aefa daʼö, iböbözi fefu zi no iʼozaragö andrö ba tesöndra mato 22 liter* barli. 18 Mangawuli ia miyomo ba mbanua ba iʼila inania matuania zi no iʼozaragö. Itouʼö khö ninania fefu noronia ba ibeʼe göi gö si no itenagö.+

19 Imane inania matuania, ”Hezo öʼozaragö zi toröi mbua nowi maʼökhö? Haʼökhö nowi daʼö? Yaʼitema howu-howu niha soʼameʼegö tödö yaʼugö.”+ Börö daʼö ifatunö khö ninania matuania haʼökhö mohalöwö ia. Imane, ”Ba daʼö mohalöwödo ba nowi niha sotöi Boasi.” 20 Imane Naʼemi, ”Yaʼifahowuʼö ia Yehowa, si lö mamöhöli mangomasiʼö niha sauri hegöi si no mate.”+ Itohugö wangumaʼö Naʼemi, ”Niha daʼö si tenga böʼöda,+ samösa ia zinangea ba wosanu yaʼita.”+ 21 Imane khönia Ruti ira alawe Moabi andrö, ”Ifatunö khögu nasa, ’Abölö sökhi na so ndraʼugö ba gotalua ndra alawe sohalöwö khögu irege awai labasi fefu.’”+ 22 Imane Naʼemi khö numönönia Ruti, ”He onogu, abölö sökhi na mohalöwö ndraʼugö ba gotalua ndra alawe sohalöwö khönia moroi na lagadu ndraʼugö ba nowi tanö böʼö.”

23 Lö iböhöli wefao khö ndra alawe sohalöwö khö Mboasi. Iʼozaragö zi toröi mbasitö irugi awai wamasi barli+ hegöi gandru, ba lö faröi ia khö ninania matuania.+