Famaʼeleʼö Nitema Yohane
19 Aefa daʼö, urongo li sebua moroi ba zorugo si hulö li malaʼika sato imane, ”Haleluya!*+ Lowalangida ba no Lowalangi Sangorifi. Molakhömi ia ba sebua faʼabölö, 2 sindruhu ba satulö wanguhukunia andrö.+ No ihuku zohorö sebua samakiko ulidanö ba wohorönia* andrö. No isulöni Lowalangi waʼamate ndra sawuyunia nibunu zohorö andrö.”+ 3 Ba muʼao ira zui lamane, ”Haleluya!*+ No numalö miyawa zimbonia andrö irugi zi lö aetu.”+
4 Aefa daʼö, satua sokubaloi si 24+ hegöi kerubi si daöfa andrö+ mangalulu ira khö Lowalangi si no modadao ba dadaoma andrö lamane, ”Yaduhu! Haleluya!”*+
5 Ba terongo li moroi ba dadaoma andrö imane, ”Misuno Lowalangida yaʼami sawuyunia+ sangataʼufi yaʼia, he niha si toʼölö hegöi niha si tehöngö.”+
6 Ba urongo li si hulö li ndra malaʼika sato, hulö handro-handro nidanö sabölö-bölö, ba simane gari mbanua sabölö-bölö. Muʼao ira, ”Haleluya,*+ börö me no ibörögö mamatörö tobali razo+ Lowalangida Yehowa,* Fondrege Zabölö!+ 7 Miʼomusoiʼö dödömi ba mifolakhömi ia, börö me no irugi inötö wangowalu Nono Mbiri-biri andrö, ba no ifaʼanö ia niʼowalu. 8 No lafonukha niʼowalu, labeʼe khönia nukha si sökhi si takile ba si lö taʼunö. Nukha si sökhi andrö no amaedola waʼatulö nifalua niha niʼamoniʼö.”+
9 Aefa daʼö imane khögu malaʼika andrö, ”Sura daʼa: Yaʼahowu niha nikaoni ba walöwa Nono Mbiri-biri.”+ Imane göi nasa, ”Daʼa daromali sindruhu moroi khö Lowalangi.” 10 Utuhi danö ba mangalulu ndraʼo föna gahenia. Hizaʼi imane khögu, ”Böi! Böi angalulu khögu!+ Khö Lowalangi angalulu!+ Sawuyu göi ndraʼo simane yaʼugö ba simane ira talifusöu fefu, si no mamaduhuʼö Yesu.+ Börö me daʼö lua-lua wamaʼeleʼö ba wamaduhuʼö sanandrösa khö Yesu.”+
11 Uʼila teboka zorugo ba oroma sageu kudo safusi.+ Si fakudo yawania mufotöi ia Si Lö Faröi+ ba Sindruhu.+ Satulö wanguhukunia hegöi fasuwötania.+ 12 Hörönia hulö hola-hola galitö+ ba oya dakula nifakenia. So döi si no tesura ba mbotonia, ba dozi niha lö laʼila geluaha baero ia samösa. 13 No ifake mbaru sebua si no tokana do, ba töinia yaʼia daʼö Taromali+ Lowalangi. 14 Laʼoʼö ia saradadu zorugo si fakudo ba hulu kudo safusi. No lafake nukha si sökhi, safusi ba si lö taʼunö. 15 Moroi ba mbawania kalua wöda sanau ba satarö,+ niʼogunaʼönia ba wamakiko ngawalö soi. Ikubaloi ira faoma siʼo siʼöli.+ Ihundra-hundra naha wamera agu si no amaedola wönu sebua moroi khö Lowalangi Fondrege Zabölö.+ 16 Ba mbarunia tanö baero ba gamaudu wahania, no tesura sambua döi: Razo yawa razo, ba Soʼaya yawa zoʼaya.+
17 Uʼila göi malaʼika si zizio föna luo. Ikaoni fefu wofo si hombo ba dalu mbanua si fao feʼao imane, ”Miʼaine, miʼowuloi ami ba gowasa sebua andrö khö Lowalangi,+ 18 enaʼö tola miʼa nagole razo, nagole gumandru zaradadu, nagole niha sabölö,+ nagole kudo hegöi si fakudo yawania,+ nagole niha fefu, he niha niʼefaʼö hegöi sawuyu, he niha si toʼölö manö hegöi niha si tehöngö.”
19 Aefa daʼö, uʼila gurifö samuʼi, razo-razo ba gulidanö awö zaradadura. No owulo ira weʼamöi fasuwö khö zi fakudo andrö awö zaradadunia.+ 20 Laraʼu gurifö samuʼi andrö awö ndra samaʼeleʼö sofaya+ khönia si no mamazökhi tandra sahöli-höli dödö föna gurifö daʼö. Samaʼeleʼö andrö zamaelungu fefu niha sanema tandra gurifö samuʼi andrö+ hegöi sangalulu ba nadunia.+ Aefa daʼö, mutiboʼö auri ira maʼadarua ba mbaho alitö si hola-hola safönu balera.+ 21 Hizaʼi, labunu danö böʼö faoma föda sanau si otarai mbawa zi fakudo andrö.+ Ba abuso fefu wofo wemanga nagolera.+