Dua Tesalonika

3 Ba gafuriata yaʼami ira talifusö, böi miböhöli wangandrö salahima+ enaʼö alio teturia ba tefolakhömi misa daromali Yehowa*+ simane si no alua ba gotaluami, 2 ba enaʼö teʼefaʼö ndraʼaga moroi ba niha si lö sökhi hegöi safaito,+ börö me lö dozi mamati niha.+ 3 Löʼö sa faröi Zoʼaya, iʼabeʼeʼö ba ilumöʼö ami moroi ba zi lö sökhi.* 4 Faduhu dödöma khö Zoʼaya ba khömi wa lö tebulö miʼoʼö wanuturu lala nibeʼema simane si no mifalua iadaʼa. 5 Yalötebulö ibeʼe khömi wanuturu lala Soʼaya irege miʼomasiʼö Lowalangi+ ba lö faröi ami+ khö Keriso.

6 Iadaʼa ira talifusö, omasiga mabeʼe khömi wanuturu lala ba döi Zoʼaya yaʼita Yesu Keriso: Enaʼö miʼaröuʼö ami khö ndra talifusö si lö moloʼö*+ ba si lö mamalua fanuturu lala nitemami* moroi khöma.+ 7 Miʼila samösa hewisa woloʼömi yaʼaga,+ sagötö wefaoma khömi, tenga simane niha si lö moloʼö andrö mbua-buama. 8 Lö irai lö mabuʼa mböli göma.+ Maʼodödögö wohalöwö ba maforege bongi maʼökhö enaʼö lö tobali noro dödömi ndraʼaga.+ 9 Hewaʼae sinangea menaʼö,+ lö mafalua daʼö börö me mabeʼe duma-duma khömi enaʼö miʼoʼö.+ 10 Me faoga khömi, no irai mabeʼe wanuturu lala: ”Niha si lö mohalöwö, böi yamanga.”+ 11 No marongo wa so ba gotaluami zi lö moloʼö,+ lö mohalöwö ira ba laʼurusai zi tenga urusara.+ 12 Ba niha simane daʼö, mabeʼe mene-mene hegöi degu-degu ba döi Zoʼaya yaʼita Yesu Keriso enaʼö mohalöwö ira ba laʼalui samösa zoguna khöra.+

13 Hizaʼi yaʼami ira talifusö, böi miböhöli wamalua amuata si sökhi. 14 Na so zi lö moloʼö fanuturu lala nibeʼema ba zura, töngöni niha simane daʼö, ba böi mifariawö khönia+ enaʼö aila ia. 15 Hizaʼi, böi mibaliʼö ia udu. Tobali, böi böhöli wanegu yaʼia+ simane si fatalifusö.

16 Yalötebulö ibeʼe khömi waʼatulö dödö Soʼaya ba ngawalö hadia ia.+ Yafao khömi Zoʼaya.

17 Yaʼo sotöi Faulo, yaʼe wangowaigu, nisuragu samösa.+ Daʼa dandra wa moroi khögu zura andre ero ufaʼoheʼö khömi.

18 Yafao khömi fefu waʼasökhi dödö sebua* moroi khö Zoʼaya yaʼita Yesu Keriso.